ۇلپىلدەگەن ۇكىلى ۇمىتتەر

بۇل كۇن مەكتەپ ءبىتىرۋشى ءار تۇلەك ءۇشىن, ءار مەكتەپ ۇجىمى ءۇشىن سالتاناتتى ءارى قۋانىشتى بولىپ سانالادى. اتا-انا ءۇشىن باۋىر ەتى – بالاپانىنىڭ قانات قاققان, ۇستاز ءۇشىن ماڭداي تەرى – شاكىرتىنىڭ ۇمىتىنە ۇكى تاققان تاماشا ءساتى قانداي عانيبەت. ال, بۇكىل ەل ءۇشىن – ازاماتقا ءۇمىت ارتقان تاريحي مەزەت بۇل, جاس تۇلەكتىڭ ءومىر باسپالداعىنا جولداما بەرىلەتىن كۇن. وبلىس اكىمدىگى عيماراتى الدىنداعى الاڭدا وبلىس مەكتەپتەرىن ءبىتىرۋشى تۇلەكتەردىڭ «جاس تۇلەك-2014» مەرەكەلىك سالتاناتى وتكىزىلدى. جۇرەكتەرى لۇپىلدەپ الىپ-ۇشقان تۇلەكتەردىڭ جۇزدەرىنەن قۋانىش سامالى ەسەدى. مەكتەپ بىتىرۋشىلەردى سالتاناتتى ساتپەن وبلىس اكىمىنىڭ ورىنباسارى سارا نۇرقاتوۆا قۇتتىقتاپ, ءسوز سويلەدى. – جاس ۇرپاققا ساپالى ءبى­لىم جانە سانالى تاربيە بەرۋدى نۇرسۇلتان نازارباەۆ ەشقاشان نازاردان تىس قالدىرعان ەمەس. مەملەكەت باسشىسى «قازاق­ستان – 2050: ءبىر ماق­سات, ءبىر مۇددە, ءبىر بولاشاق» اتتى بيىلعى جولداۋىندا «جيىرما ءبىرىنشى عاسىرداعى دامىعان ەل دەگەنىمىز بەلسەندى, ءبىلىمدى جانە دەنساۋلىعى مىقتى ازاماتتار» ەكەنىن اتاپ كورسەتتى. سىزدەردىڭ الدارىڭىزدا تولعان ماقسات, تولعان تاڭداۋ تۇر. سىزدەر تاۋەلسىز ەلىمىزدىڭ ەرتەڭى, «ماڭگىلىك ەلدىڭ» ازاماتتارىسىزدار. ەگەمەندى ەلىمىزدىڭ تۋى بەرىك بولۋى ءسىز­دەرگە بايلانىستى, – دەي كەلىپ سارا نۇرقاتوۆا وبلىستاعى ءبىلىم بەرۋ سالاسىنداعى قول جەتكەن جەتىستىكتەردى جىلىكتەپ جەتكىزدى. ماقسوت قۇسايىنوۆ اتىن­داعى دارىندى بالالارعا ارنالعان وبلىستىق مەكتەپ-ينتەرنات (112, 4 بالل), قازاق-تۇرىك ليتسەيى (111,2 بالل), وبلىستىق فيزيكا-ماتەماتيكا مەكتەپ-ينتەرناتى (109,4 بالل) سىندى مامانداندىرىلعان مەكتەپ-ينتەرناتتاردىڭ تۇلەكتەرى بۇل جولى دا جوعارى ناتيجەگە قول جەتكىزدى. اقتوبە قالاسى بويىنشا ورتاشا كورسەتكىش – 88,5 بالل بولدى. وبلىس ورتالىعىنداعى مەكتەپتەر اراسىندا «سىمبات» جەكە مەكتەبى جانە №51, №32, №21 مەكتەپ-گيمنازيالارى ەڭ جوعارى ناتيجەلەردى باعىندىردى. سون­داي-اق, تەمىر (91,2 بالل), حرومتاۋ (89 بالل), مۇعالجار (82,2 بالل), ويىل (80,9 بالل) جانە قارعالى (80,9 بالل) اۋداندارى رەسپۋبليكالىق دەڭگەيدەن جوعارى كورسەتكىشتەرگە جەتىپ وتىر. وتكەن جىلى وبلىسىمىز بويىنشا «التىن بەلگىدەن» ۇمىتكەر تۇلەكتەردىڭ 42,6 پايىزى شىن مانىندە ۇزدىك ەكەندىكتەرىن دالەلدەپ شىققان بولسا, بيىل بۇل كورسەتكىش 49,7 پايىزدى قۇرادى. «التىن بەلگىدەن» ۇمىتكەر 320 تۇلەكتىڭ 162-ءسى ۇبت-دا ءوز ءبىلىم دەڭگەي­لەرىن دالەلدەي الدى. مەرەكەلىك شارا بارىسىندا 162 تۇلەككە «التىن بەلگى» اتتەستاتى مەن پلانشەت سەرتيفيكاتى تابىس ەتىلدى.ۇلتتىق بىرىڭعاي تەستىلەۋدە ەڭ جوعارى 124 بالل جيناعان ماقسوت قۇسايىنوۆ اتىنداعى وبلىستىق دارىندى بالالارعا ارنالعان مامانداندىرىلعان مەكتەپ-ينتەرناتىنىڭ تۇلەگى, ۇزدىك اتتەستات يەگەرى جانار بولاتوۆا مەن «سىمبات» جەكە مەكتەبىنىڭ تۇلەگى. «التىن بەلگى» يەگەرى ايدانا مۇرات وبلىس اكىمىنىڭ ورىنباسارى سارا نۇرقاتوۆانىڭ قولىنان اۆتوكولىك كىلتتەرىن الدى. مەكتەپ بىتىرۋشىلەر اتىنان ءسوز العان ماقسوت قۇسايىنوۆ اتىنداعى وبلىستىق دارىندى بالالارعا ارنالعان مامانداندىرىلعان مەكتەپ-ينتەرناتىنىڭ تۇلەگى, «التىن بەلگى» يەگەرى دوسجان ايتۋعانوۆ ەلباسىنا, وبلىس اكىمدىگىنە جاستاردىڭ ءبىلىم الۋىنا جان-جاقتى جاعداي تۋعىزىپ وتىرعاندارى ءۇشىن العىس سەزىمىن جەتكىزدى, بۇگىنگى مەكتەپ بىتىرۋشىلەردىڭ تاۋەلسىز مەملەكەتىمىزدىڭ دامۋىنا ۇلەس قوساتىن ازاماتتار بولىپ شىعاتىنىنا سەندىردى. ساتىبالدى ءساۋىرباي, «ەگەمەن قازاقستان». اقتوبە وبلىسى.