كەزدەسۋ بارىسىندا كانديدات جينالعان قاۋىمعا پارتيانىڭ سايلاۋالدى باعدارلاماسىنىڭ باسىم باعىتتارىن باياندادى. اتاپ ايتقاندا, پارتيانىڭ سايلاۋالدى باعدارلاماسىندا جاڭا ەڭبەك كودەكسىن قابىلداۋ تۋرالى تارماق بار ەكەنىن اتاپ ءوتتى. قۇجاتتا ەڭبەك شارتتارىن جاساسۋ كەزىندە جۇمىسكەرلەر مەن جۇمىس بەرۋشىلەردىڭ تولىق تەڭدىگى قامتاماسىز ەتىلەتىن قاعيدات بار. سونىمەن بىرگە ابدۋكامال اشيمبەكوۆ ءوز سوزىندە جاستاردى جۇمىسقا ورنالاستىرۋ بويىنشا اتالمىش ءوڭىردىڭ ارتتا قالىپ جاتقاندىعىنا توقتالدى.
«ەل حالقىنىڭ ءومىر ساپاسىن جاقسارتۋ – مەملەكەتتىڭ باسىم باعىتتارىنىڭ ءبىرى. الەم بويىنشا ستاتيستيكالىق دەرەكتەردە جاعدايىمىز ءماز ەمەس. ءومىر ساپاسىن ارتتىرۋعا بىرنەشە فاكتور اسەر ەتەدى. جۇمىسسىزدىق ماسەلەسىمەن قاتار, جەمقورلىققا قاتىستى ماسەلەلەردى تۇبەگەيلى شەشپەيىنشە, مەملەكەتتىك باسقارۋ جۇيەسىن قالىپتى جۇزەگە اسىرۋ مۇمكىن ەمەس. جەمقورلىقپەن كۇرەستى كۇشەيتۋ كەرەك: پاراقورلارعا قاتىستى ماكسيمالدى جازا ورناتىپ, مەرزىمىنەن بۇرىن بوساتۋ قۇقىعىنان ايىرۋ قاجەت. ءبىزدىڭ مەملەكەتىمىز, باسقا دا كوپتەگەن ەل سياقتى سىبايلاس جەمقورلىقتىڭ الدىن الۋ جانە ونى بولدىرماۋ ماقساتىندا قارقىندى جۇمىس جۇرگىزىپ جاتىر. جەمقورلىقتى جەڭىپ, مەملەكەتتىڭ باسقارۋ جۇيەسىن اۋىستىرۋ ارقىلى ەلدىڭ ەكونوميكالىق گۇلدەنۋىنە قول جەتكىزۋگە بولادى», دەدى كانديدات.
وسىلايشا, پارتيا مۇشەلەرى ءومىر ءسۇرۋ ساپاسىنىڭ ستاندارتتارىن ازىرلەۋ جانە ەنگىزۋ ماسەلەسىن پارلامەنتتە باستاماشىلىق جاساۋعا نيەتتى. كەزدەسۋدە كانديداتتار سايلاۋشىلاردى پارتيانىڭ سايلاۋالدى باعدارلاماسىمەن تانىستىردى. باعدارلامادا ءبىلىم بەرۋ سالاسىنىڭ دامۋىنا ەرەكشە كوڭىل بولىنگەنى ايتىلدى. مەديتسينا جانە ءبىلىم بەرۋ سالالارىنا ءىجو-دەن جىلىنا ەڭ كەمى 5-7%-دى ءبولۋ ۇسىنىلعان. جالپىۇلتتىق سوتسيال-دەموكراتيالىق پارتيا وكىلدەرى مۇنداي شارا دارىگەرلەر مەن مۇعالىمدەر ەڭبەكاقىسىنىڭ بانك قىزمەتكەرلەرى دەڭگەيىنە دەيىن كوتەرۋگە مۇمكىندىك بەرەتىندىگىن ايتتى. «مۇنىڭ ماڭىزى زور, سەبەبى اتالمىش ماماندار ادامي كاپيتالدىڭ ساپاسىنا جاۋاپ بەرەدى, ال بۇل ءوز كەزەگىندە وتاندىق ەكونوميكانى دامىتۋ ءۇشىن نەگىزگى تالاپ بولىپ سانالادى», دەدى كانديدات.
