وبلىستىق شتابتىڭ مالىمەتىنشە, ءبىر تاۋلىكتە قوبدا اۋدانىنىڭ قوبدا اۋىلىندا 51 ءۇي, دەنە-شىنىقتىرۋ ساۋىقتىرۋ ورتالىعى, كافە جانە تەحنيكالىق قىزمەت كورسەتۋ ورتالىعىن سۋ باستى. زارداپ شەككەندەر جوق. 91 ادام قاۋىپسىز جەرگە كوشىرىلدى.
اپاتتىق-قۇتقارۋ جۇمىستارىنا 128 ادام, 37 بىرلىك تەحنيكا, 9 بىرلىك سۋ سورعىلاۋ قۇرالدارى جۇمىلدىرىلدى. ماتەريالدىق قۇندىلىقتاردى ەۆاكۋاتسيالاۋ, ينەرتتى ماتەريالداردى تاسىمالداۋ, ۇيلەردىڭ ماڭىنا ينەرتتى ماتەريال جانە قاپشىقتاردى توسەۋ بويىنشا شارالار قابىلداندى. جەرگىلىكتى ۋاقىتپەن ساعات 20:45-تە قوبدا اۋدانىنىڭ اكىمى ب.قۇلوۆتىڭ 14.03.2023 جىلعى №1 شەشىمىمەن جەرگىلىكتى دەڭگەيدەگى توتەنشە جاعداي جاريالاندى.
جارىق اۋىلىنا كىرەر جولداعى ۇلكەن قوبدا وزەنىندەگى كوپىردىڭ تولىپ كەتۋى, وتەك اۋىلىنىڭ قاسىنداعى وتەكساي وزەنىندەگى كوپىردىڭ جانە قاناي اۋىلىنداعى اۋىلدىق جولدىڭ, ەگىندىبۇلاق اۋىلىنىڭ ىشىندە ورنالاسقان باپتاقتى وزەنىندەگى كوپىردىڭ شايىلۋىنا بايلانىستى 6 ەلدى مەكەن كولىك قاتىناسىنسىز قالدى (اقشاتاۋ اۋىلى - ويىل اۋدانى; سارىبۇلاق, جارىق, وتەك, قاناي, ەگىندىبۇلاق اۋىلدارى - قوبدا اۋدانى). تەمىر اۋدانىنىڭ باباتاي كەنتىندە ەرىگەن قار سۋى دەڭگەيىنىڭ كوتەرىلۋىنە بايلانىستى باباتاي اۋىلىنداعى تۇرعىن ۇيلەردى سۋ باسۋ قاۋپى تۋىندادى, سۋ باسۋدىڭ الدىن الۋ بويىنشا جەدەل شارالار قابىلداندى, جاعداي تۇراقتى.
جالپى وڭىردەگى سۋ تاسقىنىنا قارسى ءىس-شارالارعا 138 اسسەنيزاتور, 415 بىرلىك ارنايى تەحنيكا, 20 ءموبيلدى بريگادا, 474 ادام جۇمىلدىرىلدى. قازىرگى ۋاقىتتا اقتوبە قالاسى بويىنشا سۋ باسقان كوشەلەر جوق. ەرەكشە باقىلاۋداعى 4 ۋچاسكەدە ەرىگەن قار سۋىنىڭ جينالۋىنا قاراي مەرزىمدى سورعىلاۋ جۇزەگە اسىرىلادى.
