بىلتىر ول «Talapai» ستارتاپ يدەسىن قۇرىپ, ەۇۋ بيزنەس-ينكۋباتورىن دامىتۋ بايقاۋىندا قارجىلاي سىيلىق ۇتىپ الدى. اينۇردىڭ جوباسى ەرەكشە ۇلتتىق ديزاينمەن جاسالىپ, ونىڭ «بەس تاس», «قۇمار», «اعاش ءۇي» بەستەمشەسى, «تۇمار» بەستەمشەسى, «توعىزقۇمالاق» ويىندارى ۇلتتىق ويۋ-ورنەككە باي قورجىن تۇرىندە ۇسىنىلعان. اۆتوردىڭ ءۇش اي بۇرىن باستالعان «Talapai» جوباسى قازىردىڭ وزىندە وتە تانىمال. ونىڭ ايتۋىنشا, ۇلتتىق ويىندى ساتىپ الۋعا وتىنىشتەر تەك ەلىمىزدەن عانا ەمەس, تۇركيا, اقش, نيدەرلاند ءتارىزدى شەتەلدەردەن دە كەلىپ تۇسكەن.
– قازىر شەتەلدىك ۇستەل ويىندارىن كوپ كەزدەستىرەسىز. سوندىقتان مەن ءوزىمىزدىڭ ۇلتتىق ويىندارىمىزدى زاماناۋي ۇلگىدە نەگە دارىپتەمەسكە دەپ ويلادىم. «Talapai» يدەياسى وسىلاي پايدا بولدى. ءار ويىن سومكە ءتارىزدى اعاشتان جاسالعان قوراپتا ۇسىنىلعان. ونى بارلىق جەردە الىپ جۇرۋگە وتە ىڭعايلى. وتە جەڭىل. باستىسى – اعاش سومكە كوپفۋنكتسيونالدى, ونى اشىپ, ويىن ويناۋعا بولادى, – دەيدى ا. پولاتوۆا.
الداعى ءساۋىر ايىندا ول «Louis Vuitton» وكىلدەرىمەن كەزدەسپەك. ونىڭ كيىز ءۇي ءتارىزدى سومكە جاساۋ تۋرالى ۇسىنىسىن الەمدەگى ايگىلى برەندتەردىڭ ءبىرى قولداپ, ديزايندى تالقىلاۋعا پاريجگە شاقىردى.
«جارنامادان «Louis Vuitton» ءبىزدىڭ كيىز ۇيگە ۇقساس دۇكەن اشقانىن كورىپ قالدىم. بۇل مەنى قىزىقتىرىپ, وعان كيىز ءۇي ءتارىزدى سومكە جاساۋ تۋرالى ۇسىنىس حات جازدىم. ەكى اپتادان كەيىن كومپانيا مەنىڭ ۇسىنىسىما قىزىعۋشىلىق ءبىلدىرىپ, وزدەرىنىڭ جاۋاپ حاتىندا يدەيانى ودان ءارى تالقىلاۋ ءۇشىن پاريجگە شاقىردى», دەدى ول.
بۇگىندە اينۇر پولاتوۆا گەرمانياداعى گەتە اتىنداعى فرانكفۋرت ۋنيۆەرسيتەتىندە ەۇۋ اكادەميالىق ۇتقىرلىق باعدارلاماسىمەن وقىپ ءجۇر.
