جىل باسىنداعى 2 ايدا كىشى ارالعا 800 ملن تەكشە مەتر سۋ جينالىپتى, بۇل بىلتىر جىل بويى كىشى تەڭىزگە قۇيعان كولەممەن پارا-پار كورسەتكىش. وسىلايشا, تەڭىز دەڭگەيى 2022 جىلدىڭ قازان ايىمەن سالىستىرعاندا 48 سانتيمەترگە ارتتى.
سىرداعى كۇن رايى دا وزگە وڭىرلەر كليماتىنا ۇقساي بەرمەيدى. قىستىڭ كوكتەمگە ۇلاسار مەزگىلىندە وڭتۇستىك اۋدان سانالاتىن جاڭاقورعان مەن شيەلىدە سەڭ ءجۇرىپ, بوي جىپسىتەر جايماشۋاق ورناسا, سولتۇستىك بولىگىندە, اسىرەسە, قارماقشى, قازالى مەن ارال اۋدانىندا مۇز كوبەسى سوگىلمەستەن سىرەسىپ جاتادى.
بيىل ناۋرىزدىڭ باسىندا-اق قىزىلوردا قالاسىنىڭ تۇسىنان سەڭ ءوتتى. ارال-سىرداريا باسسەيندىك ينسپەكتسياسى, «قازسۋشار» رمك, توتەنشە جاعداي سالاسى مەن جەرگىلىكتى اكىمدىكتەر قازىر وسى مول سۋدى شىعىنسىز وتكىزىپ جىبەرۋدىڭ قامىندا ءجۇر. وزەن بويىنداعى قاۋىپتى ۋچاسكەلەرگە باقىلاۋ كۇشەيىپ, مۇزدىڭ كىدىرىسسىز ءجۇرۋى تۇراقتى قاداعالانىپ تۇر. جاعدايدى كۇندەلىكتى سارالاپ وتىرعان ماماندار بولجامىنشا 25 ناۋرىزعا دەيىن مۇز تولىق وتەدى. بۇگىندە سۋ باسۋ قاۋپى بار 29 ايماققا 136 مەكەمە بەكىتىلدى. جالپى 1083 ادام مەن 368 ارنايى تەحنيكا وسى جۇمىسقا جۇمىلدىرىلىپ وتىر. سۋ تاسقىنىنا قارسى ماتەريالدىق-تەحنيكالىق قور قالىپتاستىرىلدى.
ايتقان جەردەن اۋلاق, دەگەنمەن داريا ارناسىنان اسىپ, ەلدى مەكەندەرگە قاۋىپ تونەتىندەي جاعداي تۋسا حالىقتى كوشىرۋ پۋنكتتەرى دايىن تۇر. «قازگيدرومەت» جانە «قازسۋشار» رمك قىزىلوردا فيليالدارى ماماندارى وزەن ارناسىنداعى 10 بەكەت پەن 4 سۋ تورابىنداعى سۋ دەڭگەيىنە كۇندەلىكتى مونيتورينگ جاساپ وتىر.
سەڭ جالاعاش اۋدانى تۇسىنا جەتكەندە م.شامەنوۆ, تاڭ, قاراكەتكەن, دالداباي ەلدى مەكەندەرىنىڭ ماڭىندا مۇزدىڭ كەپتەلىسى بايقالىپ. «شومەن قايىرى» ۋچاسكەسىندە مۇز جارۋ جۇمىستارى جۇرگىزىلدى.
دەگەنمەن قارماقشى اۋدانى قىزىلتام ەلدى مەكەنى تۇسىنداعى داريا سۋى ارنادان اسىپ, «جالاعاش-جوسالى» باعىتىنداعى جول ۋاقىتشا جابىلدى. بىراق بۇدان ەلدى مەكەندەرگە ەشقانداي قاۋىپ جوق. تەلەگەي سۋ جايىلىمدىق القاپتارعا جىبەرىلدى. وسى كۇنى قىزىلتام ەلدى مەكەنى ماڭىنداعى سۋ دەڭگەيى 1 مەترگە, جالاعاش اۋدانىمەن شەكارالاس اۋماقتا 30 سانتيمەترگە, جاڭاجول مەن يىركول اۋىلدىق وكرۋگتەرىنىڭ ارالىعىنداعى بولىكتە 14 سانتيمەترگە تۇسكەن.
قازىر ارنامەن جىلجىعان قويمالجىڭ مۇز قارماقشى اۋدانىنا جەتتى. وسىعان بايلانىستى بارلىق قورعانىس بوگەتتەرى باقىلاۋعا الىنعان. كەشەگى مەرەكەدە جوسالى كەنتى مەن اقتوبە اۋىلدىق وكرۋگى اكىمى اپپاراتىنىڭ قىزمەتكەرلەرى كەزەكشىلىككە شىعىپ, داريا بويىن تاۋلىك بويى قاداعالاپ ءجۇردى. اۋدان اكىمى جاندوس ەركىنبەك سۋ باسۋ قاۋپى تونگەن ايماقتارداعى قورعانىس بەكەتتەرىنىڭ جاعدايىمەن تانىسىپ, كەنت,اۋىلدىق وكرۋگ اكىمدەرى مەن ءتيىستى سالا باسشىلارىنىڭ قاتىسۋىمەن وتكەن ماجىلىستە كەزەكشىلىك كەستەسىن بەكىتتى.
– بۇگىندە «شاردارا» سۋ قويماسىنان ارناعا تاستالار سۋ كولەمى 829 تەكشە مەترگە جەتتى. بۇل سۋ وبلىس شەكاراسىنا التى, ال قازىر سەڭ ءجۇرىپ جاتقان قارماقشى اۋدانى اۋماعىنا 10-11 كۇندە جەتەدى. وعان دەيىن مۇز تولىق كەتەدى. ءدال قازىر سەڭ اۋدانداعى قورقىت اتا كەشەنى ماڭايىندا تۇر. ءبىز سوندا مۇزدىڭ قاۋىپسىز ءوتۋىن قاداعالاپ ءجۇرمىز. بيىلعى مول سۋدى كىشى ارال تەڭىزىنە جەتكىزىپ الساق, سوڭعى جىلدارداعى تاپشىلىقتان 8 ملرد تەكشە مەتردەي سۋ جوعالتقان ايدىننىڭ اۋقىمى ءبىراز كەڭەيىپ قالار ەدى, دەيدى ارال-سىرداريا باسسەيندىك ينسپەكتسياسىنىڭ ءبولىم باسشىسى زەينۋللا قازتوعانوۆ.
وسى كۇنى وبلىس اۋماعىنا سەكۋندىنا 778 تەكشە مەتر سۋ جەتىپ تۇر. ارنادا مۇز ۇستاسقالى بەرى ارتىق سۋ قاڭسىپ تۇرعان كولدەر جۇيەسىنە, جايىلىمدىق القاپتارعا جىبەرىلىپ جاتىر. دارياداعى مول سۋدان ۇرەيلەنىپ وتىرعان ەل جوق, ەسەسىنە «ەرتەڭگى ەككەنىمىز ەسەلەنەر» دەگەن ءۇمىت باسىم.
قىزىلوردا
