كسرو حالىق ءارتىسى, كسرو مەملەكەتتىك سىيلىعىنىڭ لاۋرەاتى مۇقان تولەباەۆ قازاق مۋزىكا ونەرىندە وشپەس ءىز قالدىردى. ونىڭ مۇراسى – قازاق كاسىبي مۋزىكاسىنىڭ بيىك شىڭى. كومپوزيتوردىڭ شىعارماشىلىق قورجىنىندا ءتۇرلى جانرداعى جۇزدەن اسا شىعارما بار: وپەرالار, سيمفونيالىق وركەسترگە ارنالعان ۋۆەرتيۋرالار مەن فانتازيالار, درامالىق سپەكتاكلدەر مەن فيلمدەرگە ارنالعان مۋزىكالار, رومانستار, اندەر, حور جانە فورتەپيانولىق شىعارمالار. بۇل تۋىندىلار مۋزىكا ءتىلىنىڭ شىنايىلىعىمەن, وزىندىك قولتاڭباسىمەن ەرەكشەلەنەدى. شىعارماشىلىق مول مۇرا قالدىرعان كومپوزيتوردىڭ رۋحىنا تاعزىم ەتۋ – ماەسترونىڭ مۋزىكا سالاسىنداعى ءىزباسارلارىنىڭ عانا ەمەس, ۇلتتىڭ دا ۇلكەن بورىشى سانالادى.
ە.راحماديەۆ اتىنداعى مەملەكەتتىك اكادەميالىق فيلارمونياسى سيمفونيالىق وركەسترىنىڭ كونتسەرتىندە «قازاقستان» سيمفونيالىق پوەماسى, «مەنىڭ قازاقستانىم», «باقىت ءۆالسى», «توس مەنى توس», «كەستەلى ورامال», «تولعاۋ», «مەرەكە بي», «توي» سيمفونيالىق كارتيناسى, ء«بىرجان سال» وپەراسىنان سارانىڭ ارياسى جانە باسقا دا تۋىندىلارى ورىندالادى. كەش سوليستەرى – حالىقارالىق بايقاۋلاردىڭ لاۋرەاتتارى شاحريزادا تىنىشتىق, قۋانىش ءبىلال, ساۋلەجان تاعزيا, المات ىزبامبەتوۆ, ايگەرىم امانجولوۆا, التىنبەك ارىستانبەك, تالعات اللابيرينوۆ, ازامات جىلتىرگوزوۆ. كەشتىڭ ديريجەرى سيمفونيالىق وركەستردىڭ كوركەمدىك جەتەكشىسى ءادىل بەستەمبەكوۆ بولدى.
