جوبا اياسىندا ءۇش وڭىرلىك ونكولوگيالىق ورتالىق ءۇشىن تسيفرلىق مامموگرافيالىق جابدىقپەن, ساراپتامالىق دەڭگەيدەگى ۋلترادىبىستىق جۇيەمەن جانە ونكولوگيالىق تەكسەرۋلەر جۇرگىزۋگە ارنالعان كومپيۋتەرلىك توموگرافپەن جاراقتاندىرىلعان جىلجىمالى مەديتسينالىق كەشەندەر ساتىپ الىنادى.
قازاقستان رەسپۋبليكاسى بويىنشا پيلوتتىق وڭىرلەر رەتىندە تاڭدالعان الماتى, قىزىلوردا جانە اقتوبە وبلىستارىندا «QH دەنساۋلىق جولى» جوباسىنىڭ ىسكە اسىرىلۋى حالىقتى قامتۋدى جانە ناۋقاستار اراسىنان ونكولوگيالىق اۋرۋعا شالدىققانداردى, اسىرەسە, ەرتە ساتىلاردا (0-1 ساتىدا) انىقتاۋدى ۇلعايتۋعا مۇمكىندىك بەرەدى. حالىقتى ونكولوگيالىق سكرينينگپەن قامتۋ بويىنشا اعىمداعى جوسپار 60% قۇرايدى, بىراق ءىس جۇزىندە تەك 50%-عا دەيىن ورىندالادى. جوبانى ەنگىزۋ ارقىلى پيلوتتىق وڭىرلەر بويىنشا قامتۋدى 50-دەن 70%-عا دەيىن ۇلعايتۋ كوزدەلەدى.
سونداي-اق 2023 جىلدىڭ باسىندا اۋىل حالقىنىڭ سانى اقتوبە وبلىسىندا – 253 مىڭ ادامدى (28%), الماتى وبلىسىندا – 1 622 مىڭ ادامدى (78%), قىزىلوردا وبلىسىندا – 453 مىڭ ادامدى (55%) قۇراعانىن اتاپ وتكەن ءجون. وسى وڭىرلەردەگى اۋىل حالقىنىڭ كورسەتىلگەن ۇلەسى دامىماعان كولىك كوممۋنيكاتسيالارى جاعدايىندا, قازىرگى زامانعى بايلانىس قۇرالدارى بولماعان جاعدايدا ءومىر سۇرەدى. سالدارىنان مەديتسينالىق كومەككە جۇگىنۋ دەڭگەيى تومەن, ءارى بۇل ونكولوگيالىق اۋرۋلاردى ەرتە ساتىلارىندا انىقتاۋعا اسەر ەتەدى.
جوباعا قاتىسۋ ءۇشىن ىرىكتەلگەن اقتوبە (57,1%) جانە قىزىلوردا وبلىستارىندا (45,0%) مامموگرافتاردىڭ ەسكىرۋى (8 جىل جانە ودان دا كوپ) جانە تسيفرلىق مامموگرافتاردىڭ جەتكىلىكسىز سانى بايقالادى.
شالعاي وڭىرلەر مەن ەلدىمەكەندەردىڭ تۇرعىندارىنا جىلجىمالى كەشەندەردە تەكسەرۋلەر جۇرگىزۋ ونكولوگيالىق اۋرۋلارعا كۇدىكتى پاتسيەنتتەرگە جوعارى تەحنولوگيالىق كونسۋلتاتسيالىق-دياگنوستيكالىق كومەككە قولجەتىمدىلىكتى ارتتىرۋعا مۇمكىندىك بەرەدى, ولار قاشىقتىعىنا بايلانىستى ۋاقىتىلى تەكسەرۋدەن وتە المايدى, ونىڭ ىشىندە تومەن دوزالى كومپيۋتەرلىك توموگرافيانىڭ كومەگىمەن سكرينينگتىك تەكسەرۋلەر جۇرگىزۋدى ىسكە اسىرادى. بۇدان باسقا, جوبا كادرلار مەن جابدىقتار جەتىسپەيتىن شالعاي وڭىرلەرىندەگى اۋىلدىق جەردە كونسۋلتاتسيالىق-دياگنوستيكالىق زەرتتەۋلەرگە قول جەتكىزۋدى قامتاماسىز ەتەدى.
جوبا اياسىندا جالپى سوماسى 3 ملرد 273 ملن تەڭگەگە ءۇش جىلجىمالى كەشەندى ماشينا ساتىپ الۋ جوسپارلانۋدا. باعدارلاما 2023-2024 جىلدارعا (1 جىل) ارنالعان.
ايتا كەتەيىك, ونكولوگيالىق اۋرۋلاردى ەرتە انىقتاۋ ءارى قاراي ساۋىعىپ كەتۋ مۇمكىندىگىمەن ەمدەۋ بويىنشا ۋاقىتىلى راسىمدەر كەشەنىن جۇرگىزۋ, سونداي-اق قر حالقى اراسىندا قاتەرلى ىسىكتەردەن بولاتىن ءولىم-ءجىتىمدى تومەندەتۋ مۇمكىندىگىن قامتاماسىز ەتەدى.
باعدارلامانى ىسكە اسىرۋ بويىنشا قوردىڭ سەرىكتەستەرى – قازورعزي جانە وڭىرلىك ونكولوگيالىق ورتالىقتار – الماتى وبلىسىنىڭ دەنساۋلىق ساقتاۋ باسقارماسى شجق «الماتى وڭىرلىك كوپسالالى كلينيكاسى» كمك, قىزىلوردا وبلىسى دەنساۋلىق ساقتاۋ باسقارماسى شجق «قىزىلوردا وبلىستىق ونكولوگيالىق ورتالىعى» كمك, «مارات وسپانوۆ اتىنداعى باتىس قازاقستان مەديتسينالىق ۋنيۆەرسيتەتى» كەاق.
جوبانى ىسكە اسىرۋ قورىتىندىلارى بويىنشا جۇرگىزىلگەن ونكولوگيالىق زەرتتەۋلەردىڭ ناتيجەلەرىنە تالداۋ, ونىڭ ىشىندە پيلوتتىق جوباعا كىرمەگەن وڭىرلەرمەن سالىستىرمالى تالداۋ جۇرگىزىلەدى جانە جوبانى ۇلعايتۋ بويىنشا ۇسىنىستار دايىندالادى.
