كەي ازاماتتار دەنساۋلىعىنا بايلانىستى ۇيدەن داۋىس بەرۋدى قالاسا, ساعات 12.00-گە دەيىن ءتيىستى سايلاۋ ۋچاسكەسىنە حابارلاسىپ, ءوتىنىش قالدىرا الادى. مۇنداي جاعدايدا كوميسسيا وكىلدەرى تۇرعىننىڭ ۇيىنە بيۋللەتەندەردى الىپ بارادى. تۇراقتى تىركەۋى جوق ازاماتتارعا پاۆلودار, ەكىباستۇز جانە اقسۋ قالالارىنداعى 6 سايلاۋ ۋچاسكەسىندە ءبىر كۇنگە تىركەلىپ, تاڭداۋىن جاساۋعا مۇمكىندىك بار. بۇگىن اتالعان ءۇش قالاداعى قوعامدىق كولىكتەر جولاۋشىلاردى تەگىن تاسىمالدايدى. سونداي-اق ينۆاتاكسيلەر تەگىن قىزمەت كورسەتەدى.
Cايلاۋ ۋچاسكەلەرىندە داۋىس بەرۋشىلەرگە بىردەن بەس بيۋللەتەن بەرىلىپ جاتىر. بۇل رەتتە كوگىلدىر ءتۇستى بيۋللەتەن ارقىلى ماجىلىسكە ءوتۋى كەرەك پارتيانى تاڭدايسىز. وعان ەلدەگى جەتى پارتيا ۇسىنىلىپ وتىر. ماجىلىسكە بىرمانداتتىق سايلاۋ ۋچاسكەسى اياسىندا ۇسىنىلعان كانديداتتاردىڭ ءبىرىن بەلگىلەۋ ءۇشىن جاسىل ءتۇستى بيۋللەتەن بەرىلەدى.
بيۋللەتەندە ءبىزدىڭ وڭىردەن تىركەلگەن 11 ۇمىتكەردىڭ ەسىمى بولادى. وبلىستىق ءماسليحات دەپۋتاتتارىن پارتيالىق ءتىزىم بويىنشا سايلاۋ بيۋللەتەندەرى قىزعىلت, بىرمانداتتىق سايلاۋ وكرۋگتەرى بويىنشا سارعىش ءتۇستى بولادى. وبلىستىق ماسليحاتتاعى مانداتتارعا دا جەتى پارتيا «تالاسادى». بىرمانداتتىق وكرۋگ اياسىندا 51 كانديدات سايلاۋعا تۇسەدى. ال اۋداندىق جانە قالالىق ءماسليحاتتاردىڭ دەپۋتاتى اتانۋدان ءۇمىتتى ازاماتتاردىڭ ەسىمدەرى سۇر ءتۇستى بيۋللەتەندە جازىلادى. قالالىق ءماسليحات دەپۋتاتتىعىنا - 173, اۋداندىق ءماسليحات دەپۋتاتتىعىنا 346 كانديدات تىركەلگەن.
