باعدات مۋسين Instagram-پاراقشاسىندا جاڭا فۋنكتسيانىڭ بۇگىن, 1 ناۋرىزدا قولجەتىمدى بولعانىن ايتتى.
«بىرنەشە اي بۇرىن ەلوردالىق اسكەري كوميسسارياتتاردىڭ بىرىنە بارىپ, قورعانىس مينيسترلىگىنىڭ وكىلدەرىمەن بىرگە وسى سالانى تسيفرلاندىرۋ جوسپارلارىن تالقىلاعانبىز. سوندا كوتەرىلگەن ماسەلەلەردىڭ ءبىرى - اسكەرگە شاقىرىلاتىن جاستاردى اسكەري قىزمەتكە شاقىرۋدان بوساتۋ نەمەسە كەيىنگە قالدىرۋ ماقساتىندا تالاپ ەتىلەتىن انىقتامالاردان ارىلتۋ بولاتىن. ول ءۇشىن بىرنەشە جۇيەنى بىرىكتىرۋ قاجەت ەدى. اراعا ۋاقىت سالىپ, بىرلەسكەن جۇمىستىڭ ارقاسىندا ناتيجەگە قولجەتكىزدىك. ماسەلەن, بيىل 1 ناۋرىزىنان باستاپ ازاماتتار تولىپ جاتقان انىقتامالار مەن قۇجاتتاردى ۇسىنباي, اسكەري قىزمەتتى وتكەرۋ تۋرالى ءوز مارتەبەسىن ءبىر جۇيەدەن بىلە الادى», دەپ جازدى مينيستر.
ءمينيستردىڭ ايتۋىنشا, «ۇلتتىق اقپاراتتىق تەحنولوگيالار» اق جانە قورعانىس مينيسترلىگىمەن بىرلەسىپ, قازاقستاندىقتاردى اسكەرگە شاقىرۋدان بوساتۋ جانە كەيىنگە قالدىرۋ تۋرالى اقپارات بەرەتىن پرواكتيۆتى مەملەكەتتىك قىزمەتتى ىسكە قوسقان.
«اسكەرگە بارۋعا مىندەتتى ەر ادامدارعا, ياعني 18-27 جاستاعى ازاماتتارعا اسكەردەن بوساتۋ نەمەسە كەيىنگە قالدىرۋ بويىنشا ءتيىستى اقپارات تەلەفوندارىنا حابارلاما رەتىندە جولدانادى. ءموبيلدى ازاماتتار بازاسىندا تىركەلگەن قازاقستاندىقتار عانا حابارلاما الاتىنىن اتاپ ءوتۋ كەرەك», دەلىنگەن جازبادا.
