ءاليحان سمايىلوۆ ايەلدەر قاۋىمىن مەرەكەسىمەن قۇتتىقتادى

«اياۋلى انالار!
قىمباتتى ارۋلار!
 
بارشاڭىزدى 8 ناۋرىز – حالىقارالىق ايەلدەر كۇنىمەن شىن جۇرەكتەن قۇتتىقتايمىن!

قازىرگى كەزەڭدە ايەلدەر قاۋىمى قوعامدىق ءومىردىڭ ەڭ بەلسەندى بولىگىنە اينالىپ وتىر.

قازاقستاندا 4,3 ملن ايەل جۇمىسپەن قامتىلعان. بۇل – ەڭبەك مايدانىندا جۇرگەن جالپى حالىقتىڭ 48%-ى.

مەملەكەت بيزنەسپەن اينالىسۋعا نيەتتى ايەلدەردى بۇتىندەي قولداپ كەلەدى. ەىدۇ دەرەكتەرىنە ساي, قازاقستاندا كاسىپكەر ايەلدەردىڭ ۇلەسى 45%-دى قۇراپ وتىر. بۇل – اقش جانە تۇركيا ەلدەرىمەن سالىستىرعاندا جوعارى كورسەتكىش.

ءبىزدىڭ ەلىمىزدە ايەلدەر ەر-ازاماتتارمەن قاتار يىق تىرەستىرە ءجۇرىپ, مەملەكەتتىك باسقارۋ ىسىنە بەلسەندى قاتىسىپ وتىر. ەگەر 2010 جىلى مەملەكەتتىك قىزمەتتەگى ايەلدەردىڭ ۇلەسى 52,7% بولسا, وتكەن جىلى 55,4%-عا جەتتى.

قازاقستان گەندەرلىك تەڭدىك ورناعان قوعام قالىپتاستىرۋدا ايتارلىقتاي جەتىستىكتەرگە جەتتى.

مەملەكەت الداعى ۋاقىتتا دا قازاقستاندىق ايەلدەردىڭ ءال-اۋقاتىن جاقسارتۋ ءۇشىن بار كۇشىن سالادى.

كورىكتى كوكتەمنىڭ وسىناۋ شۋاقتى كۇنىندە ەكونوميكانىڭ سان ءتۇرلى سالاسىندا ەڭبەك ەتىپ, ەلدىگىمىزدى نىعايتۋعا, كەمەل ۇرپاق تاربيەلەپ, وتباسىلىق قۇندىلىقتارىمىزدى باياندى ەتۋگە ولشەۋسىز ۇلەس قوسىپ كەلە جاتقان سىزدەرگە شىنايى قۇرمەتىمدى بىلدىرۋگە رۇقسات ەتىڭىزدەر. بارشاڭىزعا زور دەنساۋلىق, شاڭىراقتارىڭىزعا شاتتىق تىلەيمىن. مەرەكەلەرىڭىز قۇتتى بولسىن!», دەلىنگەن قۇتتىقتاۋدا.