5571-اسكەري بولىمىندە ورنالاسقان № 107 سايلاۋ ۋچاسكەسىندە ساپ تۇزەگەن ساربازدار داۋىس بەرۋدى تاڭعى ساعات 06:00-دە باستادى.
«بۇگىن ەرەكشە كۇن. سەبەبى قازاقستان رەسپۋبليكاسىنىڭ ازاماتى رەتىندە داۋىس بەرۋ قۇقىعىمدى پايدالانىپ تۇرمىن», دەدى قاتارداعى جاۋىنگەر ريچارد زايەنچكوۆسكي. قاتىسۋشىلاردىڭ باسىم بولىگى العاش رەت داۋىس بەرىپ جاتىر. سولاردىڭ ءبىرى, 6 اي بۇرىن اسكەرگە شاقىرىلعان امان ەرماحان. «مەن استانا قالاسىنان شاقىرىلدىم. ومىرىمدە ءبىرىنشى رەت داۋىس بەردىم. وتانىمىزدىڭ بولاشاعىنا بەي-جاي قاراي المايمىن. سوندىقتان ءوز تاڭداۋىمدى جاسادىم», دەيدى سارباز امان ەرماحان.
اسكەري بولىمدە سايلاۋ وتكىزۋگە بارلىق جاعداي جاسالعان. سايلاۋ جاشىكتەرى مەن 7 داۋىس بەرۋگە ارنالعان كابينا بار. ء«بىزدىڭ سايلاۋ ۋچاسكەسىندە داۋىس بەرۋ تاڭعى ساعات التىدا باستالدى. ءبىزدىڭ ماقسات- قازاقستاننىڭ دامۋىنا, وركەندەۋىنە ءوز ۇلەسىمىزدى قوسۋ.
«الىپتىڭ قۋاتى حالىقتا, حالىقتىڭ قۋاتى بىرلىكتە», دەمەكشى ساياسي ناۋقانعا ۇلكەن جاۋاپكەرشىلىكپەن قاتىسىپ جاتىرمىز. ساربازداردىڭ كوڭىل كۇيى وتە جاقسى», دەيدى 5571-اسكەري ءبولىمىنىڭ كومانديرى باقداۋلەت ورال ۇلى.
الماتى سايلاۋ كوميسسياسىنىڭ مالىمەتىنشە, مەگاپوليستەگى 7 اسكەري بولىمدە داۋىس بەرۋ ساعات التىدا باستالدى.
استانا ۋاقىتىمەن تاڭعى ساعات 4-تە سەۋلدە №258 جانە توكيودا №261 سايلاۋ ۋچاسكەلەرى الەمدە ءبىرىنشى بولىپ اشىلدى.
وڭتۇستىك كورەياداعى قر ازاماتى كۋرسانت اسانوۆ ەلنۋر ءبىرىنشى بولىپ داۋىس بەردى. كەيىن ءالىمنىڭ تاعى 9 قالاسىندا داۋىس بەرۋ باستالدى.
قر كونستيتۋتسياسىنا سايكەس, پارلامەنت ءماجىلىسى ارالاس سايلاۋ جۇيەسى بويىنشا كونستيتۋتسيالىق زاڭدا بەلگىلەنگەن تارتىپپەن سايلاناتىن 98 دەپۋتاتتان تۇرادى. بىرىڭعاي جالپىۇلتتىق سايلاۋ وكرۋگى اۋماعى بويىنشا, ياعني پارتيالىق ءتىزىم بويىنشا ءماجىلىستىڭ 69 دەپۋتاتى, ءبىر مانداتتى اۋماقتىق سايلاۋ وكرۋگتەرى بويىنشا – 29 دەپۋتات سايلانادى.
