شورت-ترەكتەن الەم چەمپيوناتى 1976 جىلدان بەرى ۇزدىكسىز ۇيىمداستىرىلىپ كەلەدى. سول كەزدەن بەرى ءدۇبىرلى دودانىڭ جالاۋى 46 مارتە جەلبىرەدى. بۇل باسەكەلەردە 10 جۇلدە جيىنتىعى ساراپقا سالىنىپ ءجۇر. اتاپ ايتساق, ەرلەر مەن ايەلدەر 500, 1 000, 1 500 مەترلىك قاشىقتىق پەن كوپسا- يىستا باق سىنايدى. ودان بولەك, قىزدار 3 000 مەترلىك جانە جىگىتتەر 5 000 مەترلىك ەستافەتادا ونەر كورسەتەدى.
1976-2022 جىلدار ارالىعىندا وتكەن الەم چەمپيوناتتارىندا ەڭ كوپ ولجاعا كەنەلگەن كوماندا – وڭتۇستىك كورەيا قۇراماسى. وسى سپورت ءتۇرىن ويلاپ تاپقان ولار 221 (90 التىن+68 كۇمىس+63 قولا) جۇلدەنى ولجالادى. ەكىنشى جانە ءۇشىنشى ورىنداردا – قىتاي (64+43+40) مەن كانادا (61+73+61). ۇزدىك بەستىكتى اقش (16+16+30) پەن جاپونيا (13+19+21) تۇيىندەپ تۇر. سونداي-اق جەڭىس تۇعىرىنا كوتەرىلگەندەر قاتارىندا نيدەرلاند (9+13+9), ۇلىبريتانيا (7+10+9), يتاليا (5+13+20), رەسەي (3+2+1), اۋستراليا (2+5+3), ماجارستان (1+5+3), بولگاريا (1+2+6), جاڭا زەلانديا (1+1+0), گەرمانيا (0+1+1), كسرو (0+1+0) جانە فرانتسيا مەن بەلگيا (0+0+4) بار. مىنە, تورتكۇل دۇنيەنىڭ ۇزدىكتەرى جينالعان جارىستا بار-جوعى وسى 17 مەملەكەتتىڭ وكىلدەرى عانا جەڭىس تۇعىرىنا كوتەرىلگەن ەكەن.
جەكەلەگەن سپورتشىلار اراسىنان يان ياندى (ا) بولە-جارا اتاپ وتۋگە بولادى. قىتايدىڭ ماقتانىشى 1994-2005 جىلدار ارالىعىندا ۇيىمداستىرىلعان دۇنيەجۇزىلىك دودالاردا 45 (30+11+4) جۇلدە الدى. كانادالىق سيلۆي دەگل (28+9+2) مەن ناتالي لامبەردىڭ (22+9+6) تابىستارىنا دا تامسانباۋ مۇمكىن ەمەس. وڭتۇستىك كورەيانىڭ نامىسىن قورعاپ, كەيىننەن رەسەيگە قونىس اۋدارعان ۆيكتور ان 36 رەت (21+11+4) جەڭىس تۇعىرىنان قول بۇلعادى. بۇل – ەرلەر اراسىنداعى ەڭ ۇزدىك كورسەتكىش. ۇزدىك بەستىكتىڭ قاتارىنا اسپاناستى ەلىنىڭ تاعى ءبىر وكىلى ۆان مەي ەنىپ وتىر. ول دا 36 (20+13+3) مەدالگە يەلىك ەتتى.
بىلتىر كانادانىڭ مونرەال قالاسىندا شىمىلدىعى تۇرىلگەن الەم چەمپيوناتىندا دا وڭتۇستىك كورەيا قۇراماسى وزدى. ولار 9 (5+1+3) جۇلدە ولجالادى. ماجارستان (4+0+0) ەكىنشى ورىنعا تۇراقتاسا, نيدەرلاند (1+1+4) ءۇشىنشى ساتىعا جايعاستى. جارىس قوجايىندارى سەگىز جۇلدە (0+7+1) العانىمەن, التىن مەدال جوقتىعىنان ءتورتىنشى ورىندا قالىپ قويدى. بەسىنشى جانە التىنشى ساتىلارعا فرانتسيا (0+1+0) مەن بەلگيا (0+0+2) تابان تىرەدى. ۇيەڭكى جاپىراقتار ەلىندەگى جارىستا ماجارستاندىق شاوانگ ليۋ مەن كورەيالىق چحۆە مين دجون جاسىنداي جارقىلدادى. 24 جاستاعى ساڭلاقتىڭ ارقايسىسى ءتورت-ءتورت التىننان يەلەندى.
كۇنى كەشە سەۋلدە اياقتالعان الەمدىك دودادا قازاقستان قۇراماسى ساپىندا ولگا تيحونوۆا, يانا حان, ءمادينا جانبوسىنوۆا, الينا اجىعاليەۆا, ماليكا ەرمەك, ءادىل عالياحمەتوۆ, دەنيس نيكيشا, ابزال اجىعاليەۆ, نۇرتىلەك قاجىعالي, ەركەبۇلان شامۇحانوۆ جانە انتون حۆان سىندى شورت-ترەكشىلەر ونەر كورسەتتى. بۇل سپورتشىلاردىڭ ءبىرازىنىڭ ەسىمى جانكۇيەرلەرگە جاقسى تانىس. ماسەلەن, ابزال بىلتىر بەيجىڭدە الاۋى تۇتانعان وليمپيا ويىندارىنىڭ اشىلۋ سالتاناتىندا قازاق ەلىنىڭ كوك بايراعىن ۇستاپ شىقتى. 500 مەترلىك سايىستا ول جەڭىس تۇعىرىنا سىنىق سۇيەم عانا جەتپەي, ءتورتىنشى ورىندى قاناعات تۇتتى. قۇرامىندا ءادىل عالياحمەتوۆ, ولگا تيحونوۆا, يانا حان, دەنيس نيكيشا جانە ابزال اجىعاليەۆ سىندى ۇل-قىزدارى بار جەرلەستەرىمىز اتالعان جارىستىڭ ارالاس ەستافەتاسىندا بەسىنشى ورىن الدى. ولار الەم چەمپيوناتتارىندا جۇلدەگە قول جەتكىزە الماسا دا, كوڭىل كونشىتەرلىكتەي ناتيجە كورسەتىپ ءجۇر. سونىمەن قاتار بۇل سپورتشىلار الەم كۋبوگىنىڭ كەزەڭدىك سايىستارىندا دا جۇلدەدەن قۇرالاقان قالعان ەمەس. ءار جىلدارى وتانداستارىمىزدىڭ مويىندارىندا ءتۇرلى-ءتۇستى مەدالدار جارقىرادى.
جاقىندا سەۋلدە اياقتالعان الەم چەمپيوناتىندا سول ولقىلىقتىڭ ورنى تولىپ, جەرلەستەرىمىز وزدەرىنىڭ جارقىن جەڭىسىمەن ءوز جانكۇيەرلەرىن قۋانتادى دەپ ۇمىتتەندىك. وكىنىشكە قاراي, ولاي بولمادى. قازاقستاننىڭ شورت-ترەك شەبەرلەرى اراسىنان تەك دەنيس نيكيشانىڭ عانا جەڭىس تۇعىرىنا كوتەرىلۋگە تاماشا مۇمكىندىگى بولدى. 27 جاستاعى قوستاناي وبلىسىنىڭ تۇلەگى 500 مەترلىك سايىستا فينالعا شىققانىمەن, قورىتىندى ەسەپتە ءتورتىنشى ورىندى قاناعات تۇتتى. ول الەم چەمپيوناتىندا ءۇش رەت قولا مەدال يەلەنىپ, وليمپيا ويىندارىنىڭ ەكى دۇركىن جۇلدەگەرى اتانعان يتاليالىق پەترو سيگەل, بەيجىڭ وليمپياداسىندا جۇلدەلەردىڭ تولىق جيىنتىعىن جەڭىپ العان كانادالىق ستيۆەن ديۋبۋا جانە الەم مەن ەۋروپا چەمپيونى نيدەرلاندتىق يەنس ۆان’ت ۆوۋتتان قالىپ قويدى. وزگە وتانداستارىمىز جۇلدەلى ورىندار ءۇشىن تالاسا المادى.
اتالعان جارىستىڭ جالپىكوماندالىق ەسەبىندە نيدەرلاندتىڭ شورت-ترەكشىلەرى شاشالارىنا شاڭ جۇقتىرمادى. قىزعالداقتار ەلىنىڭ وكىلدەرى 5 التىن, 1 كۇمىس جانە 2 قولانى ولجالادى. قورجىنىندا 2 التىن, 3 كۇمىس جانە 1 قولاسى بار وڭتۇستىك كورەيا قۇراماسى ەكىنشى ورىندى يەلەنسە, 1 التىن, 2 كۇمىس جانە 2 قولانى ەنشىلەگەن يتاليانىڭ سپورتشىلارى ءۇشىنشى ساتىعا جايعاستى. جەكەلەگەن سپورتشىلار اراسىنان كساندرا ۆەلزەبۋردىڭ اسقان شەبەرلىگىنە ءتانتى بولدىق. 2021 جىلى دوردرەحت پەن 2022 جىلى مونرەالداعى الەم چەمپيوناتتارىندا ءبىر-ءبىر التىننان العان ول سەۋلدە ءۇش مارتە ءوز ەلىنىڭ ءانۇرانىن شىرقاتتى. سونداي-اق 21 جاستاعى نيدەرلاندتىق بۇرىمدىنىڭ وليمپيا ويىندارىنىڭ جەڭىمپازى دەگەن اتاعى تاعى بار.
