دەي تۇرعانمەن, توتەنشە جاعداي قىزمەتىنىڭ ماماندارى وبلىستىڭ كوپ بولىگىندە توڭ بولىپ قاتقان توپىراقتىڭ جىپسىمەي تۇرعانىن, كەي جەرلەردە ءتىپتى 2 مەترگە دەيىن جەتەتىنىن حابارلادى. ەگەر شەكارالاس ايماقتارداعى وزەن-كولدەر ارقىلى مول سۋ اعىپ كەلەتىن بولسا, جايىلعان قارعىن سۋ توپىراققا سىڭۋگە ۇلگەرمەي قالۋى مۇمكىن. سوندىقتان ەلدى مەكەندەر اينالاسىنداعى توپىراق ۇيىندىلەرى مەن بوگەتتەردى نىعايتۋ شارالارى ءجۇرىپ جاتىر. جەدەل جوسپار بەكىتىلىپ, سۋ تاسقىنىنا قارسى وبلىستىق شتاب قۇرىلدى. ىقتيمال جاعدايلارعا 105 توننا جانار-جاعارماي, 34 مىڭنان استام قۇم تولتىرىلعان قاپ, 10 مىڭ توننا ينەرتتى ماتەريالدار ازىرلەنىپ قويدى. توتەنشە وقيعا تۋا قالسا, ارنايى قىزمەتتەر بىردەن ادامداردى قۇتقارۋ, سۋ جىرۋ جۇمىستارىنا كىرىسىپ كەتۋگە دايىن.
پاۆلودار وبلىسى توتەنشە جاعدايلار دەپارتامەنتى باستىعىنىڭ ورىنباسارى ولەگ ترەششەۆتىڭ سوزىنشە, ەلدى مەكەندەردە قار شىعارۋ جۇمىستارى جالعاسۋدا. بارلىعى 1,13 ملن تەكشە مەتر قار اۋلاققا تاسىلعان. سىلەتى وزەنىنىڭ بويىندا مۇزداردىڭ كوكتەمگى كەپتەلىسىن بولدىرماۋ ءۇشىن مۇزدى ارالاپ كەسىپ, اعىزۋ شارالارى اتقارىلدى. مۇزدى جارعاننان گورى, وسىلاي جۇرگىزۋ ەكونوميكالىق تۇرعىدان ارزان ءارى ءتيىمدى ەكەن.
قازىرگى كۇنى 43 ەلدى مەكەن مامانداردىڭ ايرىقشا باقىلاۋىندا. باياناۋىل مەن اقتوعاي اۋداندارىنىڭ اۋىلدارى, اقسۋ قالاسى جىلداعىداي قاۋىپتى اۋماقتارعا ەنگەن. كەنجەكول اۋىلى مەن لەنين كەنتى, اقسۋ قالاسى مەن اقسۋ كەنتى, پاۆلودار اۋدانىنداعى گوسپلەمستانسا ەلدى مەكەنى, باياناۋىلداعى ساتباەۆ پەن مۇسا شورمان, اقتوعايداعى شولاقسور اۋىلدارىندا, اققۋلى اۋدانى ورتالىعىندا قاۋىپ تۋىنداۋى ىقتيمال.
ءوڭىر بويىنشا اۆتوجولدار مەن تەمىرجولداردا 1472 سۋ وتكىزەتىن قۇبىر بار. «قازاۆتوجول» اق-نىڭ ايماقتاعى فيليالى مەن جەرگىلىكتى اتقارۋشى ورگانداردىڭ مالىمەتتەرىنە سۇيەنسەك, قازىرگە دەيىن اتالعان سۋ وتكىزگىشتەردىڭ 74 پايىزى تازارتىلعان.
وبلىس توتەنشە جاعدايدىڭ الدىن الۋ جانە قارعىن سۋدان كەلەتىن زالالدى جويۋ شارالارىنا جالپى سوماسى 1,7 ملرد تەڭگە قاراجات قاراستىرىپ وتىر. توتەنشەلىكتەر ايماقتا قاردىڭ از بولۋىنا بايلانىستى كوكتەمگى سۋ تاسقىنى اسا قاۋىپ توندىرە قويمايدى دەيدى. جۇرت قاراعاندى ارقىلى اعىپ كەلەتىن اششىسۋ وزەنى مەن اقتوعايداعى سىلەتى وزەندەرىنە ساي-سالادان سۋ كوپ جينالماسا ەكەن دەپ تىلەپ وتىر. نەگىزگى قاۋىپتى كەزەڭ ناۋرىز ايىنىڭ ەكىنشى جارتىسى مەن ءساۋىر ايىنىڭ العاشقى ونكۇندىگىنە ءتۇسىپ تۇر.
پاۆلودار وبلىسى
