قاۋلىنى تالقىلاۋ مەرزىمى ناۋرىزدىڭ 24-ىنە دەيىن. وندا تەحنيكالىق پاسپورتى جوق كولىك قۇرالىن ەلگە الىپ كەلگەن جەكە تۇلعانىڭ وندىرۋشىلەردىڭ (يمپورتتاۋشىلاردىڭ) كەڭەيتىلگەن مىندەتتەمەسىنەن بوساتىلاتىنى ايتىلعان. قازىرگى ۋاقىتتا شەتەلدىك كولىكتى زاڭداستىرۋ ءۇشىن جەكە باسىن كۋالاندىراتىن قۇجات, اۆتوكولىكتىڭ پاسپورتى نەمەسە ونى تىركەۋ تۋرالى كۋالىك, سونداي-اق مەنشىك قۇقىعىن راستايتىن قۇجات تالاپ ەتىلەدى. ال جاڭا وزگەرىس بويىنشا تەك كولىك پەن تىركەۋ تۋرالى كۋالىكتى عانا قابىلداۋ (بولعان جاعدايدا) قاراستىرىلىپ وتىر.
بۇل تىركەۋ قۇجاتتارى جوعالعان جاعدايدا اۆتوكولىكتى زاڭداستىرۋ پروتسەدۋراسىن جەڭىلدەتۋ ءۇشىن قاجەت.
سونىمەن قاتار اۆتورلار «كونسترۋكتورلىق» دەپ اتالاتىن ماشينالارعا جانە قوسالقى بولشەكتەر دەپ اكەلىنەتىن تەحنيكاعا قاتىستى وزگەرىستەر دايىنداعان. كولىك قۇرالىنىڭ كەدەندىك رەسىمدەۋدەن وتكەنى تۋرالى مالىمەتتەر بولماعان جانە ول ىزدەلمەگەن جاعدايدا باستاپقى مەملەكەتتىك تىركەۋ ءۇشىن الىم مولشەرلەمەسىن قولدانۋعا مۇمكىندىك بەرىلەدى. ونداي كولىكتەر تەك قازاقستان اۋماعىندا عانا پايدالانۋعا بەرىلەتىنى جانە ولاردىڭ مەنشىك يەسىنىڭ وزگەرۋىنە جول بەرىلمەيتىنى باسا ايتىلدى. مۇنداي كولىك قۇرالىنىڭ تىركەۋ كۋالىگىندە ءتيىستى جازبا بولادى.
ەسكە سالايىق, ەلىمىزدە شەتەلدىك تىركەۋدەگى كولىكتەردى زاڭداستىرۋ بيىل 23 قاڭتاردا باستالدى. زاڭداستىرىلاتىن اۆتوكولىكتەر ىزدەۋدە جوق, باسقا مەملەكەتتە بۇرىنعى تىركەلگەن جەرى بويىنشا مەملەكەتتىك ەسەپتەن شىعارىلعان, كەدەندىك تازارتۋدان وتكەن بولۋعا ءتيىس (بۇل تالاپ الىنىپ تاستالۋى مۇمكىن).
كولىكتى زاڭداستىرۋ تۋرالى ءوتىنىش قابىلدانعاننان كەيىن كولىك يەسى باستاپقى تىركەۋ الىمى رەتىندە 200 000 تەڭگە, تەحپاسپورت ءۇشىن مەملەكەتتىك باج سالىعىن – 4313 تەڭگە, مەملەكەتتىك ءنومىر ءۇشىن باج سالىعىن – 9660 تەڭگە تولەيدى. تىركەلەتىن ماشينا ءۇشىن ۋتيل الىمىن تولەۋدىڭ قاجەتى جوق. ەەو ەلدەرىنەن كەلگەن كولىكتى كەدەندىك تازارتۋدان وتكىزەدى, ال قىرعىزستاندىق تەحنيكانى كەدەندىك سالىق ايىرماسىن تولەگەننەن كەيىن عانا ءبىزدىڭ ەلدە تىركەۋگە بولادى. ونىڭ سوماسىن كەز كەلگەن مامانداندىرىلعان حقكو-داعى مەملەكەتتىك تىركەۋ كوميتەتىنىڭ مامانى ەسەپتەپ بەرەدى.
سونداي-اق كولىكتى قاشىقتان ەسەپتەن شىعارۋ مۇمكىن ەمەس. بۇل تۋرالى ءبىراز ۋاقىت بۇرىن اكىمشىلىك پوليتسيا كوميتەتى باسشىسىنىڭ مىندەتىن اتقارۋشى قايسار سۇلتانباەۆ ايتقان بولاتىن. ونىڭ سوزىنشە, قىرعىزستان مەن ارمەنيانىڭ رەسمي ورگاندارى اۆتوكولىكتى قاشىقتان ەسەپتەن شىعارۋدان باس تارتقان.
ىشكى ىستەر مينيسترلىگى شەتەلدىك ءاۆتوموبيلدىڭ ەل اۋماعىنا قاشان كىرگەنىن شەكاراشىلار مەن كەدەن قىزمەتىنىڭ بازاسىنان بىلەتىنىن اتاپ ءوتتى. دەرەكتەر بازاسىندا ماشينا ءنومىرى مەن VIN-كودى ساقتالادى. بۇل ۇدەرىس تولىقتاي اۆتوماتتى جۇمىس ىستەيدى. اۆتوكولىك كەلگەن ۋاقىت تۋرالى ناقتى مالىمەت بولماسا, مىندەتتى ساقتاندىرۋ ءپوليسى رەسىمدەلگەن ۋاقىت قارالادى.
زاڭداستىرۋ ۇدەرىس اياقتالعان سوڭ اۆتوموبيل جەرگىلىكتى ءنومىر تاعادى, مۇنداي ماشينانى يەسى ەش كەدەرگىسىز پايدالانا الادى.
اۆتوكولىك زاڭداستىرۋ 2023 جىلعى 1 شىلدەگە دەيىن جالعاسادى.
