اقىننىڭ باي مۇراسىن ناسيحاتتاپ, ۇرپاق جادىندا جاڭعىرتۋدى كوزدەگەن «ورامدى ويدىڭ ومارى» اتتى بايقاۋ قىزىلوردا قالاسى اكىمدىگىنىڭ قولداۋىمەن, وبلىستىق حالىق شىعارماشىلىعىن دامىتۋ جانە مادەني-پروديۋسەرلىك ورتالىعى, قالالىق مادەنيەت جانە سپورت ءبولىمى, ايتىس اقىندارى مەن جىرشى-تەرمەشىلەردىڭ حالىقارالىق وداعى قىزىلوردا وبلىسى بويىنشا فيليالىنىڭ بىرلەسە ۇيىمداستىرۋىمەن وتكىزىلدى. جىرعا سۋساعان جۇرتقا رۋحاني كەش سىيلاعان شارانىڭ وتۋىنە شايىر ۇرپاقتارى دەمەۋشىلىك تانىتىپتى.
جىرشىلار بايقاۋىندا قالا اكىمىنىڭ ورىنباسارى جانمۇرات سەيىلوۆ تالاپكەر جاستارعا ساتتىلىك تىلەدى.
– بابادان قالعان رۋحاني قازىنانىڭ ورنى قاشاندا بولەك. سونىڭ ىشىندە «سىر ەلى – جىر ەلى» دەپ تانىلعان وسى توپىراقتان تۇلەگەن ۇرپاقتىڭ قانعا سىڭگەن جىراۋلىق ونەردەن الشاق بولماسى تاعى انىق. ومار شوراياق ۇلىنىڭ باي مۇراسىن ناسيحاتتاۋ ارقىلى جاس ۇرپاق جادىندا جاڭعىرتۋدى مۇرات ەتكەن بۇل بايقاۋدىڭ بەرەرى مول دەپ بىلەمىن, – دەدى ول.
شايىردىڭ ۇرپاعى, مادەنيەت سالاسىنىڭ ۇزدىگى, تانىمال اقىن سەرىك ىدىرىسوۆ جاس جىرشىلارعا باتاسىن بەرىپ, ونەردەگى جولدارىڭ داڭعىل بولسىن دەگەن تىلەگىن ءبىلدىردى. شايىردىڭ تەرمەلەرى مەن داستاندارىنان ءۇزىندى ورىندالعان وبلىستىق بايقاۋعا بەلگىلى جىرشىلار, مادەنيەت قايراتكەرى رۋسلان احمەتوۆ, وبلىستىق حالىق شىعارماشىلىعىن دامىتۋ جانە مادەني-پروديۋسەرلىك ورتالىعىنىڭ سەكتور مەڭگەرۋشىسى مايرا سارسەنباەۆا مەن مارات سۇگىرباي قازىلىق جاسادى.
بايقاۋ ناتيجەسىندە قىزىلوردالىق اڭساعان دىلدابەكقىزى, جانۇزاق رىسبەك, دوسىمجان قۇرمانعاليەۆ, قارماقشىلىق اراي وڭعارقىزى ارنايى جۇلدە السا, جالاعاش اۋدانىنان كەلگەن باقىتبەك داۋلەتبەك, قارماقشىلىق ايدانا امانتاي, قىزىلوردالىق قاراقات ابدىكەرىم جۇلدەلى ءۇشىنشى ورىندى ءوزارا ءبولىستى. ارالدىق ينابات تولعانبەكوۆا مەن قارماقشىلىق تالانت بالتاباي ەكىنشى ورىندى يەلەندى. بايقاۋدىڭ ءبىرىنشى ورىنى قارماقشىلىق ءمادي ەلدەس پەن قىزىلوردالىق اياۋلىم ابدۋماجيتكە بۇيىرسا, باس جۇلدە مەن «جىرشى بالا – 2023» نوميناتسياسىن قىزىلوردالىق جاس جىرشى نوسەر ايدوس ۇلى جەڭىپ الدى.
جەڭىمپازدار مەن جۇلدەگەرلەرگە ومار شوراياق ۇلىنىڭ ۇرپاقتارى اتىنان سىيلىقتار تابىستالدى.
قىزىلوردا
