كاسىپكە باعدارلايتىن بىرەگەي جوبا

«Jaryq Foundation» سىرتتاي ينتەللەكتۋالدى ويىن سانالعانىمەن، وعان قاتىسۋشىلار كەلەشەكتە كاسىپتىك باعدارلاۋعا جول اشاتىن بىرەگەي جوبا دەپ باعا بەردى. جوعارى سىنىپتاردا ءبىلىم الىپ جۇرگەن جاستاردىڭ كوبى بولاشاق ماماندىعى قانداي سالادا بولاتىنىن ەلەستەتە المايتىنى شىن. جىل سايىن ەلىمىزدە ورتا ەسەپپەن 70 مىڭنان استام تۇلەك جۇمىسقا ورنالاسۋدا قيىندىققا ۇرىناتىنىن رەسمي ستاتيستيكا كورسەتىپ وتىر. ال جۇمىسقا تۇرعان تۇلەكتەردىڭ 40 پايىزى ماماندىعى بويىنشا ەڭبەك ەتپەيدى. بۇعان جاستاردىڭ ۇشتەن ءبىرى ماماندىقتى وزدەرى تاڭدامايتىنى سەبەپ كورىنەدى. ءوز قالاۋىنا سۇيەنبەگەندىكتەن əلەۋەتىن تولىق ىسكە اسىرۋ مۇمكىن بولمايدى. ال العان داعدىلارى مەن بىلىمدەرى ۋاقىت وتە ەسكىرىپ، ەڭبەك نارىعىندا بəسەكەگە قابىلەتسىز بولىپ قالادى. سول ءۇشىن دە جاستارعا مەكتەپ قابىرعاسىنان باستاپ كاسىپتىك باعدار بەرۋ وتە وزەكتى.

التىندى مايقايىڭ كەنتىندەگى №2 ورتا مەكتەبىنىڭ جاس ماماندارى – ديدار حاليموللا، بوگەمباي باحيتدەنوۆ، ەرمەك راحىمجانوۆتىڭ بىرلەسكەن اۆتورلىق جوباسى العاشقىدا «نە؟ قايدا؟ قاشان؟» ينتەللەكتۋالدى ويىنى نەگىزىندە تۇزىلگەن ەكەن. كەيىن جەتىلدىرە كەلە 11 باعىتتان تۇراتىن كەشەندى جوبا قۇرعان. ديدار مەكتەپتە بيولوگيا مەن ماتەماتيكادان، بوگەمباي بيولوگيادان، ال ەرمەك ماتەماتيكادان ساباق بەرەدى.

ديدار حاليموللانىڭ ايتۋىنشا، جوبانىڭ نەگىزگى ماقساتى – وقۋشىلاردى جان-جاقتى دامىتىپ، زەيىنىن جەتىلدىرۋ.

– ورتا ءبىلىم سالاسىندا وقۋشىلار ءۇشىن جاۋابى تابىلماعان سانسىز ساۋال بار. وكىنىشكە قاراي كوپشىلىگى ءۇشىن الگى بەيمالىم دۇنيەلەر جۇمباق كۇيدە قالا بەرەدى. قازىرگى قوعام مەكتەپ تۇلەكتەرىنىڭ ينتەللەكتۋالدىق دەڭگەيىنە ەرەكشە تالاپتار قويادى. «ەگەر وقۋشىلاردىڭ پاندەرگە قىزىعۋشىلىعى بولماسا، ينتەللەكتتى قالاي ارتتىرۋعا بولادى؟» دەگەن ساۋال تۋىندايدى. وقۋشىلاردى تاربيەلەۋ، وقىتۋ جانە دامىتۋدىڭ ەڭ كونە قۇرالدارىنىڭ ءبىرى – ويىن. ويلانا كەلە، مەكتەپ باعدارلاماسىنىڭ ماتەريالىن يگەرۋ اياسىندا قولجەتىمدى، جەڭىل جانە قىزىقتى ينتەللەكتۋالدى ويىن-جارىستىڭ نۇسقاسىن ازىرلەدىك. بۇل جوبا بۇگىندە مەكتەپ پەن قوعام الدىندا تۇرعان مىندەتتەردى ءىس جۇزىندە جۇزەگە اسىرۋعا، ماماندىققا باعدارلاۋ سالاسىنداعى پروبلەمالاردى شەشۋگە ارنالعان، – دەدى پەداگوگ.

بيىلعى وقۋ جىلىنىڭ باسىنان جوبا اۆتورلارى جاڭا باعدارلاردى جوسپارلاپ، زامانعا ساي ماماندىقتار بويىنشا 7-11-سىنىپ وقۋشىلارىن وقىتۋدى، سونداي-اق بالالار اراسىندا ۇلتتىق سپورت تۇرلەرىن دامىتۋدى قولعا العان. اتاپ ايتقاندا، مۇندا موبيلوگرافيا، شەشەندىك ونەر، SMM، روبوتتەحنيكا، كيبەرسپورت، ۇلتتىق سپورت (اسىق اتۋ مەن قازاق كۇرەسى)، «جارىق» ينتەللەكتۋالدى ويىنى، ماۋسىمدىق مارافون جۇگىرىسى، ولكەتانۋ، كاسىپتىك باعدار جوبالارى جانە «جارىق» اقپاراتتىق گازەتىن شىعارۋ جولعا قويىلدى.

ءبىر قىزىعى، موبيلوگرافيا كۋرسى بويىنشا 11-سىنىپ وقۋشىسى رۋستام ءابىلدا ءوز بىلگەنىن قۇربى-قۇرداستارىمەن ءبولىسىپ ءجۇر. جاس تالاپكەردىڭ بۇل كاسىپ بويىنشا ارنايى ترەنەرلىك سەرتيفيكاتى بار. ال مارافونعا جۇگىرۋدىڭ قىر-سىرىن بالالارعا مەكتەپ ۇستازى ولجاس كاكىمجانوۆ ۇيرەتەدى. ولجاس باياناۋىلدىق جەلاياق نۇرسۇلتان بىرلىك ەكەۋى 2021 جىلى سەمەي – پاۆلودار باعى­تىنداعى 330 شاقىرىمدى 44 ساعاتتىڭ ىشىندە جۇگىرىپ وتكەن بولاتىن. ولاردىڭ ۇزدىك ناتيجەسى وتاندىق گيننەستىڭ رەكوردتار كىتابىنا ەندى.

– مەكتەپ ۇستازدارى شەتىنەن بەل­سەن­دى. Foundation تەك جەتىلدىرۋگە عانا ەمەس، جاڭا بىلىمدەردى يگەرۋگە مۇم­كىن­دىك بەرەتىن زاماناۋي فورماتتاعى ويىن ەكەنىن كورىپ وتىرمىز. بالالار ماشىقتارىن دامىتىپ، كەز كەلگەن جاع­دايعا تالداۋ، قورىتىندى جاساۋدى مەڭ­گەرەدى. العاشقى ماۋسىمدا 30-عا جۋىق بالا قاتىسسا، ەكىنشى ماۋسىمدا ينتەل­لەكتۋال­دى ويىنعا – 40، ال كاسىپتىك باعدارلاۋ باعىتتارىنا 124 وقۋشى نيەت تانىتقان. بۇل قىزىعۋشىلىق تانىت­قانداردىڭ سانى ءوسىپ كەلە جاتقانىن بايقاتادى. سوندىقتان الداعى ءساۋىر ايىن­دا وتەتىن ءۇشىنشى ماۋسىمعا شامامەن 10 كوماندا كەلەدى دەپ شامالاپ وتىرمىز. بيىل جوبانىڭ شەكاراسى كەڭەيىپ، پاۆلودار، ەكىباستۇز، اقسۋ قالالارىنان وتىنىمدەر ءتۇسىپ جاتىر. دەمەۋشىلەردىڭ كومەگىمەن ويىنعا تىگىلەتىن جۇلدە قورىن دا ارتتىرۋدى ويعا الدىق. كەلەشەكتە باعىتتار سانىن ەسەلەۋ دە جوسپاردا تۇر. مىسال ءۇشىن بيىل جازدا تورايعىر اۋىلىندا وقۋشىلارىمىزدىڭ قاتىسۋىمەن ەتنواۋىل ۇيىمداستىرامىز. بوزبالا­لار مەن بويجەتكەندەرىمىز ۇلت­تىق دۇنيەلەرىمىزدەن سۋسىنداۋى ءۇشىن ۇلتتىق سپورت تۇرلەرىن دامىتۋدى جولعا قويىپ جاتىرمىز. سونىڭ ءبىرى جۋىقتا ۇيىمداستىرىلعان «مەكتەپ بارىسى» سا­يىسى، – دەپ اتاپ ءوتتى وقۋ ءىسىنىڭ مەڭگە­رۋشىسى قارلىعاش تونتاەۆا.

بىلتىر ءساۋىر ايىندا وتكەن العاش­قى ينتەللەكتۋالدى ويىندا 10-سىنىپ وقۋشىسى ءاسانالى تولەگەنوۆ جەڭىم­پاز اتانعان. ءبىلىمپاز جاس سايىس ناتي­جەسىندە توپپەن جۇمىس ىستەۋدىڭ پايداسىن ءتۇسىندىم، دەيدى. مەكتەپتە گەوگرافيا مەن ماتەماتيكا پاندەرىن ەرەك­شە ءسۇيىپ وقيدى ەكەن. ۇستازدارى جانات امانعازىقىزى مەن ناتاليا الەك­ساندروۆ­نانىڭ ۇستازدىق قىرلارىن ەرەكشە اتاپ ءوتتى.

پاۆلودار وبلىسى،

باياناۋىل اۋدانى،

مايقايىڭ كەنتى