سايلاۋ • 20 ناۋرىز، 2023

جۇيەلى ۇيىمداستىرىلدى

اۋماقتىق سايلاۋ كوميسسياسىنىڭ مالىمەتىنە سۇيەنسەك، بۇل كۇنى پاۆلودار وبلىسى بويىنشا 512 مىڭنان استام ازامات داۋىس بەرۋ قۇقىعىنا يە بولعان. ءماجىلىس دەپۋتاتتىعىنا وڭىردەن ون ءبىر ۇمىتكەر داۋىسقا تۇسسە، وبلىس ءماسليحاتىنا جەتى پارتيانىڭ وكىلدەرى كانديداتتارىن ۇسىندى.

مۇرات قاپان ۇلى

ادەتتەگىدەي، بۇل كۇنى پاۆلودار، ەكىباستۇز جانە اقسۋ قالالارىندا قوعامدىق كولىكتەر جولاۋشىلاردى تەگىن تاسىمالدادى. مۇمكىندىگى شەكتەۋلى جاندارعا ارنالعان ينۆاتاكسيلەر دە ءوز قىزمەتتەرىن تەگىن كورسەتتى. كەي ازاماتتار دەنساۋلىعىنا بايلانىستى ۇيدەن داۋىس بەرۋدى قالاسا، ساعات 12.00-گە دەيىن ءتيىستى سايلاۋ ۋچاسكەسىنە حابارلاسىپ، ءوتىنىش قالدىرا الدى. ال تۇراقتى تىركەۋى جوق ازاماتتارعا بەلگىلى ءبىر ۋچاسكەدە ۋاقىتشا تىركەلىپ، تاڭداۋ جاساۋعا مۇمكىندىك بەرىلدى.

بيىل وتاۋ قۇرعاندارىنا 60 جىل تولعالى وتىرعان قادىر ارىنوۆ پەن باتىر انا قالامشاش ارىنوۆا ماي اۋدانىنىڭ كوكتوبە اۋىلىنداعى سايلاۋ ۋچاسكەسىنە ەلدىڭ الدى بولىپ كەلىپ داۋىس بەردى. قالامشاش اجە – 10 قۇرساق كوتەرگەن انا. بيىل جەتپىس جەتىگە كەلەتىن كەيۋانا سايلاۋ ۋچاسكەسىندەگى حالىقتىڭ اشىق-جارقىن ءجۇزىن، كوڭىلدىڭ حوشىن اشاتىن اۋاندى كورىپ، قۋانىپ تۇرعانىن جەتكىزدى.

«كەلىپ جاتقان اۋىلداستارىم كوپ، اسىرەسە، جاستاردىڭ بەلسەندىلىگىن بايقادىم. بارلىعى ەلىمىزدىڭ بولاشاعى، حالقىمىزدىڭ جارقىن ءومىرى ءۇشىن تاڭداۋ جاساپ جاتقانى ءسوزسىز. ۋچاسكەدە قارسى العان كوميسسيا مۇشەلەرى تاڭ اتپاي كوڭىلىمىزدى كوتەرىپ، سىيلىق دايىنداپ قويىپتى. بۇل سايلاۋدا ءسوزى – دۇرىس، ءىسى – تۇزىك، ءبىلىمدى ازاماتتار جەڭىسكە جەتسە ەكەن دەپ تىلەيمىز. ادىلەتتى قازاقستاندى قۇرۋعا اتسالىسىپ جاتقانىمدى ماقتانىش تۇتامىن»، دەپ اتاپ ءوتتى باتىر انا.

بۇل كۇنى باياناۋىلدا تۇراتىن ەكىنشى دۇنيەجۇزىلىك سوعىس ارداگەرى قايىر حاسەنوۆ پەن ايماقتىڭ ابىز اقساقالى، ارداگەر ۇستاز زەكەباي سولتانباي ۇلى ءۇي جاعدايىندا داۋىس بەردى. 98 جاستاعى قارت مايدانگەر سۇراپىل سوعىستا 6-ارميا قۇرامىندا سوعىسىپ، ۋكراينا جەرلەرىن ازات ەتۋگە قاتىسقان. ەرەن ەرلىگى ءۇشىن ءىى دارەجەلى « ۇلى وتان سوعىسى» وردەنىمەن، بىرنەشە مەدالمەن ماراپاتتالعان.

«زامانىمىز تىنىش بولسىن، جاراتقان ازاماتتارىمىزدىڭ باعىن اسىرسىن. جاس ۇرپاقتىڭ كەلەشەگى كەمەل، اسپانىمىز اشىق بولعاي. ەل ىرگەسى نىعايا بەرسىن»، دەپ باتا بەردى قازىنالى اقساقال.

ال 18 جاسقا تولعان پاۆلودارلىق تۇرعىن اراي تەمىربولات العاش رەت سايلاۋ ۋچاسكەسىندە ءوز تاڭداۋىن جاسادى. «ماعان ەرتەڭگى كۇنى مۇددەمدى كىمنىڭ قورعاپ، وڭىردەگى ماسەلەلەردى قالاي شەشەتىنى ماڭىزدى. سول ءۇشىن دە پارتيالار مەن كانديداتتاردىڭ باعدارلاماسىن الدىن الا قاراپ الدىم. دۇرىس تاڭداۋ جاسادىم دەپ ويلايمىن»، دەيدى بويجەتكەن.

جالپى، بۇل كۇنى سايلاۋشىلاردىڭ بارىنشا بەلسەندى بولعانىن بايقادىق. تۇرعىندارعا الا تاڭنان تۇتەپ سوققان بوران دا كەدەرگى بولا المادى. تۇسكى مەزگىلدىڭ وزىندە تىزىمدەگى داۋىس بەرۋشىلەردىڭ 52 پايىزى داۋىس بەرىپ ۇلگەرگەنىنە كۋا بولدىق. ال بايقاۋشىلار مەن قوعامدىق ينستيتۋتتاردىڭ وكىلدەرى سايلاۋ ۋچاسكەلەرىندەگى داۋىس بەرۋ پروتسەستەرى بارىنشا جۇيەلى ۇيىمداستىرىلعانىن اتاپ ءوتتى.

پاۆلودار وبلىسى