سەرىك جۇمانعارين الدىڭعى اپتادا كوكونىستەرگە باعانىڭ ءوسۋ قارقىنى باسەڭدەگەنىمەن, تۇراقتاماعانىن ايتتى. تۇراقتاندىرۋ قورلارىنان نارىققا شىعارىلاتىن الەۋمەتتىك ماڭىزى بار تاۋارلاردىڭ كولەمى ءالى دە جەتكىلىكسىز بولىپ وتىر.
«اكىمدىكتەرگە قوردى قويمالاردا ۇستاماي, كوكونىستەردى ساتاتىن ساۋدا نىساندارىنىڭ سانىن كوبەيتە وتىرىپ, ولاردى ۇلكەن كولەمدە نارىققا شىعارۋدى تاپسىرامىن», دەدى سەرىك جۇمانعارين.
كەڭەس بارىسىندا ساۋدا جانە ينتەگراتسيا مينيسترلىگى ساۋدا كوميتەتى توراعاسىنىڭ مىندەتىن اتقارۋشى ايدار ابىلدابەكوۆتىڭ ايتۋىنشا, بۇگىندە وڭىرلەردىڭ دەرەكتەرى بويىنشا اينالىمعا 56,2 مىڭ توننا كوكونىس جىبەرىلدى.
بۇگىندە 18,4 مىڭ توننا كوكونىس, ونىڭ ىشىندە پياز - 4,9 مىڭ توننا, قىرىققابات - 2,8 مىڭ توننا, كارتوپ – 7,0 مىڭ توننا, ءسابىز – 3,6 مىڭ توننا ساتىلدى. وتكەن اپتادا ءسابىز باعاسى – 0,6%-عا, قاراقۇمىق – 0,5%-عا, قانت – 0,3%-عا, كۇنباعىس مايى جانە تاۋىق ەتى – 0,2%-عا تومەندەدى.
