32 جاستاعى تەحاس شتاتى تۋماسىنىڭ وسى سپورت ءتۇرىن سەرىك ەتكەلى 10 جىلدان استى. سول ارالىقتا دجەفف 19 كەزدەسۋ وتكىزىپ, 15 رەت جەڭىسكە جەتتى. 11 قارسىلاسىن ەسىنەن تاندىردى. ال شاۆقاتتىڭ ءجۇرىپ وتكەن جولى جانكۇيەرلەردىڭ كوز الدىندا. 28 جاستاعى قانداسىمىز 2014 جىلدان بەرى ارالاس جەكپە-جەكپەن شۇعىلدانۋدا. سول كەزدەن بەرى 16 رەت وكتاگونعا شىعىپ, بارلىق باسەكەسىن ايقىن باسىمدىقپەن اياقتادى.
لاس-ۆەگاستاعى ايقاس وتە تارتىستى ءوتتى. نيل – جۇدىرىقتاسۋدىڭ حاس شەبەرى. شاۆقات تا اشىق ايقاسقا بارۋدان «كەت ءارى» ەمەس. ەكەۋى ۇزاق ۋاقىت بويى ءبىر-ءبىرىن جاقسىلاپ تۇرىپ تومپەشتەدى. بۇل ايقاستا قازاق سپورتشىسىنىڭ باسىمدىعى بايقالعانىمەن, اقش-تىڭ وكىلى دە جۇدىرىعىن وڭدى-سولدى سىلتەدى. ءۇشىنشى راۋندا راحمونوۆ اۋىر سوققى جىبەرىپ الدى. تىپتەن سول كەزدە تالتىرەكتەپ تە كەتتى. بىراق ول دەر كەزىندە ەسىن جيىپ, قارىمتا شابۋىلعا كوشتى. قايتسەم دە ەسەمدى قايتارامىن دەگەن ويمەن العا ۇمتىلدى. ءبىر مەزەتتە شاۆقاتتىڭ اۋىر سوققىلارىنان كەيىن دجەفف ەسەڭگىرەپ قالدى. قانداسىمىز سول ءساتتى ۇتىمدى پايدالانىپ, قارسىلاسىنىڭ ارتىنا شىقتى دا, ونى قىلقىندىرىپ تاستادى. ءسويتىپ, مۇحيتتىڭ ارعى جاعالاۋىندا وتكەن جارىستا شاۆقات راحمونوۆ ءوزىنىڭ كەزەكتى ايقىن جەڭىسىنە قول جەتكىزدى.
ال وسى كەشتىڭ باستى جەكپە-جەگى امەريكالىق دجون دجونس پەن فرانتسيالىق سيريل گان اراسىندا ءوتتى. 35 جاستاعى نيۋ-يوركتىڭ تۋماسى 28 كەزدەسۋدىڭ تەك بىرەۋىندە عانا ۇتىلعان-دى. ءبىر ايتا كەتەرلىگى, 2009 جىلى مەتت حەميلگە قارسى باسەكە بارىسىندا ول ەرەجەنى ورەسكەل بۇزعانى ءۇشىن جازالاندى, مىنە, دجونستىڭ جالعىز جەڭىلىسىنىڭ «تاريحى» وسىنداي. جالپى, بۇعان دەيىن جارتىلاي اۋىر سالماقتا ونەر كورسەتكەن دجونسقا UFC-دەگى كوپتەگەن رەكورد تيەسىلى. 32 جاستاعى گان 12 رەت ايقاس الاڭىنا شىعىپ, 11 رەت جەڭىس تويىن تويلادى. سەگىز سايىستى ول نوكاۋتپەن اياقتادى. وسى قوس الىپ اراسىنداعى جەكپە-جەكتە اتالعان پروموۋشەننىڭ چەمپيوندىق بەلبەۋى ساراپقا سالىندى. وكىنىشىكە قاراي, بۇل جەكپە-جەك كوپشىلىك كۇتكەندەي اسا تارتىستى بولمادى. دجونس ءبىرىنشى راۋندتا-اق گاندى قىلقىندىرىپ تاستاپ, اسا اۋىر سالماقتىڭ التىن بەلبەۋىن يەلەندى.
