الدىمەن ورتالىق سايلاۋ كوميسسياسىنىڭ توراعاسى نۇرلان ءابدىروۆ تمد باس حاتشىسىنىڭ ءبىرىنشى ورىنباسارى ل.انفيموۆپەن كەزدەسىپ, الداعى سايلاۋ ناۋقانىنىڭ نەگىزگى كەزەڭدەرى تۋرالى اقپارات بەردى. اتاپ ايتساق, پارتيالىق تىزىمدەردى تىركەۋ قورىتىندىلارى, ساياسي پارتيالاردىڭ اتاۋلارىن سايلاۋ بيۋللەتەنىنە ەنگىزۋ بويىنشا جەرەبە تارتۋ ناتيجەلەرى, جالپى پارلامەنت ءماجىلىسىنىڭ دەپۋتاتتىعىنا كانديداتتاردى تىركەۋ, ونىڭ ىشىندە ءبىر مانداتتى اۋماقتىق وكرۋگتەر بويىنشا سايلانعان كانديداتتاردى تىركەۋ جانە حالىقارالىق بايقاۋشىلاردى اككرەديتتەۋ بارىسىن باياندادى. وسك توراعاسىنىڭ ايتۋىنشا, بۇگىنگى تاڭدا 16 شەت مەملەكەت پەن 4 حالىقارالىق ۇيىمنان 163 حالىقارالىق بايقاۋشى اككرەديتتەلگەن.
سونداي-اق ول تمد بايقاۋشىلارى ميسسياسىنا ەلىمىزدە بۇعان دەيىن وتكىزىلگەن سايلاۋلارعا تۇراقتى قاتىسقانى ءۇشىن العىس ايتىپ, ميسسيانىڭ وسى سالاداعى ۇلكەن تاجىريبەسىن اتاپ ءوتتى. ال ميسسيانىڭ جۇمىسىن تمد باس حاتشىسىنىڭ ءبىرىنشى ورىنباسارى لەونيد انفيموۆ ارنايى بريفينگتە تانىستىردى.
– بۇل ءبىزدىڭ قازاقستانداعى پارلامەنت جانە پرەزيدەنت سايلاۋىنداعى 17-ءشى جانە جالپى تمد كەڭىستىگىندەگى 120-شى ميسسيامىز ەكەنىن اتاپ وتكىم كەلەدى. تمد بايقاۋشىلارى ميسسياسىنىڭ قۇرامىنا تمد مەملەكەتتەرى وكىلدەرىنەن بولەك, تمد-داعى قاتىسۋشى مەملەكەتتەردىڭ پارلامەنتارالىق اسسامبلەياسىنىڭ, ۇقشۇ پارلامەنتتىك اسسامبلەياسىنىڭ, بەلارۋس پەن رەسەي پارلامەنتتىك اسسامبلەياسىنىڭ, تمد اتقارۋشى كوميتەتىنىڭ بايقاۋشىلارى كىرەدى. تمد بايقاۋشىلارى ميسسياسى مۇشەلەرىنىڭ جالپى سانى شامامەن 200 ادامدى قۇرايدى. كەشە تمد بايقاۋشىلار ميسسياسى استانادا جۇمىسىن باستادى, – دەدى ل.انفيموۆ.
سونىمەن قاتار ميسسيا وكىلدەرى ساياسي پارتيالاردىڭ سايلاۋالدى شتابتارىمەن, دەپۋتاتتىققا كانديداتتارمەن بىرنەشە كەزدەسۋ وتكىزىپ, بارلىق دەڭگەيدەگى سايلاۋ ۋچاسكەسىنىڭ جۇمىسىمەن تانىسادى. بايقاۋشىلاردىڭ نەگىزگى توبى داۋىس بەرۋگە 2-3 كۇن قالعاندا, ياعني 16-17 ناۋرىزدا استاناعا كەلەدى دەپ جوسپارلانعان. ميسسيا بايقاۋشىلارى داۋىس بەرۋ بارىسىن تەك استانادا عانا ەمەس, ەلدىڭ وزگە دە وڭىرلەرىندە بايقايتىن بولادى.
