كەزدەسۋدى اشقان قارجى جانە بيۋدجەت كوميتەتىنىڭ توراعاسى سۇلتانبەك ماكەجانوۆ بۇل زاڭ جوباسى بيۋدجەت زاڭناماسىن جەتىلدىرۋگە جانە ەلىمىزدەگى الەۋمەتتىك-ەكونوميكالىق جاعدايدى جاقسارتۋعا باعىتتالعانىن اتاپ ءوتتى.
زاڭ جوباسى بيىلعى اقپان ايىندا 2023-2027 جىلدارعا ارنالعان بيۋدجەت كورسەتكىشتەرىن ناقتىلاۋعا بايلانىستى ازىرلەنگەنىن اتاپ وتكەن ءجون. ول سونىمەن قاتار وڭىرلەردىڭ ينفراقۇرىلىمىن دامىتۋعا, گاز جانە جىلۋمەن جابدىقتاۋ قۇبىرلارىن جاڭعىرتۋعا, ەلىمىزدىڭ ترانزيتتىك الەۋەتىن دامىتۋعا, ەكونوميكانىڭ ناقتى سەكتورىن جانە باسقا دا سالالاردى وركەندەتۋگە باعىتتالىپ وتىر.
سەناتورلارعا شاعىن جانە ورتا بيزنەستى دامىتۋعا قوسىمشا 152 ملرد تەڭگە, ال ەلىمىزدىڭ قورعانىس قابىلەتى مەن قاۋىپسىزدىگىن قامتاماسىز ەتۋگە 94,7 ملرد تەڭگە بولىنەتىنى ايتىلدى.
زاڭ جوباسىن ازىرلەۋشىلەردىڭ پىكىرىنشە, ول ازاماتتاردىڭ ءال-اۋقاتىن ارتتىرۋدى, مۇگەدەك ادامداردىڭ ءومىر ءسۇرۋ ساپاسىن جاقسارتۋدى جانە ازاماتتاردىڭ الەۋمەتتىك كەپىلدىكتەرىن قامتاماسىز ەتۋدى كوزدەيدى. ماسەلەن, حالىقتىڭ الەۋمەتتىك وسال توپتارى ءۇشىن كوممۋنالدىق تۇرعىن ءۇي قورىن تولىقتىرۋعا, الەۋمەتتىك كودەكس اياسىنداعى شارالاردى ىسكە اسىرۋعا جانە باسقا دا سالالارعا باعىتتالاتىن 234,4 ملرد تەڭگە مولشەرىندە قوسىمشا قارجى ءبولۋ جوسپارلانىپ وتىر.
پارلامەنت دەپۋتاتتارى تانىستىرىلىم بارىسىندا بيۋدجەتتىك زاڭناماعا وزگەرىستەر مەن تولىقتىرۋلاردىڭ كەيبىر تارماقتارى بويىنشا سۇراقتار قويىپ, ۇسىنىستارىن ورتاعا سالدى.
