كەڭەس وداعى ىدىراعاننان كەيىن قازاقستاندا قۋاتى بويىنشا الەمنىڭ 4-يادرولىق قورى قالعان ەدى. كەزىندە بايتاق تەرريتوريادا ەمبى, سارىشاعان (پريوزيورسك), بايقوڭىر, سەمەي پوليگونى سياقتى كسرو-داعى ءىرى سىناق, كوسموستىق جانە يادرولىق پوليگوندارى ورنالاستى. الايدا ەلىمىز 1993 جىلى كەڭەستىك اسكەري ارسەنالدان مۇرا بولىپ قالعان الەمدەگى 4-يادرولىق الەۋەتتەن ءوز ەركىمەن باس تارتتى. مالىمەتتەرگە سۇيەنسەك, بۇل جەر شارىنىڭ كەز كەلگەن نۇكتەسىنە جەتەتىن 1200 يادرولىق وقتۇمسىعى بار 110-نان استام بالليستيكالىق راكەتانى قۇرايدى. ەلىمىز اقش-پەن, رەسەيمەن بىرلەسىپ وقتۇمسىقتار مەن جارىلعىشتاردى زالالسىزداندىرعان.
1991 جىلى سەمەي اتوم پوليگونى جابىلدى. وسىدان كەيىن يادرولىق قارۋدى تاراتپاۋدىڭ جانە قارۋسىزدانۋدىڭ جاھاندىق ۇدەرىسىنىڭ جاڭا كەزەڭى باستالدى. بۇۇ-نىڭ شەشىمىمەن يادرولىق سىناقتاردى تىيۋ تۋرالى كەلىسىمگە قول قويۋعا جول اشىلدى. وعان قازاقستان ەڭ العاشقىلاردىڭ ءبىرى بولىپ قول قويدى. ەل اۋماعىندا اتموسفەرالىق, جەرۇستىلىك جانە جەراستى اسكەري جانە «بەيبىتشىلىك ماقساتىندا» دەلىنگەن بارلىعى 500-دەي سىناق وتكىزىلدى. بۇل يادرولىق قارۋ پايدا بولعاننان بەرى الەمدە جۇزەگە اسىرىلعان بارلىق سىناقتىڭ تەڭ جارتىسى ەدى. رادياتسيا سالدارىنان اينالاداعى تىرشىلىك اتاۋلى بىرتە-بىرتە جويىلدى, وزەن, كولدەر ۋلاندى. ەڭ سوراقىسى, پوليگون ماڭىندا تۇراتىن ءبىر جارىم ميلليوننان استام ادامنىڭ تاعدىرى تالكەككە سالىنىپ, ولار دەنساۋلىعىنان ايىرىلدى.
وسىنىڭ ەسەسىن قايتارۋ ءۇشىن قازاقستان 1992 جىلى 22 مامىردا اتومدىق قارۋدان باس تارتىپ, ليسسابون حاتتاماسىنا قول قويدى. ال 1993 جىلى 13 جەلتوقساندا قازاقستان رەسپۋبليكاسىنىڭ جوعارعى كەڭەسى «يادرولىق قارۋدى تاراتپاۋ كەلىسىمىنە قوسىلۋ تۋرالى» قاۋلى قابىلدادى.
1994 جىلى قازاقستاننىڭ يادرولىق قارۋدى تاراتپاۋ كەلىسىمىنە قوسىلۋىنا بايلانىستى قازاقستان, رەسەي, ۇلىبريتانيا مەن اقش قازاقستاننىڭ قاۋىپسىزدىك كەپىلدەرى تۋرالى مەموراندۋمعا قول قويدى. بۇل كەپىلدىكتەرگە كەيىن قىتاي مەن فرانتسيا دا قوسىلدى. سونداي-اق وسى جىلى قازاقستان ۆ.مەتتا ارقىلى اقش-قا 24 يادرولىق بومبانىڭ (90 پايىز, 600 كيلو) ۋرانىن ساتتى. بۇل ۋران سۋاستى يادرولىق وتىن ءۇشىن جينالعان ەدى.
1995 جىلدىڭ ساۋىرىندە قازاقستان بارلىق يادرولىق قارۋدى رەسەي اۋماعىنا شىعاردى. ال 27 مامىردا بۇرىنعى سەمەي يادرولىق پوليگونىنىڭ ۇڭعىماسىندا سوڭعى يادرولىق زارياد جويىلدى. وسىلايشا, ەلدەگى يادرولىق قارۋ ماسەلەسىنە نۇكتە قويىلدى. 1996 جىلى قازاقستاننان رەسەيگە ستراتەگيالىق بومبالاۋشى ۇشاقتار شىعارىلدى. وسى جىلدىڭ 30 قىركۇيەگىندە قازاقستان جالپىعا بىردەي يادرولىق سىناقتارعا تىيىم سالۋ تۋرالى كەلىسىمگە قول قويدى. 2000 جىلى بۇرىنعى سەمەي يادرولىق سىناق پوليگونىندا سوڭعى يادرولىق سىناقتارعا ارنالعان ۇڭعىما جويىلدى.
2009 جىلدىڭ 2 جەلتوقسانىندا بىرىككەن ۇلتتار ۇيىمىنىڭ باس اسسامبلەياسى 29 تامىزدى يادرولىق سىناقتارعا قارسى ءىس-قيمىلدىڭ حالىقارالىق كۇنى رەتىندە جاريا ەتتى. بۇل حالىقارالىق كۇندى بەلگىلەۋ تۋرالى ۇسىنىستى قازاق ەلى جاساعان ەدى.
2014 جىلدىڭ ناۋرىزىندا گااگادا وتكەن يادرولىق قاۋىپسىزدىك جونىندەگى ءۇشىنشى سامميتتە قازاقستان اۋماعىندا تومەن بايىتىلعان ۋران بانكىن قۇرۋ تۋرالى شەشىم قابىلداندى. 2015 جىلدىڭ 27 تامىزىندا قازاقستاندا تومەن بايىتىلعان ۋران بانكىن قۇرۋ تۋرالى كەلىسىمگە قول قويىلدى.
جالپى, ەلىمىزدىڭ يادرولىق قارۋدى تاراتپاۋ ءىس-شارالارىنا بەلسەندى اتسالىسىپ, يادرولىق قاۋىپسىزدىكتى قامتاماسىز ەتۋدەگى ەلەۋلى ۇلەسى əلەمدىك قاۋىمداستىققا ۇلگى بولىپ قالا بەرمەك. وتانىمىز بەيبىت بولاشاق پەن يادرولىق قارۋسىز əلەمدى قۇرۋ جولىن تاڭدادى. دۇنيەجۇزىلىك قاۋىمداستىقتىڭ بارلىعى دەرلىك قازاقستاننىڭ يادرولىق قاۋىپسىزدىك سالاسىنداعى تاراتپاۋ رەجىمىنە قوسقان ۇلەسىن مويىندادى. ال ساراپشىلاردىڭ ايتۋىنشا, يادرولىق قاۋىپسىزدىكتى قامتاماسىز ەتۋ – مەملەكەتتەگى قولايلى ساياسي ورتانى قالىپتاستىرۋ ءۇشىن جاسالعان قادام, سول سەبەپتى قازاقستاننىڭ بۇل جەردەگى ءرولىن جوعارى دەپ اتاۋعا بولادى.
