سوڭعى جىلدارى پاۆلودار قالاسىنىڭ «ۋسولكا», «دوستىق» شاعىن اۋداندارىندا كوپقاباتتى تۇرعىن ۇيلەر ءۇستى-ۇستىنە سالىنىپ, بۇل اۋماقتارداعى مەكتەپ وقۋشىلارى ءۇشىن ورىن تاپشىلىعى قالىپتاسقان. بۇدان ەكى جىل بۇرىن ءوڭىردىڭ ءبىلىم بەرۋ باسقارماسى جەتىسپەۋشىلىكتى ازايتۋ ءۇشىن كەيبىر مەكتەپتەردى كەڭەيتۋ, ەندى ءبىرىن جاڭادان سالۋ جوبالارى جوسپاردا تۇرعانىن حابارلاعان بولاتىن. قالا مەكتەپتەرىنىڭ دەنىندە بالا سانى تىم كوپ, ال جاڭاسىن سالۋعا قاراجات جوق. ونىڭ ۇستىنە جىل سايىن مەكتەپكە بارۋشىلار سانى تۇراقتى تۇردە ءوسىپ كەلەدى.
مەملەكەت باسشىسى قاسىم-جومارت توقاەۆتىڭ ءبىلىم بەرۋگە قاتىستى تاپسىرمالارىنىڭ ناتيجەسىندە بۇل سالادا سەڭ قوزعالىپ, ماسەلە شەشىلە باستادى. 2023-2025 جىلدارى ەلىمىزدە 401 زاماناۋي مەكتەپ سالۋ جوسپارلانىپ وتىرعانى بەلگىلى. «Samruk-Kazyna Construction» اق مەكتەپ قۇرىلىستارىنىڭ بىرىڭعاي تاپسىرىس بەرۋشىسى رەتىندە بەلگىلەندى. كومپانيا الداعى ءۇش جىل ىشىندە وبلىس ورتالىعىنداعى «دوستىق», «ۋسولكا», «شىعىس» جانە «جاستار» شاعىن اۋداندارىنىڭ ارقايسىسىندا 1 200 ورىندىق ءتورت جاڭا مەكتەپ سالۋدى جوبالاپ وتىر. تاعى ءۇش ءبىلىم ورداسىندا, اتاپ ايتقاندا № 4, 22, 27 مەكتەپتەردىڭ جانىنان ارقايسىسى 1 200 وقۋشىعا ارنالعان جاڭا كورپۋستار سالىنادى.
قازىرگى ۋاقىتتا ءبىر عانا پاۆلودار قالاسىندا 7 مىڭ وقۋشىعا ورىن تاپشى. وڭىرلىك ءبىلىم بەرۋ باسقارماسىنىڭ مالىمەتىنە سۇيەنسەك, 8 مەكتەپتە وقۋشىلار ءۇش اۋىسىممەن وقيدى. اۋىلدىق جەرلەردە دە توزىپ تۇرعان ورتا وقۋ ورىندارى بار. جاڭادان تۇرعىزىلاتىن مەكتەپتەردىڭ بارلىعى بىرىڭعاي ستاندارتپەن جوبالانىپ, زامانعا ساي جابدىقتالادى. بولاشاق ءبىلىم وشاقتارىنىڭ قۇرىلىسى الداعى ايدان قولعا الىنادى دەپ كۇتىلىپ وتىر.
وبلىس اكىمى اسايىن بايحانوۆ پەن «Samruk-Kazyna Construction» اق باسقارما توراعاسى ماۋلەن ايمانبەتوۆ «جايلى مەكتەپ» جوباسىن جۇزەگە اسىرۋ بويىنشا كەزدەسۋ وتكىزىپ, ارنايى جەر ۋچاسكەلەرىن ءبولۋ, ينجەنەرلىك كوممۋنيكاتسيالاردى جۇرگىزۋ, بولاشاق مەكتەپتەردى جوعارى جىلدامدىقتى ينتەرنەتپەن قامتاماسىز ەتۋ ماسەلەلەرىن پىسىقتادى. عيماراتتاردى سالۋ كەزىندە جەرگىلىكتى قۇرىلىس ماتەريالدارى مەن وتاندىق جابدىقتاردى پايدالانۋ ۇسىنىلدى. ءوڭىر باسشىسى جەرگىلىكتى جاۋاپتى مەكەمەلەرگە قۇرىلىس جۇرەتىن اۋماقتارداعى جەر تەلىمدەرىن ۋاقىتىندا راسىمدەۋدى, سىرتقى ينجەنەرلىك جەلىلەردى جەدەلدەتىپ تارتۋدى تاپسىردى.
پاۆلودار وبلىسى
