«متق» اق ءباسپاسوز قىزمەتى ناقتىلاعانداي, 2022 جىلى بىرنەشە مەملەكەتتىك ورگاندار مەن ۇيىمداردىڭ ينفراقۇرىلىمدارىنان قۇجاتتاردى جاسىرىن جيناۋ ارقىلى كيبەرشپيوندىقتى جۇزەگە اسىرعان حاكەرلىك توپتىڭ قىزمەتى بەيتاراپتاندىرىلدى.
«حاكەرلەر ءوز قىزمەتىن جاسىرىن جۇرگىزدى. پوزيتسيالاردى بەكىتۋ جانە فايلداردى ۇرلاۋ ءۇشىن ىسكە قوسىلعان زياندى باعدارلامالار وپەراتسيالىق جۇيەنىڭ زاڭدى پروتسەستەرى نەمەسە ناقتى ازىرلەۋشىلەر قول قويعان باسقا ورناتىلعان باعدارلامالىق جاساقتاما رەتىندە جاسىرىلدى», دەلىنگەن حابارلامادا.
حاكەرلەر «0-كۇن» دەپ اتالاتىن قورعانىس كەمشىلىكتەرىن, سونداي-اق انتيۆيرۋستىق زەرتحانالار ءۇشىن بۇرىن بەلگىسىز زياندى باعدارلامالىق جاساقتامانى, ياعني APT-ءدى قولداندى.
اقپاراتتى قورعاۋ قۇرالدارى بۇل زياندى باعدارلامالىق جاساقتامانى انىقتاي العان جوق, بۇل حاكەرلەرگە قىزمەتتى كەدەرگىسىز جۇرگىزۋگە مۇمكىندىك بەردى.
سونداي-اق شابۋىلداۋشىلار ينفراقۇرىلىمنىڭ تەحنيكالىق مالىمەتتەرىنە قىزىعۋشىلىق تانىتتى, ولار ءارى قاراي العا جىلجۋ ءۇشىن جەلىلىك سحەمالار مەن ەسەپتىك جازبالاردى جيناۋمەن اينالىسقان.
«توپتاستىرۋدىڭ بەلسەندىلىگىن, سونداي-اق قولدانىلاتىن ادىستەردى زەردەلەۋ جانە وزگە دە اقپاراتتى جيناۋ ناتيجەسىندە بۇل ۇيىمداردا شەت مەملەكەتتىڭ مۇددەسى ءۇشىن ارەكەت ەتەتىن حاكەرلىك توپ جۇمىس ىستەدى دەپ بولجانىپ وتىر. بۇل جاعداي انىقتالعان شابۋىلعا مۇلدەم باسقا سيپات بەردى جانە توپتىڭ ءوز ماقساتتارىن جۇزەگە اسىرۋ ءۇشىن ەلەۋلى قارجىلىق قولداۋى بار جوعارى دەڭگەيلى مامانداردان تۇراتىندىعى ايقىن بولدى», دەپ قوستى «متق» اق ءباسپاسوز قىزمەتى
ناقتىلانعانداي, حاكەرلەر جوعارى تەحنولوگيالىق كيبەرشپيوندىق ارەكەتتەرىن جۇرگىزدى, ال مەملەكەتتىك ۇيىمدار وزدەرىنىڭ ينفراقۇرىلىمىندا بوگدە ادامنىڭ بار ەكەنىن بىلمەدى. بارلىعى بۇرىنعىداي جۇمىس ىستەدى, انتيۆيرۋستىق باعدارلامالىق جاساقتاما بۇرىن بەلگىلى بولعان زياندى باعدارلامالىق جاساقتامانى عانا انىقتادى. بۇل رەتتە, كومپيۋتەرلەردەگى ەلەكتروندىق قۇجاتتار جوعالعان جوق, ينفراقۇرىلىم تۇراقتى جۇمىس ىستەپ تۇردى.
وسى وقيعاعا ءتيىمدى دەن قويۋ جانە حاكەرلىك توپتى اشكەرەلەۋ ماقساتىندا «متق» اق جانە ۇقك باسقا دا مەملەكەتتىك ورگاندارمەن جانە ۇيىمدارمەن بىرلەسىپ زيانكەستەردىڭ ءتيىستى جۇمىس جۇرگىزدى.
«مەملەكەتتىك ورگاندار مەن ۇيىمداردىڭ ءبىرىنشى باسشىلارىنىڭ كەلىسىمى بويىنشا اۋقىمدى ءىس-شارالار وتكىزىلدى, ولاردىڭ ناتيجەلەرى بويىنشا وتاندىق جەلىلەردە حاكەرلىك قىزمەتتىڭ بولۋىن بارىنشا وقشاۋلاۋعا مۇمكىندىك تۋدى. سونداي-اق «متق» اق جانە ۇقك ءىس-شارالاردىڭ ەكىنشى كەزەڭىن وتكىزدى, ونىڭ بارىسىندا كەز كەلگەن كۇدىكتى ارەكەتتەر نولدىك سەنىم پريزماسى ارقىلى قابىلدانىپ, مۇقيات تەكسەرىلدى», دەلىنگەن ۆەدومستۆو تاراتقان اقپاراتتا.
ۆەدومستۆو وكىلدەرىنىڭ ايتۋىنشا, حاكەرلەر ءتۇرلى شابۋىل ادىستەرىن قولداندى: فيشينگتىك حاتتار, وسالدىقتاردى ىزدەۋ, باسقا جەلىلىك شابۋىلدار.
