گاۋھار توي يەلەرى داۋىس بەردى

قالامشاش اپا - 10 بالانىڭ اناسى. بيىل جەتپىس جەتىگە كەلەتىن كەيۋانا سايلاۋ ۋچاسكەسىندەگى حالىقتىڭ اشىق-جارقىن ءجۇزىن، كوڭىلدىڭ حوشىن اشاتىن اۋاندى كورىپ، قۋانىپ تۇرعانىن جەتكىزدى.

«كەلىپ جاتقان اۋىلداستارىم كوپ، اسىرەسە، جاستاردىڭ بەلسەندىلىگىن بايقادىم. بارلىعى ەلىمىزدىڭ بولاشاعى، حالقىمىزدىڭ جارقىن ءومىرى ءۇشىن تاڭداۋ جاساپ جاتقانى ءسوزسىز. ۋچاسكەدە قارسى العان كوميسسيا مۇشەلەرى تاڭ اتپاي كوڭىلىمىزدى كوتەرىپ، سىيلىق دايىنداپ قويىپتى. قازىرگى كۇنى زەينەتكە شىقسام دا، ەلدىڭ ساياسي ءومىرى، بالالارىمنىڭ كەلەشەگى مەنى الاڭداتادى. بۇل سايلاۋدا ءسوزى – دۇرىس، ءىسى - تۇزىك، ءبىلىمدى ازاماتتار جەڭىسكە جەتسە ەكەن دەپ تىلەيمىز. جاڭا قازاقستاندى قۇرۋعا اتسالىسىپ جاتقانىمدى ماقتان تۇتامىن»، دەپ اتاپ ءوتتى باتىر انا.

قادىر اقساقال مەن قالامشاش اجەيدىڭ ۇل-قىزدارىنان بۇگىندە نەمەرەلەرىن قوسپاعاندا، 12 شوبەرە تاراپ وتىر. وتاعاسى كەزىندە سوۆحوزدىڭ جۇمىسىندا تەر توگىپ، تراكتوريست، شوپان قىزمەتتەرىن اتقارىپتى. بۇگىنگى بەيبىت ومىرگە شۇكىرلىك ەتەتىن قاريالار بيىل جازدا وتاسقاندارىنا 60 جىل – گاۋھار تويلارىن اتاپ وتپەك.