اۋەلى پارلامەنتتە باستالعان قارسىلىق تبيليسي ورتالىعىنداعى نارازىلىق اكتسياسىنا ۇلاستى. وسىلايشا, ءىس ۋشىعىپ, ەكى كۇنگە جالعاسقان سوڭ, ەلدىڭ بيلەۋشى پارتياسى زاڭ جوباسىن كۇن تارتىبىنەن الىپ تاستاۋعا ءماجبۇر بولدى. گرۋزيا پارلامەنتى شەتەلدىك اگەنتتەر تۋرالى زاڭ جوباسىن ءبىرىنشى وقىلىمدا ماقۇلداعان ەدى. ويتكەنى ونداعى 150 دەپۋتاتتىڭ 76-سى قولداپ, 13-ءى قارسى بولعان, 61 دەپۋتات قالىس قالعان. قابىلدانۋعا ءسال قالعان زاڭ شەتەلدەن قارجى الاتىن جەكە جانە زاڭدى تۇلعالاردى ارناۋلى رەەسترگە تىركەلۋدى مىندەتتەيدى. ولاي بولماعان جاعدايدا ءىرى كولەمدە ايىپپۇل سالىنۋى نەمەسە بەس جىلعا دەيىن تۇرمەگە قامالۋى مۇمكىن ەدى. الايدا «گرۋزين ارمانى – دەموكراتيالىق گرۋزيا» بيلەۋشى پارتياسى تبيليسيدەگى جاپپاي نارازىلىقتان كەيىن پارلامەنتتەن اتالعان زاڭ جوباسىن الىپ تاستاۋ تۋرالى شەشىم قابىلدادى.
«قوعامنىڭ ءاربىر مۇشەسىنىڭ الدىندا جاۋاپتى باسقارۋشى كۇش رەتىندە ءبىز ءوزىمىز قولداعان شەتەل اگەنتتەرى تۋرالى زاڭ جوباسىن ەشقانداي العىشارتسىز كەرى قايتارىپ الۋ جونىندە شەشىم قابىلدادىق», دەلىنگەن پارتيا سايتىندا جاريالانعان مالىمدەمەدە.
ويتكەنى وسىعان بايلانىستى تبيليسي ورتالىعىندا ەكى كۇن بويى نارازىلىق اكتسياسى ءوتىپ, نارازىلىق بىلدىرۋشىلەردىڭ ءبىر بولىگى پارلامەنت عيماراتىن قورشاي باستاعان. جاعداي ۋشىققان سوڭ قالا ورتالىعىنا ارنايى جاساق تارتىلعان. گرۋزين اقپارات قۇرالدارىنىڭ حابارلاۋىنشا, ەرەۋىلشىلەردىڭ كوبى گاز, ءتۇتىن جانە توبەلەستەن زارداپ شەككەن. كەيبىرى قاماۋعا الىنعان. ءتۇن ورتاسىنان كەيىن ارنايى كۇشتەر رۋستاۆەلي داڭعىلىنداعى اكتسيانى تاراتىپ, پارلامەنتكە قاراما-قارسى اۋماقتى تولىعىمەن تازارتتى.
گرۋزيا بيلىگى بولسا, نارازىلىق كۇش كورسەتۋ سيپاتىنا يە بولدى دەپ مالىمدەدى. ال اقش-تىڭ تبيليسيدەگى ەلشىلىگى ماقۇلدانعان زاڭ جوباسى مەن شەرۋگە شىققاندارعا كۇش قولدانىلعانىن «گرۋزين دەموكراتياسىنا تۇسكەن داق» دەپ اتاپ, باعا بەرگەن.
«مۇنداي زاڭنىڭ ماقۇلدانعانى گرۋزيانىڭ ستراتەگيالىق سەرىكتەستەرىمەن قاتىناسىنا زيان كەلتىرەدى جانە ءوز ەلىنىڭ ازاماتتارىنا كومەكتەسىپ جۇرگەن ۇيىمداردىڭ جۇمىسىن قيىنداتا تۇسەدى. زاڭ جوباسى مەن ونىڭ وتە بەلسەندى تالقىلانعانى بيلىك پارتياسىنىڭ ەۋرواتلانتيكا ينتەگراتسياسىنا دايىن ەكەنىنە كۇمان كەلتىرەدى», دەپ مالىمدەدى اقش ەلشىلىگى.
