ىنتىماقتاستىق تۋرالى كەلىسىمگە 2023 جىلعى 10 ناۋرىزدا Astana Hub باس ديرەكتورى ماعجان ماديەۆ پەن Draper University پرەزيدەنتى Asra Nadeem سان-ماتەو قالاسىندا (كاليفورنيا شتاتى) تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ اقش-قا رەسمي ساپارى بارىسىندا قول قويدى.
– مەملەكەت باسشىسى قاسىم-جومارت توقاەۆ ەلدەگى IT-سالانىڭ دامۋىنا ايرىقشا ءمان بەرىپ, قولداۋ كورسەتىپ كەلەدى. وسى رەتتە ستارتاپتارىمىزعا ۇزدىك الەمدىك تاجىريبەنى ۇسىنعىمىز كەلەدى. كرەمني القابىندا ورنالاسقان Draper University قازىردىڭ وزىندە كوپتەگەن جاس IT-كومپانيالار ءۇشىن تابىسقا جەتۋدىڭ كاتاليزاتورىنا اينالدى. ويتكەنى ول جەردە رەسۋرستاردىڭ, كاپيتالدىڭ جانە حالىقارالىق ساراپشىلاردىڭ بىرەگەي ۇيلەسىمى بار. بۇل ستارتاپتاردىڭ جىلدام دامۋىنا مۇمكىندىك بەرەدى. ىنتىماقتاستىعىمىز باعدارلاما قاتىسۋشىلارىنا ءوز بيزنەسىن جاڭا دەڭگەيگە كوتەرىپ, جاھاندىق اۋقىمداعى كاسىپكەرلىكتە باسەكەگە قابىلەتتى كومپانياعا اينالۋعا جول اشارىنا سەنىمدىمىن, – دەدى باعدات مۋسين.
باعدارلاما مىناداي كەزەڭدەردەن تۇرادى: ءبىرىنشى – ۇزدىك 80 جوبا ءونىمدى ازىرلەۋ جانە ماسشتابتاۋ, سونداي-اق حالىقارالىق ۆەنچۋرلىق قورلاردان ينۆەستيتسيا تارتۋ قاعيداتتارى بويىنشا 2 اپتالىق ونلاين باعدارلاماعا قول جەتكىزە الادى. ەكىنشى – ۇزدىك 20 جوبا تاجىريبەلى تەحنولوگيالىق كاسىپكەرلەر جانە ساراپشىلاردىڭ جەتەكشىلىگىمەن ينۆەستيتسيا تارتۋ ءارى اقش نارىعىنا شىعۋ ءۇشىن كرەمني القابىنداعى Draper University-دە 6 ايعا دەيىن تەگىن باسپانا جانە جۇمىس ورنىمەن قامتاماسىز ەتىلىپ, 5 اپتالىق قارقىندى باعدارلامادان ءوتۋ مۇمكىندىگىنە يە بولادى.
Draper Ecosystem – يننوۆاتسيالىق ەكوجۇيەنى قولداۋ ءۇشىن وزىق فاسيليتاتورلار مەن تالىمگەرلەردىڭ, سالالىق ساراپشىلاردىڭ, كورپوراتيۆتىك سەرىكتەستەردىڭ جانە ينۆەستورلاردىڭ تەڭدەسى جوق جەلىسىن ۇسىنۋ ارقىلى تالانتتاردى, ساراپشىلاردى جانە ينۆەستورلاردى بىرىكتىرۋدىڭ بىرەگەي ءتاسىلى. Draper University نەگىزىن ۆەنچۋرلىق كاپيتال بيزنەسىندە 38 جىلدىق تاجىريبەسى بار تيم دراپەر قالاعان.
Hero Training باعدارلاماسىنا ءوتىنىش بيىلعى 7 ساۋىرگە دەيىن قابىلدانادى.
