استانادا «قازاقستان-2050» جالپىۇلتتىق قوزعالىسىنىڭ العاشقى فورۋمى وتەدى

استانا. 27 ماۋسىم. مەملەكەت باسشىسىنىڭ قولداۋىمەن 2013 جىلدىڭ جەلتوقسانىندا قۇرىلعان «قازاقستان-2050» جالپىۇلتتىق قوزعالىسى ءوزىنىڭ العاشقى فورۋمىن 28 ماۋسىمدا ەلوردادا وتكىزەدى. بۇل تۋرالى «حابار» تەلەارناسى حابارلادى. «قازاقستان 2050» جالپىۇلتتىق قوزعالىسى كەڭەسىنىڭ توراعاسى دانات ءجۇميننىڭ ايتۋىنشا, اتالعان قوزعالىس جۇمىسىن باستاعالى بەرى 9 جوبانى قولعا العان. سونداي-اق, جىلدىڭ سوڭىنا دەيىن تاعى دا 5 جوبانى جۇزەگە اسىرۋ جوسپاردا تۇر. سونىڭ ءبىرى رەتىندە «زياتكەر ۇرپاق» دەپ اتالاتىن باعدارلامانى ايتۋعا بولادى. بۇل باعدارلامانىڭ نەگىزگى ماقساتى – اۋىل مەن قالا وقۋشىلارىنىڭ ءبىلىم دەڭگەيىن تەڭەستىرۋ. سونداي-اق, تاياۋ ارادا بۇل ۇيىم «ايماق-2050» جوباسىن ىسكە قوسۋدى كوزدەپ وتىر. قازىرگى تاڭدا قوزعالىستىڭ قۇرامىندا 3 مىڭداي بەلسەندى بار. بۇلاردىڭ اراسىنداعى بىلىكتى ماماندار اۋىلدارداعى جەتكىنشەكتەرگە اقىل-كەڭەستەرىن ايتادى. 28 ماۋسىم كۇنى وتەتىن «قازاقستان 2050» جالپىۇلتتىق قوزعالىسى فورۋمىنا 400-دەن استام ادام قاتىسادى دەپ كۇتىلۋدە. جولدىباي بازار. دەرەككوز: «حابار» تەلەارناسى. فوتو: Old.24.kz.