جارمەڭكەگە قاتىسۋعا قازاقستان وڭىرلەرىنەن 20-دان استام ءىرى جۇمىس بەرۋشى ءوتىنىم بەرگەن. ولاردىڭ اراسىندا ERG, Polymetal International plc كومپانيالار توبىنىڭ كاسىپورىندارى, «KAZ Minerals» جشس, «ەلەكتروۆوز قۇراستىرۋ زاۋىتى» جشس, «اك التىنالماس» اق جانە باسقالارى بار.
«جارمەڭكە بارىسىندا جۇمىس بەرۋشىلەر ءوز كومپانيالارىنىڭ ونلاين-تۇساۋكەسەرىن وتكىزەدى, قولدا بار بوس جۇمىس ورىندارىن ۇسىنادى جانە ەڭ قولايلى كانديداتتاردىڭ جەكە بازاسىن قالىپتاستىرادى. ءوتىنىش بەرۋشىلەر ءوز كەزەگىندە ۇيىمداردىڭ HR-مەنەدجەرلەرىمەن سويلەسە الادى, اڭگىمەلەسۋدەن ءوتىپ, ولارعا قىزىقتىرعان سۇراقتارىن قويا الادى», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي حابارلاماسىندا.
ءىس-شاراعا قاتىسۋ ءۇشىن Enbek.Tanda پورتالىنىڭ ارنايى بولىمىنە كىرىپ, جۇمىس ىزدەۋشىلەر مەن جۇمىس بەرۋشىلەر تۋرالى اقپاراتپەن تانىسۋ قاجەت. كەيىن جۇمىس ىزدەۋشىلەر قاجەتتى قولجەتىمدى بوس جۇمىس ورىندارىن تاڭداپ, ولارعا حابارلاسا الادى.
