پرەزيدەنت تاپسىرماسىن ورىنداۋ ماقساتىندا قوستاناي وبلىسى اكىمدىگى جانىنان رەزيدەنتسيانىڭ قانداي ماقساتقا قىزمەت ەتەتىنىن ايقىندايتىن جۇمىس توبى قۇرىلىپ, قوعام وكىلدەرى مەن مۇددەلى مەملەكەتتىك ورگانداردىڭ ۇسىنىس-تىلەكتەرىن تىڭداپ شىققان.
ناۋرىز قارساڭىندا جۇمىس توبى ايماقتىق رەزيدەنتسيانى پسيحونەۆرولوگيالىق اۋىتقۋعا ۇشىراعان جانە تىرەك-قيمىل قوزعالىسىنا زاقىم كەلگەن بالالارعا ارنالعان ساۋىقتىرۋ ورتالىعىنا بەيىمدەۋ تۋرالى شەشىم قابىلدادى. جاڭا ورتالىقتا ەمگە مۇقتاج بالالارعا ارنايى الەۋمەتتىك كومەك كورسەتىلىپ, مەديتسينالىق وڭالتۋ, ساۋىقتىرۋ جۇمىستارى اتقارىلادى. ەم-شارا قابىلداۋ مەرزىمى 14 تاۋلىكتەن 21 كۇنگە دەيىن ۇزارتىلادى.
بۇعان دەيىن مۇگەدەكتىگى بار بالالارعا ارنالعان ساۋىقتىرۋ شارالارى وبلىستىق وڭالتۋ ورتالىعىندا عانا جۇرگىزىلىپ كەلگەن بولاتىن. مۇنداعى بالالارعا ارنالعان بولىمشە 2021 جىلدىڭ قىركۇيەگىندە اشىلدى. وبلىس اكىمدىگىنىڭ مالىمەتىنشە, 2022 جىلى بۇل مەكەمەدە 191 بالا 14 كۇندىك ەم-شارا قابىلداعان.
جالپى وبلىس بويىنشا پسيحونەۆرولوگيالىق اۋىتقۋعا ۇشىراعان, تىرەك-قيمىل قوزعالىسىنا زاقىم كەلگەن ەكى مىڭعا جۋىق بالا بار.
جاڭا ساۋىقتىرۋ ورتالىعى جىل سايىن وسىنداي دەرتكە شالدىققان 1,5 جاستان 18 جاسقا دەيىنگى 900 بالانى ەمدەۋگە, رەابيليتاتسيالىق قولداۋ كورسەتۋگە مۇمكىندىك بەرمەك.
اتالعان ورتالىقتا لوگوپەد, دەفەكتولوگ, رەابيليتولوگ ماماندار جۇمىس ىستەيتىن بولادى. سونداي-اق دەنە قۇرىسىن جازۋ, ەمدەۋ ماقساتىنداعى دەنە شىنىقتىرۋ, سۋمەن ەمدەۋ سياقتى قىزمەتتەر كورسەتىلەدى.
رەزيدەنتسيانى رەابيليتاتسيالىق ورتالىققا اينالدىرۋ ماقساتىندا جەرگىلىكتى بيۋدجەتتەن قارجى قاراستىرىلادى. بولىنگەن قاراجاتقا عيماراتتى مۇمكىندىگى شەكتەۋلى بالالارعا بەيىمدەۋ, رەابيليتاتسيالىق قۇرال-جادىقتارمەن قامتاماسىز ەتۋ سياقتى جۇمىستار اتقارىلادى.
بيىل عيماراتتى قايتا جابدىقتاۋ ءۇشىن جوبالاۋ-سمەتالىق قۇجاتتارعا تاپسىرىس بەرىلىپ, قۇرىلىس-مونتاجداۋ جۇمىستارى باستالادى.
