ەلۋ جىلدان استام ۋاقىت بويى تانىمال توپتىڭ كوركەمدىك جەتەكشىسى قىزمەتىن اتقارىپ كەلە جاتقان مۇرات قۇسايىنوۆتىڭ مەرەيتويىنا ارنالعان ءىس-شاراعا ءوڭىر باسشىسى نۇرجان نۇرجىگىتوۆ ارنايى قاتىسىپ, ونەر الەمىنىڭ وشپەس جۇلدىزىن مەرەيلى جاسىمەن قۇتتىقتادى.
– قازاق ونەرىندە وشپەس ورنى بار ايگىلى ەسترادالىق ۆوكالدى اسپاپتار ءانسامبلىن ءار بۋىن, اسىرەسە ءبىزدىڭ قاتارلاستار مەن اعا بۋىن قاتتى قۇرمەتتەيدى. ەلۋ جىلدان استام ۋاقىت بويى ونەردىڭ ورىنەن كورىنىپ, تورىنەن تۇسپەگەن «دوس-مۇقاساننىڭ» رەترو اندەرى ەشقاشان ولمەك ەمەس. ءانسامبلدىڭ نەگىزىن قالاۋشىلاردىڭ ءبىرى, دارابوز ءانشى, بەلگىلى كومپوزيتور مۇرات اعانى مەرەيتويىمەن قۇتتىقتايمىز. كەنەن ازىرباەۆ تۋعان قاسيەتتى قوردايدىڭ تۋماسى رەتىندە سىزبەن ارقاشان ماقتانامىز. ويتكەنى ونەر الەمىندەگى ەسەلى ەڭبەگىڭىز ەلدىڭ كوز الدىندا. اسىرەسە بالا كەزىمىزدەن تىڭداپ وسكەن «توي جىرى» ءانى ءالى كۇنگە دەيىن حالىقپەن بىرگە جاساپ كەلەدى. سول ۋاقىتتان بەرى ۇيلەنۋ تويلارىنىڭ «گيمنىنە» اينالعانى دا راس. انسامبل رەپەرتۋارىنداعى ءوز شىعارمالارىڭىزدان بولەك, حالىق اندەرى دە حالىقتىڭ جۇرەگىنەن وشپەيدى, – دەدى ن.نۇرجىگىتوۆ.
م.قۇسايىنوۆتىڭ مەرەيتويىنا ارنالعان كونتسەرتكە جينالعان اعا بۋىن وكىلدەرى جاستىق شاقتى ەسكە الىپ, رەترو اندەردى سۇيىكتى انشىلەرىمەن قوسىلىپ شىرقادى. ونەردىڭ تورىنەن تۇسپەگەن بەلگىلى انسامبل مۇشەلەرىنە قوشەمەت كورسەتتى.
تاراز
