كورمەنىڭ ماقساتى – كەلۋشىلەردى يسپان مادەنيەتىمەن تانىستىرىپ, سونداي-اق حوسە ماريا كانونىڭ كوركەمدىك شەبەرلىگىن كورسەتىپ جانە بولاشاق سۋرەتشىلەردىڭ ەنكاۋستيكا تەحنيكاسىنا دەگەن قىزىعۋشىلىعىن وياتۋ.
ءىس-شارانىڭ اشىلۋىندا قازاقستانداعى يسپانيا كورولدىگىنىڭ توتەنشە جانە وكىلەتتى ەلشىسى حورحە ۋربيولا لوپەس دە مونتەنەگرو اتالعان كورمەنىڭ ەكى ەلدىڭ مادەني دوستىعىن ودان ءارى جاقىنداتا تۇسەتىنىن جەتكىزدى.
– ونەر – حالىقتاردى جاقىنداستىرىپ, بىرىكتىرە تۇسەدى. حوسە ماريا كانو – تازا ونەردىڭ يەسى. ونىڭ شىعارماشىلىعىندا اي تاقىرىبى ەرەكشە ورىن العان. سۋرەتشى قازاق حالقىنىڭ تازالىعى مەن شىنايىلىعىن جوعارى باعالايدى. ءبىر جاعىنان, بۇل قاسيەت – ەكى حالىقتىڭ دوستىعىن نىعايتادى. بۇگىنگى شارا – سۋرەتشىنىڭ ەكىنشى رەت ءوتىپ وتىرعان كورمەسى جانە سوڭعىسى بولمايدى دەپ ۇمىتتەنەمىز, – دەدى ەلشى.
حوسە ماريا كانو – يسپان ەلىندەگى ايتۋلى سۋرەتشىلەردىڭ ءبىرى. ونىڭ شىعارماشىلىعىنىڭ وزگەشە قىرلارى تۋرالى حيۋگو ريفكيند ءوز ماقالاسىندا: «كانو ەڭبەكتەرى تەرەڭدىگىمەن, تازالىعىمەن دارالانىپ تۇرادى. سوندىقتان ول كارتينالارعا قاراعاندا مۇسىنگە كوبىرەك ۇقسايدى», دەپ جازىپتى.
كورمەدە كوپشىلىكتى سۋرەتشىنىڭ ەرەكشە جۇمىس ىستەۋ تەحنيكاسى تاڭعالدىردى. ماتەريالعا كۇيدىرىلگەن بالاۋىز بوياۋلارىمەن كەسكىندەۋ ءادىسى ەجەلگى مىسىردا كەڭىرەك قولدانىلعان. مىسىرلىق قولونەرشىلەردىڭ بالاۋىزدى قولدانۋى مۋميالاردى بوياعاندا قانشا ۋاقىت وتسە دە وزگەرمەيتىندىگىنەن تۋىنداپتى. وسى ماقساتتا بالاۋىز بوياۋعا قوسىلعان شايىر سەكىلدى ءرول اتقارعان. جازباشا دەرەكتەردە ەنكاۋستيكا تەحنيكاسى تۋرالى مالىمەتتىڭ ازدىعىنا قاراماستان, بۇگىنگە دەيىن وعان قىزىعۋشىلىق ازايعان ەمەس.
ايتا كەتەيىك, اتالعان كورمە 27 ناۋرىزعا دەيىن جالعاسادى.
