وقۋ-اعارتۋ ءمينيسترى عاني بەيسەمباەۆ پەن الماتى اكىمى ەربولات دوساەۆتىڭ كەزدەسۋىندە ءبىلىم سالاسىن جاقسارتۋعا بايلانىستى ماسەلەلەر تالقىلانىپ, سالانى دامىتۋدىڭ 2023-2029 جىلدارعا ارنالعان وڭىرلىك جول كارتاسىنا قول قويىلدى.
«الماتىنىڭ 18 مىڭعا جۋىق پەداگوگى بىلىكتىلىكتى ارتتىرۋ كۋرستارىنان ءوتىپ, مەكتەپتەردىڭ باسقارۋشىلىق قۇرامىنىڭ 450 وكىلى حالىقارالىق مەنەدجمەنت باعدارلامالارىن وقيتىن بولادى. فۋنكتسيونالدىق ساۋاتتىلىقتى, تسيفرلىق قۇزىرەتتىلىكتەر مەن داعدىلاردى قالىپتاستىرۋ باعدارلامالارىن 9 مىڭ پەداگوگ مەڭگەرەدى. مەملەكەت باسشىسىنىڭ تاپسىرماسىنا سايكەس تەگىن تەحنيكالىق جانە كاسىپتىك بىلىممەن ءجۇز پايىز قامتۋ ءۇشىن كوللەدجدەردە مەملەكەتتىك تاپسىرىستى 20 مىڭنان استام ورىنعا ۇلعايتۋ جوسپارلانىپ وتىر», دەدى كەزدەسۋدە ع.بەيسەمباەۆ.
ە.دوساەۆتىڭ ايتۋىنشا, جول كارتاسى ورتا ءبىلىم بەرۋ ماسەلەلەرىن شەشۋ, پەداگوگتەردىڭ بىلىكتىلىگىن ارتتىرۋ سياقتى ماڭىزدى ماسەلەلەرمەن تولىقتىرىلدى. الماتى اكىمدىگىنىڭ جوسپارىنا سايكەس مەكتەپكە دەيىنگى ۇيىمداردا ورىن تاپشىلىعى ماسەلەسىن شەشۋ ءۇشىن 2029 جىلعا دەيىن بالاباقشالاردا مەملەكەتتىك تاپسىرىستى 35 مىڭ ورىنعا ۇلعايتۋ كوزدەلىپ وتىر. «جايلى مەكتەپ» جوباسى بويىنشا بيىلدان باستاپ رەسپۋبليكالىق بيۋدجەت ەسەبىنەن 37 مىڭ وقۋشىعا ارنالعان 22 مەكتەپتىڭ قۇرىلىسى باستالىپ, ورتا ءبىلىم بەرۋ ۇيىمدارىنا 30 مەكتەپ پەن 9 قوسىمشا قۇرىلىس سالىنادى. بۇل 2025 جىلعا دەيىن وقۋشى ورىندارىنىڭ تاپشىلىعىن 23 مىڭعا تومەندەتۋگە مۇمكىندىك بەرەدى. سونداي-اق 50 ءبىلىم بەرۋ نىسانىن جاڭارتۋ جوسپارلانىپ, 200-گە جۋىق مەكتەپ جاڭا بۋىن كابينەتتەرىمەن قامتىلادى. جىل سايىن 2 مىڭعا جۋىق پەداگوگ بىلىكتىلىكتى ارتتىرۋ كۋرستارىنان وتەدى. ال بيىل مەكتەپكە دەيىنگى تاربيە مەن وقىتۋدىڭ وڭىرلىك رەسۋرستىق ورتالىعىن اشۋ كوزدەلىپ وتىر.
تەحنيكالىق جانە كاسىپتىك ءبىلىم بەرۋ ۇيىمدارىنىڭ قولجەتىمدىگى مەن ساپاسىن ارتتىرۋ ماڭىزدى. وسى ورايدا 2025 جىلعا دەيىن 300 ورىنعا ارنالعان جاتاقحاناسى بار ەكى كوللەدج قۇرىلىسىن باستاۋ جوسپارلانىپ وتىر. سونىمەن قاتار 4 مىڭعا جۋىق تەحنيكالىق جانە كاسىپتىك ءبىلىم بەرۋ وقىتۋشىسى بىلىكتىلىكتى ارتتىرۋ كۋرستارىنان, 600 ارنايى ءپان مۇعالىمدەرى مەن وندىرىستىك وقىتۋ شەبەرلەرى حالىقارالىق تاعىلىمدامادان ءوتىپ, 85 كوللەدج باسشىسى مەنەدجمەنت بويىنشا بىلىكتىلىگىن ارتتىرادى.
قالادا اتقارىلاتىن بىرقاتار ءىس-شارا ينكليۋزيۆتى ءبىلىم بەرۋدى دامىتۋعا باعىتتالىپ وتىر. پسيحولوگيالىق-مەديتسينالىق-پەداگوگيكالىق كونسۋلتاتسيالار جەلىسىن, پسيحولوگيالىق-پەداگوگيكالىق تۇزەتۋ كابينەتتەرىن كەڭەيتۋ, ەرەكشە قاجەتتىگى بار بالالارعا ارنايى پسيحولوگيالىق-پەداگوگيكالىق كومەككە مەملەكەتتىك تاپسىرىستى 1 400 ورىنعا ۇلعايتۋ جانە قالالىق ينكليۋزيۆتى رەسۋرستىق ورتالىق قۇرۋ جوسپارلانىپ وتىر. ءتورت يننوۆاتسيالىق شىعارماشىلىق ورتالىق, ەكى جازعى لاگەر سالۋ, قوسىمشا ءبىلىم بەرۋگە مەملەكەتتىك ءبىلىم بەرۋ تاپسىرىسىن ۇلعايتۋ مەن مەكتەپ كىتاپحانالارىن جاڭعىرتۋ دا – جوسپارداعى ماڭىزدى مىندەتتەر. قالانىڭ جول كارتاسى سونداي-اق بالالاردىڭ شىعارماشىلىق جانە زياتكەرلىك الەۋەتىن دامىتۋ, قۇقىقتارىن قورعاۋ, ءبىلىم بەرۋ ۇيىمدارىندا سىبايلاس جەمقورلىققا قارسى ءىس-قيمىل شارالارىن دا قامتيدى.
الماتى
