قوناقتى قارسى العان قور پرەزيدەنتى ق.تۋمىشتى قازاقستاندا اتالىپ وتىلەتىن العىس ايتۋ كۇنىمەن قۇتتىقتادى.
كەزدەسۋ بارىسىندا گ.ەفەنديەۆا قور قىزمەتى تۋرالى, تۇركى حالىقتارىنىڭ سان عاسىرلىق تاريحى مەن باي مادەنيەتىن ناسيحاتتاۋ ماقساتىندا الەمنىڭ ءتۇرلى ەلدەرىندە وتكىزىلىپ جاتقان جانە جوسپارلانىپ وتىرعان شارالار تۋرالى ايتتى. سونىمەن قاتار ول تۇركى الەمىنىڭ كونە مۇراسىن حالىقارالىق دەڭگەيدە ناسيحاتتاۋ باعىتىندا بىرلەسكەن جوبالاردى جۇزەگە اسىرۋدىڭ ماڭىزدىلىعىنا توقتالدى.
حالىقارالىق تۇركى مادەنيەتى مەن مۇراسى قورىنىڭ اتقارعان جۇمىسىن جوعارى باعالاي وتىرىپ, ق.تۋمىش ۇيىمنىڭ تۇركى ەلدەرى اراسىنداعى ىنتىماقتاستىقتى نىعايتۋعا قوسقان ەرەكشە ۇلەسىن اتاپ ءوتتى. ول سونداي-اق قور جۇزەگە اسىراتىن الداعى جوبالارعا قازاقستاننىڭ جان-جاقتى قولداۋ كورسەتەتىنىنە سەنىم ءبىلدىردى.
كەزدەسۋدە قوردىڭ قىزمەت ەتكەن جىلدارىندا تۇركى ەلدەرىمەن عانا ەمەس, الەمنىڭ ءتۇرلى ەلدەرىمەن ارىپتەستىك بايلانىستاردىڭ بولعانى ءسوز بولدى, سونداي-اق باسقا دا حالىقارالىق ۇيىمدارمەن ىنتىماقتاستىقتىڭ ماڭىزدىلىعى اتاپ ءوتىلدى. تاراپتار بيىل قازاقستاندا ءوتۋى جوسپارلانعان تۇركى مەملەكەتتەرى ۇيىمىنىڭ X ءسامميتىنىڭ تۇركى ەلدەرىنىڭ ينتەگراتسياسى ءۇشىن ماڭىزى زور ەكەنىن اتاپ ءوتتى.
سونىمەن بىرگە بيىل ازەربايجاننىڭ ۇلى پەرزەنتى گەيدار اليەۆتىڭ 100 جىلدىعى, تۇركى سوپىلىق تارماعىنىڭ نەگىزىن قالاۋشى احمەت قوجا ءياساۋيدىڭ 930 جىلدىعى, اتاقتى تۇركى بيلەۋشىسى بايبارىس سۇلتاننىڭ 800 جىلدىعى سياقتى اتاۋلى مەرەيتويلار سالتاناتتى تۇردە اتاپ وتەتىنى باسا ايتىلدى.
سونىمەن قاتار كەزدەسۋدە قازاقستان, ۇيىمعا مۇشە ەلدەر مەن باقىلاۋشىلار اراسىندا مادەنيەت سالاسىنداعى ءوزارا ءىس-قيمىلدى كەڭەيتۋ پەرسپەكتيۆالارى تالقىلاندى.
