تۇلا بويىنا تۋا بىتكەن ەرەكشە ونەرىن كەرەكۋ جۇرتىنا پاش ەتكەن كۇيشى بۇل كۇنى ۇلكەن تەبىرەنىسپەن بىرنەشە كۇيدى ەرەكشە مانەردە ورىندادى. سونىڭ ءبىرى – وقاپ قابيعوجيننىڭ «اداسقاق» كۇيى.
بۇل تۋىندى – كوڭىل كۇيدىڭ, ءومىر بۇلقىنىسىنىڭ كۇيى. بىردەن شىمىر, توگىلتىپ باستالاتىن دومبىرا سازى كوككە ورلەپ, بىردە ورنىندا قۇيقىلجىپ, ەندى ءبىر مەزەتتە قۇيىندى ساتتەرگە سىلتەيدى. كۇيشىنىڭ بۋناقتاعى شەبەر ساۋساقتارى بىرتىندەپ تومەن تارتا باستاپ ەدى, ءوزىن ىشتەن جازعىرعان, وتكەننەن ساباق العان قاسىرەتتى جاننىڭ كۇرسىنىسى دە قۇلاققا جەتكەندەي بولدى. «اداسقاق» داۋىلداتىپ بارىپ اياقتالاتىن كۇي ەكەن. بۇل كۇي اۆتورىنىڭ ىشكى تەبىرەنىسى, الداعى قۋانىشتى كۇندەرگە دەگەن سەنىمىنىڭ سەرگەكتىگى دەپ ۇعىندىق.
تۇرار الىپباەۆتىڭ ايتۋىنشا, 1934 جىلى ايگىلى كومپوزيتور, ديريجەر احمەت جۇبانوۆ الماتىعا قازاقستاننىڭ ءار تۇپكىرىنەن مەن دەگەن ۇزدىك كۇيشىلەردى جينايدى. سوندا 70-كە جۋىق كۇيشى كەلىپ, سونىڭ ىشىندە تەك سەگىزىنىڭ ورىنداۋىنداعى كۇيلەر ماسكەۋ قالاسىندا ۇنتاسپاعا جازۋ ءۇشىن تاڭدالىپ الىنعان ەكەن. وسى ۇركەردەي توپتا وقاپ قابيعوجين دە بولعان. ونەر يەسى كۇي اتاسى قۇرمانعازى مەن دينانىڭ مۋزىكالىق مۇراسىن ناسيحاتتاۋشى ەدى. ودان بولەك, جانتورە, تۇركەش, سوقىر ەسجان, داۋلەتكەرەي سياقتى حالىق سازگەرلەرىنىڭ باعا جەتپەس كۇيلەرىن ساقتاپ, جاڭعىرتىپ مۋزىكالىق حورعا قوسۋىمەن قاتار, كوپتەگەن جاستى دومبىراشىلىق ونەرگە باۋلىدى. 1939 جىلى ماسكەۋدە وتكەن حالىق تالانتتارىنىڭ بۇكىلوداقتىق بايقاۋىنا قاتىسقان. ءوزى شىعارعان كۇيلەرىنىڭ ىشىندەگى قوماقتىسى – «اداسقاق» كۇيى. «اداسقاقتى» كەزىندە ەرتىس-بايان ءوڭىرىنىڭ تۋماسى, قازاق كسر حالىق ءارتىسى, كۇيشى-دومبىراشى رۇستەمبەك وماروۆ تا شەبەر ورىنداعان. ءۇنتاسپادا ساقتالىپ قالعان نۇسقاسى بار. وكىنىشكە قاراي, بۇل كۇيدى بىلەتىندەر قازىرگى ۋاقىتتا وتە سيرەك.
كونتسەرتتە تۇرار الىپباەۆ قۇرمانعازىنىڭ «بايجۇما», ەسىردىڭ «اقجارما», وسكەنبايدىڭ «بۇلبۇل اقجەلەڭ», دينانىڭ «بۇلبۇل», قازانعاپتىڭ «كوكىل», «18 جاسار بالجان قىز», «ساۋ بول, بالجان», ق.احمەدياروۆتىڭ «تۇبەك تولعاۋ» جانە تاعى باسقا كۇيلەردى ناقىشىنا كەلتىرىپ ورىندادى. رۋحاني كەشتە وبلىستىق فيلارمونيانىڭ رۇستەمبەك وماروۆ اتىنداعى قازاق ۇلت اسپاپتار وركەسترى كۇيشىنىڭ شىعارماشىلىعىنان تۋعان بىرنەشە كۇيدى تارتۋ ەتتى. ايتا كەتەيىك, بۇل وركەستردىڭ كوركەمدىك جەتەكشىسى ءارى باس ديريجەرى قازاقستاننىڭ ەڭبەك سىڭىرگەن قايراتكەر تالعات كارىموۆ.
پاۆلودار
