ۇلتتىق بانك تاراتقان مالىمەتكە سايكەس, 10-12 ناۋرىز كۇندەرى اقش-تىڭ تەحنولوگيالىق سەكتورعا قىزمەت كورسەتەتىن ەكى بانكى Silicon Valley Bank پەن Signature Bank جابىلاتىنى تۋرالى اقپارات شىقتى.
«الەمنىڭ قارجى نارىعىندا قۇبىلمالىلىق ءورشىپ, اقش پەن ەۋروايماقتاعى بانك سەكتورىنا قاتىستى ينۆەستورلاردىڭ الاڭداۋشىلىقتان تۋىنداعان تاۋەكەلگە قىزىعۋشىلىعىنىڭ تومەندەگەنى بايقالىپ وتىر. اقش-تاعى جەرگىلىكتى داعدارىستىڭ ەۋروايماقتاعى بانكتەرگە اسەر ەتۋ تاۋەكەلدەرى Credit Suisse اتتى شۆەيتساريا بانكىنىڭ اكتسيا قۇنىن تومەندەتتى. شۆەيتساريانىڭ ورتالىق بانكى نارىقتاعى سەنىمدى قالپىنا كەلتىرۋ ءۇشىن بانككە شۇعىل وتىمدىلىك بەرۋ تۋرالى شەشىم قابىلدادى», دەدى ۇلتتىق بانك وكىلدەرى.
ۇلتتىق بانك سوڭعى كۇندەرى الەمدە بولىپ جاتقان وسى تەكتەس وقيعالار ىشكى ۆاليۋتا نارىعىنا دا اسەر ەتىپ وتىرعانىن دا جاسىرمادى.
«اقش دوللارى ايتارلىقتاي قۇبىلىپ, ۇلتتىق ۆاليۋتانىڭ السىرەي باستاعانى سەزىلدى. بۇل مۇناي باعاسىنىڭ باررەلىنە 73-74 دوللار دەڭگەيىنە دەيىن تومەندەۋىمەن قيىنداي ءتۇستى. ايتسە دە, اقش پەن ەۋروايماق بانكتەرىندەگى جەرگىلىكتى داعدارىستاردىڭ قازاقستاننىڭ قارجى نارىعىنا ىقپالى شەكتەۋلى. ساقتالعان ءپروفيتسيتتى ەسكەرگەندە, بانك جۇيەسىندەگى وتىمدىلىك جەتكىلىكتى», دەدى بانك وكىلدەرى.
ۇلتتىق بانك «ۆاليۋتا نارىعىنداعى وتىمدىلىكتى ساقتاۋ جانە ايىرباستاۋ باعامىنىڭ كۇرت اۋىتقۋىن رەتتەۋ ءۇشىن ۆاليۋتالىق ينتەرۆەنتسيالار جۇرگىزۋ قۇقىعىن ساقتايتىنىن» مالىمدەدى.
«بۇل تەڭگەنىڭ اقىلعا قونىمدى قۇبىلمالىلىعىن شەكتەمەي, باعام بەلگىلەۋدەگى نارىق تەتىكتەرىن قولدايدى دەگەندى بىلدىرەدى. قاجەت بولعان جاعدايدا ينتەرۆەنتسيالار جۇرگىزىلەدى جانە ءتيىستى اقپارات بۇقارالىق اقپارات قۇرالدارى ارقىلى جاريالانادى», دەلىنگەن ۇلتتىق بانك تاراتقان حابارلامادا.
