كۇنشىعىس ەلىندەگى ءبىزدىڭ باستى ءۇمىتىمىز ميحايل شايدوروۆ ەكەنى ەش داۋ تۋعىزباسا كەرەك. ال سول سپورتشى جايىندا ءبىز نە بىلەمىز؟ ميحايل 2004 جىلدىڭ 25 ماۋسىمىندا الماتىدا دۇنيەگە كەلگەن. ونىڭ اكەسى ستانيسلاۆ تا وسى سپورت ءتۇرىن سەرىك ەتىپ, كەزىندە قازاقستاننىڭ بىرنەشە دۇركىن چەمپيونى اتانعان. كەيىننەن باپكەرلىك كاسىپتىڭ قامىتىن كيىپ, وزگە جاس ورەندەرمەن بىرگە ءوز ۇلىن دا ءدۇبىرلى دودالارعا دايىندادى. الاتاۋ باۋرايىنان باستاۋ العان جاتتىعۋ جۇمىستارى كەيىننەن ماسكەۋدە ءوز جالعاسىن تاپتى. ۋاقىت وزا شايدوروۆ 1994 جىلى ليللەحاممەردە وتكەن وليمپيا ويىندارىنىڭ جەڭىمپازى, الەم چەمپيوناتىنىڭ قولا جۇلدەگەرى, ەۋروپا چەمپيونى الەكسەي ۋرمانوۆتىڭ قول استىندا شەبەرلىگىن شىڭدادى.
دارىندى جاس كوپ ۇزاماي ءوز قاتارىنىڭ الدى بولدى. ول 2019 جىلى جاستار اراسىنداعى قازاقستان بىرىنشىلىگىندە توپ جارسا, كەلەسى جىلى ەرەسەكتەردىڭ ەل چەمپيوناتىندا باس جۇلدەنى ولجالادى. بۇعان قوسا شايدوروۆ ماسكەۋدەگى رۋستەر كۋبوگى مەن ىستانبۇلداعى بوسفور كۋبوگى جانە گدانسكىدەگى گران-پري سايىسىندا كۇمىسپەن كۇپتەلدى. بولگاريانىڭ استاناسىندا ۇيىمداستىرىلعان «Sofia Trophy» تۋرنيرىندە قولاعا قول سوزدى.
جەرلەسىمىز 2021 جىلى ستوكگولمدە وتكەن الەم چەمپيوناتىنا دا قاتىستى. بىراق ساقا سپورتشىلار باس قوسقان بايراقتى باسەكەدە 16 جاستاعى جاس ورەن سەنىم ۇدەسىنەن شىعا الماي, كوش سوڭىندا قالىپ قويدى. دەسەك تە بۇل ساتسىزدىك ميحايلدىڭ جىگەرىن جاسىتا العان جوق. ول تىڭباي ەڭبەكتەنىپ, شەبەرلىگىن شىڭداي ءتۇستى. جاتتىعۋ ۇدەرىسىنە جاڭا ەلەمەنتتەر ەنگىزدى. ناتيجەسى جامان بولعان جوق. بىلتىر ءساۋىر ايىندا تالليندە جالاۋى جەلبىرەگەن جاستار اراسىنداعى الەم بىرىنشىلىگىندە شايدورين كۇمىس مەدالدى موينىندا جارقىراتتى. اتالعان جارىستا ول تەك اقش-تىڭ جاس جۇلدىزى يليا مالينينگە جول بەردى. ال جاپونيالىق تاتسۋيا تسۋبويعا قولا مەدال بۇيىردى. وسىلايشا, ونىڭ ەسىمى جاستاردىڭ دۇنيەجۇزىلىك دوداسىندا جۇلدە العان قازاقستاننىڭ تۇڭعىش مانەرلەپ سىرعاناۋشىسى رەتىندە تاريحتا قالدى.
جۇپتىق سايىستا سىنعا تۇسكەلى وتىرعان سپورتشىلار جايىندا ايتار بولساق, 22 جاستاعى گاۋھار ناۋرىزوۆا اقتاۋ قالاسىندا دۇنيەگە كەلدى. 24 جاستاعى بويسانگۋر داتيەۆ – رەسەيدىڭ تۋماسى. ولار 2016 جىلدان بەرى بىرگە ونەر كورسەتىپ كەلەدى. ەكەۋى دە ماسكەۋدە جاتتىعادى. العاشىندا بۇل جۇپ الەكساندر جۋليننەن ءتالىم-تاربيە السا, كەيىننەن انجەليكا كرىلوۆانىڭ قول استىنا ءوتتى. بۇل مامانداردىڭ دا ەسىمدەرى جانكۇيەرلەرگە جاقسى تانىس. ەكەۋى دە – ءار جىلدارى وليمپيا ويىندارىندا جۇلدە الىپ, الەم چەمپيونى اتانعان ناعىز مايتالماندار. ازىرگە ناۋرىزوۆا مەن داتيەۆ حالىقارالىق ارەنادا اۋىز تولتىرىپ ايتارلىقتاي تابىستارعا قول جەتكىزە الماعانىمەن, ەلىشىلىك جارىستاردا الدىنا جان سالماي ءجۇر.
ەستەرىڭىزگە سالا كەتەيىك, بىلتىر فرانتسيانىڭ مونپەلە قالاسىندا وتكەن الەم چەمپيوناتىندا جاپونيا قۇراماسى وتە تاماشا ونەر كورسەتىپ, ءتورت بىردەي جۇلدەگە قول جەتكىزگەن ەدى. اتاپ ايتساق, سەما ۋنو (ەرلەر) مەن كاوري ساكاموتو (ايەلدەر) التىن تۇعىرعا كوتەرىلسە, يۋما كاگياما (ەرلەر) مەن ريكۋ ميۋرا/ريۋيتي كيحارا (سپورتتىق جۇپ) كۇمىس مەدالدى يەلەندى. 1 التىن, 1 كۇمىس جانە 3 قولانى قورجىنعا سالعان اقش-تىڭ سپورتشىلارى ەكىنشى ورىنعا تابان تىرەدى. بۇل ەلدىڭ ورەندەرى اراسىنان الەكسا كنيريم/برەندون فرەيزەر (سپورتتىق جۇپ) الدىنا جان سالمادى. ءۇشىنشى ورىندا – فرانتسيا. جارىس قوجايىندارىنا جالعىز التىندى سىيعا تارتقان – گابريەلا پاپاداكيس/گيوم سيەزەرون جۇبى (مۇزداعى بي). سونداي-اق اتالعان جارىستا بەلگياعا ءبىر كۇمىس جانە كاناداعا ءبىر قولا مەدال بۇيىردى.
