13 ناۋرىزدا قوبدا اۋدانىندا قاردىڭ قارقىندى ەرۋى جانە دالالىقتا ەرىگەن قار سۋى سالدارىنان قوبدا اۋىلىندا 15 ءۇي, 28 اۋلا اۋماعى, دەنەشىنىقتىرۋ-ساۋىقتىرۋ كەشەنىنىڭ عيماراتى, 1 كافە سۋ استىندا قالدى.
تۇرعىندار قاۋىپسىز جەرگە - ەۆاكۋاتسيالىق پۋنكتكە كوشىرىلدى. قازىرگى ۋاقىتتا ۇيلەردىڭ اۋلالارىن ارالاۋ جۇرگىزىلۋدە, قاپشىقتاردى توسەۋ بويىنشا شارالار قابىلدانۋدا. 6 مىڭ م3 استام ەرىگەن قار سۋى سورىلدى.
سۋ تاسقىنىنا قارسى ءىس-شارالارعا 35 بىرلىك تەحنيكا, 123 ادام جۇمىلدىرىلدى. قوبدا اۋدانى ەگىندىبۇلاق اۋىلىنا دا ەرىگەن قار سۋى كىردى. تۇرعىن ۇيلەر مەن جەكە قوسالقى شارۋاشىلىقتارعا قاۋىپ جوق.
سۋ تاسقىنى كەزەڭى باستالعاننان بەرى اقتوبە قالاسى مەن اۋدانداردان 1 514 ءوتىنىم قابىلدانىپ, بارلىعى پىسىقتالدى. بۇگىنگى تاڭدا وبلىس بويىنشا بارلىعى 181 مىڭ م3 استام ەرىگەن قار سۋى سورىلدى. 26,1 شاقىرىم ارىق تازارتىلدى, 4 972 م3 ينەرتتى ماتەريال اكەلىندى, 3 320 دانا قاپ توسەلدى, ەلدى مەكەندەردەن 524,9 مىڭ م3 استام قار شىعارىلدى. قوسىمشا 138 اسسەنيزاتور تارتىلدى.
جەرگىلىكتى جەرلەردە 142 بىرلىك تەحنيكا, 20 ءموبيلدى بريگادا جۇمىس ىستەيدى, 650 ادام جۇمىستارعا جۇمىلدىرىلدى. قازىرگى ۋاقىتتا اقتوبە قالاسى بويىنشا سۋ باسقان كوشەلەر جوق. باقىلاۋعا الىنعان 4 ۋچاسكەدە ەرىگەن قار سۋىنىڭ تۇسۋىنە قاراي مەرزىمدى جۇمىستار جۇزەگە اسىرىلادى.
