پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردىنىڭ ەنتوني بلينكەنمەن كەزدەسۋى اياسىندا تاراپتار ەكىجاقتى جانە حالىقارالىق كۇن تارتىبىندەگى وزەكتى ماسەلەلەردى تالقىلادى, سونداي-اق ەكىجاقتى ساياسي ديالوگتى دامىتۋدىڭ ماڭىزدىلىعىن اتاپ ءوتتى.
ەلدەر اراسىنداعى, اسىرەسە ىنتىماقتاستىقتىڭ ەكونوميكالىق جانە ينۆەستيتسيالىق سالالارىنداعى قاتىناستاردىڭ بارلىق كەشەنىن ودان ءارى جانداندىرۋعا ءۇمىت ءبىلدىرىلدى.
«كۇشەيتىلگەن ءوزارا ءىس-قيمىلدىڭ قولدانىستاعى تەتىكتەرى – كەڭەيتىلگەن ستراتەگيالىق ارىپتەستىك جونىندەگى كوميسسيا جانە ادام قۇقىقتارى مەن دەموكراتيالىق رەفورمالار جونىندەگى جوعارى دەڭگەيدەگى ديالوگ قازاقستان مەن قۇراما شتاتتارى اراسىنداعى ەكىجاقتى ارىپتەستىكتى نىعايتۋعا كومەكتەسەدى», دەپ اتاپ ءوتتى م. تىلەۋبەردى.
مەملەكەتتىك حاتشى قر پرەزيدەنتى قاسىم-جومارت توقاەۆتىڭ ساياسي جانە ەكونوميكالىق رەفورمالارىنا بەرىك قولداۋ ءبىلدىرىپ, دەموكراتيالىق دامۋ, زاڭ ۇستەمدىگىن نىعايتۋ جانە ازاماتتىق قوعامنىڭ ءرولىن كەڭەيتۋ سالاسىنداعى ىنتىماقتاستىققا دايىن ەكەندىگىن راستادى.
ەنەرگەتيكالىق قاۋىپسىزدىك, كليماتتىق وزگەرىستەر, كولىك مارشرۋتتارىن ءارتاراپتاندىرۋ جانە سانكتسيالىق شەكتەۋلەر جاعدايىندا ءوزارا ساۋدا سالاسىنداعى ىنتىماقتاستىقتى ىلگەرىلەتۋدە تاراپتاردىڭ مۇددەلەرىن ەسكەرۋ قاجەتتىلىگى تۋرالى ءوزارا تۇسىنىستىككە قول جەتكىزىلدى.
قازاقستاندىق ءسىم-دە قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى, اقش مەملەكەتتىك حاتشىسى ەنتوني بلينكەن, قىرعىزستاننىڭ سىرتقى ىستەر ءمينيسترى جەەنبەك كۋلۋباەۆ, تاجىكستاننىڭ سىرتقى ىستەر ءمينيسترى سيرودجيددين مۋحريددين, تۇرىكمەنستاننىڭ سىرتقى ىستەر ءمينيسترى راشيد مەرەدوۆ پەن وزبەكستاننىڭ سىرتقى ىستەر ءمينيسترى باحتيور سايدوۆتىڭ قاتىسۋىمەن س5+1 فورماتىندا جوعارى دەڭگەيدەگى كەزەكتى كەزدەسۋى ءوتتى.
مينيسترلىك كەزدەسۋىندە ەكونوميكالىق جانە ەنەرگەتيكالىق ىنتىماقتاستىق, كليماتتىڭ وزگەرۋى, سونداي-اق كونترتەرروريزمدى قوسا العاندا كوپتەگەن ماسەلەلەر تالقىلاندى.
كەلىسسوزدەر ناتيجەسىندە س5+1 ەلدەرى ءوزارا قىزىعۋشىلىق تۋدىراتىن ماسەلەلەر بويىنشا پىكىر الماسۋدى ودان ءارى جالعاستىرۋعا كەلىستى.
بۇگىندە س5+1 تەتىگى ورتالىق ازيانىڭ كوپجوسپارلى دامۋىن قامتاماسىز ەتۋ ىسىندە وڭىرلىك ىنتىماقتاستىقتىڭ ءتيىمدى ديپلوماتيالىق الاڭى رەتىندە ءوزىن كورسەتىپ كەلەدى.
