استانادا گۇلميرا ساتىبالدىعا قاتىستى سوت پروتسەسى باستالدى. گۇلميرا ساتىبالدىعا ادام ۇرلاۋعا قاتىستى جانە وزبىرلىق جاسادى دەگەن ايىپ تاعىلدى.
سوتتا گۇلميرا ساتىبالدىمەن بىرگە تاعى ەكى ادام وتىر. ونىڭ جۇرگىزۋشىسى ادام ۇرلاۋ قىلمىسىنا قاتىسى بار دەگەن بولجام بار. بۇل ءىس بويىنشا بەلگىلى كاسىپكەر تۇرسەن الاگۋزوۆ جابىرلەنۋشى بولىپ وتىر.
«گۇلميرا ساتىبالدىعا قىلمىستىق كودەكستىڭ 389-بابىنىڭ 4-بولىگى, 389-بابىنىڭ 3-بولىگى, 28-بولىگى, 3-بولىگى, 125-بابىنىڭ 2-بولىگى, 1 جانە 8-تارماقتارى بويىنشا قىلمىستىق قۇقىق بۇزۋشىلىقتاردى جاسادى دەپ ايىپ تاعىلدى. ءمادي باتىرشاەۆ قىلمىستىق قۇقىق بۇزۋشىلىق جاسادى دەپ ايىپتالدى. وعان قىلمىستىق كودەكستىڭ 389-بابىنىڭ 3-بولىگى, 28-بولىگى, 3-بولىگى, 125-بابىنىڭ 2-بولىگى, 1, 8-تارماقتارى بويىنشا ايىپ تاعىلدى. وتەبەكوۆ راشيد قك-ءنىڭ 125-بابىنىڭ 2-بولىگىندە كوزدەلگەن قىلمىستىق قۇقىق بۇزۋشىلىقتاردى جاسادى دەپ ايىپتالدى», دەدى سوت وتىرىسىندا مەملەكەتتىك ايىپتاۋشى وكىلى.
گۇلميرا ساتىبالدىنىڭ ادۆوكاتتارى سوتتالۋشىعا قاتىستى بارلىق قىلمىستىق ىستەردى بىرىكتىرۋدى سۇرادى.
«قازاقستاندا گۇلميرا ساتىبالدىعا قاتىستى ءۇش قىلمىستىق ءىس قارالىپ جاتىر. ءبىر ءىستى قىزىلوردانىڭ №2 سوتىندا قاراپ جاتىر, ەكىنشى ءىستى استانا, ءۇشىنشى ءىستى الماتى قالاسى, سىبايلاس جەمقورلىققا قارسى قىزمەت دەپارتامەنتى قاراپ جاتىر», دەدى ساتىبالدىنىڭ ادۆوكاتى.
سونداي-اق سوتتالۋشىنىڭ ادۆوكاتتارى بۇلتارتپاۋ شاراسىن ۇيقاماققا وزگەرتۋدى جانە قىلمىستىق ءىستى قىسقارتۋدى سۇراعان.
بۇعان دەيىن بۇل قىلمىستىق ءىس الماتىنىڭ المالى اۋداندىق سوتىندا قارالا باستاعانى حابارلانعان ەدى. الايدا العاشقى سوت وتىرىسىندا ادۆوكاتتار, بولجام بويىنشا, گۇلميرا ساتىبالدى پروتسەستى استاناعا كوشىرۋدى سۇراعان. سۋديا ولاردىڭ ءوتىنىشىن قاناعاتتاندىرىپ, ءىستى استانا قالاسى بايقوڭىر اۋدانىنىڭ №2 اۋداندىق سوتىنا جىبەردى.
ەسكە سالايىق, سىبايلاس جەمقورلىققا قارسى قىزمەت وتكەن جىلدىڭ ناۋرىز ايىندا سوتقا دەيىنگى تەرگەۋ باستالعانىن حابارلاعان بولاتىن. ءىس بويىنشا ايىپتالۋشىلار قايرات ساتىبالدى ۇلى, ونىڭ بۇرىنعى ايەلى گۇلميرا جانە باسقا دا تۇلعالار بولدى. ولار بيزنەستى رەيدەرلىك جولمەن باسىپ الدى دەگەن كۇدىككە ءىلىندى.
كەيىن سوت گۇلميرا ساتىبالدىنى ەكى ايعا قاماۋعا الدى. باستاپقىدا ول 747 ميلليون تەڭگەنى جىمقىردى دەگەن كۇدىككە ىلىكتى. الايدا كەيىنىرەك ولار انتيكوردا بىرقاتار كاسىپورىننىڭ اكتسيالارى مەن مۇلكىن زاڭسىز يەمدەنۋ, ادام ۇرلاۋ جانە زاڭسىز باس بوستاندىعىنان ايىرۋ فاكتىلەرى بويىنشا ءىستى تەرگەي باستادى.
تەرگەۋشىلەردىڭ ايتۋىنشا, گۇلميرا ساتىبالدى سۋسىن شىعاراتىن ءىرى كومپانيالاردىڭ اكتسيالارىن تارتىپ الماق بولعان. كاسىپكەرلىكتى رەيدەرلىك جولمەن باسىپ الۋ تۋرالى بۇعان دەيىن ەكى كاسىپكەر مالىمدەگەن. بەلگىلى كاسىپكەر تۇرسەن الاگۋزوۆ تا بۇل ءىس بويىنشا جابىرلەنۋشى. كەلتىرىلگەن شىعىن كولەمى 6,6 ملرد تەڭگەدەن استام بولدى.
