اداي كۇيى جايلى ءارتۇرلى دەرەك بار.
ءبىرىنشى دەرەكتى احمەت جۇبانوۆ جازىپ كەتكەن. ول «عاسىرلار پەرنەسىندە» ەكى اڭىز جايلى ءسوز قوزعاعان. ءبىرىنشى اڭىز بويىنشا, قۇرمانعازى اداي رۋىنا بارىپ, قوناق بولىپ وتىرعاندا ءىلۋلى تۇرعان دومبىراعا كوزى تۇسەدى. دومبىرانى الىپ, قۇلاعىن تەرىس بۇراۋعا كەلتىرىپ قويادى. كەيىن ءۇيدىڭ ەركە قىزى كەلىپ, ونىمەنەن تارتىسقا تۇسەدى. ەڭ سوڭىندا ەكەۋى ءبىر-ءبىر كۇيدەن تارتتى دەيدى. سونداعى قىزدىڭ تارتقانى اداي كۇيى بولسا, قۇرمانعازى سەرپەر كۇيىن تارتىپتى. جۇبانوۆتىڭ ايتۋىنشا, بۇل دەرەكتى دينا كۇيشى ايتقان.
ءدال وسى ەڭبەكتە تاعى ءبىر جورامال بار. «...اداي رۋى يساتاي كوتەرىلىسىندە كوزگە تۇسكەن بولاتىن. جوعارىدا ايتىلعان ساعىزدان كەلىپ يساتايعا قوسىلعان قولدىڭ ىشىندە ادايلىقتار كوپ بولاتىن. بىزدىڭشە, قۇرمانعازى اداي رۋى اتىن جالپىلاما ۇعىمدا الىپ, ەركىندىك سۇيگەن ەلىنىڭ قايتپاس كۇشىنە ارناپ شىعارعان بولۋ كەرەك», دەيدى احمەت جۇبانوۆ.
ەكىنشى دەرەكتى اقسەلەۋ سەيدىمبەك «كۇي شەجىرە» كىتابىندا جازعان. وعان سايكەس, قۇرمانعازى جاس كەزىندە اداي رۋىنىڭ قىزىنا عاشىق بولادى. كەلەسى جىلى كەلىپ ۇيلەنەمىن دەپ جۇرگەندە قىز شەشەك اۋرۋىنان قايتىس بولىپتى. سول كەزدە قۇرمانعازى «اداي قىز» دەپ ازالى كۇي شىعارعان دەيدى. عالىم بۇل دەرەكتى سول اۋىلدىڭ شالدارىنان ەستىدىم دەيدى.
ءۇشىنشى دەرەكتى اداي شەجىرەشىلەرى ايتىپ كەتكەن. ءبىر جىلى قۇرمانعازى ەن دالادا كەلە جاتسا 300 قارۋلانعان اسكەردى كورەدى. ولار تۇركىمەندەرمەن سوعىسۋعا بارا جاتقان ەكەن. جاۋدىڭ كەمىندە 3000 اسكەرى بولعان. تاڭ قالعان قۇرمانعازى بيىك توبەشىككە شىعىپ, ءالىپتىڭ ارتىن باعادى. سوندا ادايلىقتار ەر-توقىمنىڭ ارتىنا قوي تەرىسىن بايلاپ, ءبىر قاتارمەن شابا باستايدى. جەرگە سۇيرەتىلگەن تەرى ايلاناسىن شاڭ-توزاڭعا اينالدىرادى. تۇركىمەندەر بۇنى كورىپ, شاۋىپ كەلە جاتقان 30 000 جاۋىنگەرى بار قالىڭ قول دەپ ويلاپ, جان-جاققا قاشا باستاپتى. بۇعان كۋا بولعان قۇرمانعازى جىگىتتەردىڭ قۋلىعىنا ءارى باتىرلىعىنا ريزا بولىپ «اداي» كۇيىن شىعارعان دەيدى.
