دالا وسىنداي بولعاندا قالا مەن باسقا دا ەلدى مەكەندەردە شاقىرايعان كوكتەم كۇنى جۇقا قارلاردى ءجىبىتىپ, كوشەلەردە كۇندىز كولكىگەن سۋدى دا كورىپ قالاسىز. «تۇسكە دەيىن ءمۇيىز, تۇستەن كەيىن كيىز» دەمەكشى, كەشەگى ەرىگەن قار تۇسكە دەيىن قاتىپ, كوكتايعاق قىلىپ جاتادى, ال تۇستەن كەيىن قايتا ءجىبىپ, كۇننەن-كۇنگە قىزعان ساۋلە قاردى جەمىرىپ, اكەتىپ جاتىر.
جەكەمەنشىك ۇيلەردىڭ يەلەرىنە كۇرت ەرىگەن قاردان قارعىن سۋدىڭ استىندا قالماس ءۇشىن اۋلالارىنداعى قاردى كوشەگە شىعارۋ ماسەلەسى كوپتەن بەرى ايتىلىپ كەلەدى. كوممۋنالدىق قىزمەتتەردىڭ ايتۋىنا قاراعاندا بيىلعى كوكتەم باستالعالى 320 مىڭ توننا قار سىرتقا تاسىلىپتى. بۇل جۇمىستار اسىرەسە ۇيلەرىن قارعىن سۋ باسۋ قاۋپى باسىم قالانىڭ «جۇمىسشى كەنتى» اۋدانىندا قىزۋ جۇرگىزىلىپ جاتىر. سونىڭ ىشىندە «بلاگوۋسترويستۆو سەۆەر» جشس باستىعى انار بۇرحانوۆتىڭ ايتۋىنا قاراعاندا, 9 ناۋرىزدان بەرى كۇن سايىن 11 مىڭ تەكشە مەتر قار شىعارىلادى ەكەن. «بۇل ىسكە ازىرگە 110 ارناۋلى تەحنيكا جۇمىلدىرىلدى», دەيدى ول. بىراق بۇل اۋداننان باسقا شەتكەرى ايماقتارعا ءالى قار تاسۋ كەلە قويعان جوق.
قازىر توتەنشە جاعدايلار دەپارتامەنتى دالاداعى مول قاردىڭ شاعىن وزەندەردىڭ جاعالاۋىنداعى ەلدى مەكەندەرگە زاردابىن تيگىزبەۋ جايىن ويلاستىرۋدا. جازدى كۇندەرى كوزگە ىلىنبەي, كوبى قۇرعاپ قالاتىن وسى شاعىن وزەندەردىڭ دە زاردابى كەي كوكتەمدەرگە سويقان بولادى. ويتكەنى قارى جۇقا جەرلەردىڭ مۇزى تەز ەرىپ اعادى دا قالىڭ مۇزعا كەلگەندە سۋى كەپتەلىپ, اعىس تابا الماي اينالانىڭ بارىنە جايىلادى. سوندىقتان دەپارتامەنت قىزمەتكەرلەرى قالىڭ مۇزدى الدىن الا جارىپ, سۋدىڭ بوگەلمەي, اعىسپەن اعۋىن قامتاماسىز ەتۋگە تىرىسادى. وسى جۇمىسپەن اينالىساتىن «كوكشە-بۋر» جشس جۋىردا عانا قۋلىكول سەلوسىنىڭ ماڭىندا سىلەتى وزەنىنىڭ مۇزىن جارىلعىش زاتتارمەن بولشەكتەپ تاستادى. ۇزىن سانى ءتورت ۋچاسكەدە جاسالعان جارىلىس 1 مىڭ شارشى مەتر اۋماقتى قامتىدى. «بۇل دا – اپاتتى جاعدايدىڭ الدىن الۋعا ارنالعان جۇمىستار. وسى ادىسپەن سىرەسكەن قالىڭ مۇزدى تالقانداساق, اعىن سۋ بوگەلمەي, ءوزىنىڭ ارناسىمەن كەتە بەرەدى. وزەننىڭ سۋى ارناسىنان اسپايدى. ءسويتىپ, جاعالاۋداعى ەلدى مەكەندەردى سۋ باسۋ قاۋپىن ازايتامىز», دەيدى تج ەسكەرتۋ ءبولىمىنىڭ باستىعى ساكەن اعزاموۆ.
قۇتقارۋشىلار ەلدى مەكەن تۇرعىندارىنا جارىلىستىڭ ءمانىسىن الدىن الا ايتىپ, حابارلاندىرعان. ايتپەسە جاقىن ماڭنان شىققان گۇرسىلدىڭ قۋاتى وسال ەمەس, جۇرەگى وسال ادامدارعا زيان شەكتىرۋى ابدەن مۇمكىن. سونىمەن بىرگە جارىلىس بولماعان جەرلەردە دە مۇزدىڭ جارىلۋى بايقالۋى مۇمكىن. سوندىقتان بالىقشى قاۋىمعا دا الدىن الا ەسكەرتۋلەر جاسالعان.
سينوپتيكتەردىڭ حابارلاۋىنا قاراعاندا, بيىلعى كوكتەم جىلداعىدان 5-7 كۇنگە ەرتە شىعاتىن ءتۇرى بار. ناۋرىزدىڭ سوڭعى ونكۇندىگىندە اۋانىڭ تەمپەراتۋراسى كۇرت كوتەرىلۋى مۇمكىن.
سولتۇستىك قازاقستان وبلىستىق تجد باستىعى, پولكوۆنيك راميل كامالوۆ تە وسى كۇندەرى تىنىم تاپپاي سۋ باسۋ قاۋپى باسىم اۋدانداردى ارالاپ, تاسقىنعا قارسى توسقىن جۇمىستارىنىڭ ساپاسىن تىكەلەي ءوزى باقىلاۋعا الدى. جۋىردا ول ع.مۇسىرەپوۆ اۋدانىنا بارىپ, اۋدان اكىمى سەرىك مۇحامەديەۆتىڭ الدىندا بارلىق اۋىلدىق وكرۋگ اكىمدەرى, مەكەمە-ۇيىمدار وكىلدەرى مەن توتەنشە جاعداي قىزمەتكەرلەرى قاتىسقان كەڭەسكە قاتىستى. كەڭەستە كوكتەمگى تاسقىننىڭ قاۋىپسىز ءوتۋ ماسەلەلەرى تالقىلاندى. سونىمەن بىرگە قانداي شارالاردىڭ جاسالۋ كەرەكتىگى پىسىقتالدى. 2021-2022 جىلعى ماۋسىمدا بۇل اۋداندا قاتەرلى جاعداي بولماعان, الايدا ساقتىقتا قورلىق جوق ەكەندىگى ەسكەرتىلدى. سول كۇنى ر.كامالوۆ پەن اۋدان اكىمى س.مۇحاماديەۆ رۋزاەۆ, سيۆكوۆ, جانە چيستوپول اۋىلدارىنا بارىپ, شارىق, جەمباراق, اقان-بۇرلىق سياقتى شاعىن وزەندەردىڭ ارنالارىن, ونداعى قاردىڭ قالىڭدىعىن, قاۋپىن جانە وسى وزەندەردىڭ جاعاسىنداعى ەلدى مەكەندەردىڭ تاسقىننىڭ الدىن الۋعا ءتيىستى ينجەنەرلىك جابدىقتارىنىڭ جاي-كۇيىن باعالادى. سونىمەن بىرگە اۋدانداعى جەدەل ارەكەت ەتۋشى توپتىڭ دايىندىعى دا تەكسەرىلىپ, قۇتقارۋشىلاردىڭ ءوز مىندەتتەرىن ءبىلۋى سىنالدى.
سولتۇستىك قازاقستان وبلىسى
