جەرگىلىكتى جانكۇيەرلەر بيىل «اقسۋدان» جۇلدە كۇتەدى. كەزىندە ەلىمىزدىڭ 5 دۇركىن چەمپيونى اتانعان «ەرتىستىڭ» جەڭىستى ءداستۇرىن جالعاستىرارىنا سەنىمى مول. بىلتىر قازاقستان بىرىنشىلىگىنە تۇڭعىش رەت قاتىسقانىنا قاراماستان, جەرلەستەرىمىز ماۋسىمدى 6-ورىنمەن تۇيىندەپ, الا دوپ الامانى دەسە ىشكەن اسىن جەرگە قوياتىن فۋتبول جانكۇيەرلەرىن جوعارى ورىنداردان ۇمىتتەندىرىپ قويعان. ايتپەسە, ەرتىس جاعاسىندا ورنالاسقان قالادا كوپتەن بەرى فۋتبول تويى وتكىزىلمەگەنىن بىلايعى جۇرت جاقسى بىلەدى.
جاڭا ماۋسىمدا رۋسلان ەسىموۆ جەرگىلىكتى كوماندانى كاپيتان رەتىندە الاڭعا باستاپ شىعادى. كلۋب كاپيتانى «اقسۋدا» بىلتىرعى تامىزدان ويناي باستاعان, ال وعان دەيىن «ەكىباستۇز» بەن «ەرتىس», اقتاۋلىق «كاسپي», قىزىلجارلىق «قىزىلجار» كوماندالارىنىڭ نامىسىن جىرتقانى ءمالىم.
كوماندا قۇرامى بيىل 60 پايىزعا جاڭارعانىمەن, ونداعى 8 ويىنشىنىڭ پاۆلودار فۋتبول مەكتەبىنىڭ تۇلەگى ەكەنى قۋانتادى. ءوڭىردىڭ فۋتبول رەزەرۆىندەگى جاس فۋتبولشىلار «سپورت-سيتي» سپورت قالاشىعىنىڭ جابىق مانەجىندە جىل بويى جاتتىعۋعا مۇمكىندىك العان. الداعى ۋاقىتتا وڭىردە جاڭادان بەس مەكتەپ ستاديونى مەن 20-دان اسا شاعىن فۋتبول الاڭى سالىنادى دەپ جوسپارلانعان. وسىنىڭ بارلىعى ەرتىس-بايان وڭىرىندەگى فۋتبول دەڭگەيىن وسىرەدى دەگەن ءۇمىت زور.
ايتىپ وتەيىك, جەرگىلىكتى ويىنشىلاردان بولەك, بيىل كلۋبتىڭ ابىرويىن قىرعىزستان ۇلتتىق قۇراماسىنىڭ فۋتبولشىسى قايرات جىرعالبەك ۇلى, ۋكراينالىق ء«ماريۋپولدىڭ» تۇلەگى ارتۋر مۋرزا, قاباردين-بالقار فۋتبولىنىڭ وكىلى يسلام جيلوۆ, فينليانديا چەمپيوناتىنىڭ ەكى دۇركىن جەڭىمپازى فەيت وبيلور, برازيليالىق قورعاۋشى برايان گارسيا سيلۆا, سەربيالىق نيكولا ەسكيچ قورعايدى. ودان بولەك, كەزىندە «ليۆەرپۋلدە» ويناعان توني سيلۆا, نيگەريالىق چيدي وسۋكۆۋ, «بەنفيكادا» دوپ تەپكەن جيلسون كوستا, تاعى ءبىر برازيليالىق لۋيس گەدەش جانكۇيەرلەر سەنىمىن اقتايدى دەگەن ۇمىتتەمىز. «اقسۋ» العاشقى تۋر ويىنىن سىرت الاڭدا «توبىلمەن» وتكىزەدى.
پاۆلودار
