شارباقتى اۋدانىندا «ايبارىس» كومپانياسى رافينادتالعان كۇنباعىس مايىن شىعاراتىن ءوندىرىستى جولعا قويماق نيەتتە. ينۆەستور قازىرگى كۇنى قاجەتتى جەر تەلىمىن راسىمدەپ, ىسكە كىرىسە باستاعان. وندىرىستە ەڭ وزىق تەحنولوگيالاردى قولدانامىز دەپ قۇلشىنىپ وتىرعان كاسىپكەر كۇنباعىس تۇقىمىن تەرەڭدەتىپ وڭدەۋ ارقىلى ساپالى ماي ايىرىپ الاتىنىنا سەنىمدى. جاڭا كاسىپورىندى سالۋ مەن جابدىقتاۋدىڭ قۇنى 20 ملرد تەڭگەگە باعالانادى. بۇل قاراجاتتىڭ 60 پايىزى – «ايبارىستىڭ» جەكە ينۆەستيتسياسى.
پاۆلودار وبلىسى اكىمىنىڭ ورىنباسارى سەرىك باتىرعوجينوۆتىڭ سوزىنشە, جوبانىڭ ناتيجەسىندە, ايماعىمىز ساپالى كۇنباعىس مايىمەن ءوزىن تولىق قامتاماسىز ەتەدى.
– كومپانيانىڭ جوبانى جۇزەگە اسىرۋعا دەگەن ىسكەرلىك نيەتى ءبىزدى قۋانتىپ وتىر. ءبىز قاجەت قاراجاتتىڭ 43 پايىزىن جەڭىلدەتىلگەن نەسيە نەمەسە دامۋ ينستيتۋتتارى ارقىلى الۋدى ۇسىندىق. مۇندا قولدانىلاتىن تەحنولوگيا دامىعان مەملەكەتتەردىڭ زاۋىتتارىنداعىداي بولادى. ينۆەستوردىڭ شارباقتى اۋدانىن تاڭداپ وتىرعانى دا تەگىننەن تەگىن ەمەس. بۇل اۋدان استىقتى ايماق بولعاندىقتان كۇنباعىس ءدانى مولىنان وسىرىلەدى. ەكىنشىدەن, رەسەي فەدەراتسياسى جاقىن. كاسىپورىن ءوز قۋاتتىلىعىنا شىققاندا جەرگىلىكتى نارىقتان ارتىلعان ءونىمدى ىرگەدە تۇرعان رەسەي ەلىنە دە ەكسپورتتاي الادى. جەرگىلىكتى ديقاندار زاۋىتتى قاجەت شيكىزاتپەن قامتاماسىز ەتۋگە قاۋقارلى, دەيدى ول.
كەلەشەكتە زاۋىت ورىن تەبەتىن جەردە قازىرگى كۇنى تەمىرجول تارتىلا باستاعان. كۇنباعىس تۇقىمىنان ماي اجىراتاتىن ءوندىرىس تولىق ىسكە قوسىلعاندا ول ايىنا 50 توننا ءونىم بەرەدى دەپ كۇتىلەدى. ناتيجەسىندە, ايماعىمىز ءوزىن ءونىمنىڭ بۇل تۇرىمەن تولىقتاي قامتاماسىز ەتۋگە قول جەتكىزەدى.
پاۆلودار وبلىسى اگروونەركاسىپ كەشەنىنە ينۆەستيتسيالار تارتۋ بويىنشا سوڭعى ەكى جىلدا رەسپۋبليكادا الدىڭعى ورىندا تۇرعانىن ايتۋ كەرەك. 2022 جىلدىڭ قورىتىندىسىندا اۋىل شارۋاشىلىعىنىڭ نەگىزگى كاپيتالىنداعى ينۆەستيتسيالار 1,2 ەسە ءوسىپ, 136 ملرد تەڭگەنى قۇراعان. ال ازىق-ت ۇلىك تاۋارلارى وندىرىسىنە ەنگىزىلگەن ينۆەستيتسيا كولەمى 1,4 ەسە ارتىپ, 6,7 ملرد تەڭگەنى كورسەتىپتى. جالپى قۇنى 22 ملرد تەڭگە تۇراتىن 16 ءىرى ينۆەستيتسيالىق جوبا ىسكە اسىپ, وڭىردەگى اگروسەكتوردا جاڭا كاسىپورىندار, جۇزدەگەن جاڭا جۇمىس ورىندارى پايدا بولدى. اۋىل شارۋاشىلىعىنا جاۋاپتىلار بيىل دا بۇل ۇدەدەن تومەندەمەيمىز دەپ وتىر.
وڭىردە ورگە باسپاي تۇرعان جوبانىڭ ءبىرى – قانت زاۋىتىنىڭ قۇرىلىسى. قازاقستانداعى قانت تاپشىلىعىن شەشەدى دەپ سەنىم ارتىلعان بۇل جوبا ءاۋ باستان-اق شەتەل ينۆەستورلارىنىڭ كومەگىمەن جۇزەگە اسۋى كەرەك دەلىنگەن. الايدا شەتەلدەن كەلىسسوزگە كەلىپ جاتقان بيزنەسمەندەر قر زاڭناماسىندا قاراستىرىلماعان ۇسىنىستاردى العا تارتىپ, جەر بەرۋدى سۇراپ وتىرعان كورىنەدى. ال جەر تۋرالى زاڭنامادا اۋىل شارۋاشىلىق جەرلەرىن شەتەل ازاماتتارىنا بەرۋگە تىيىم سالىنعان.
«پاۆلودار» اكك بۇگىندە بولاشاق قانت زاۋىتىنىڭ جوباسىن ازىرلەۋ ۇستىندە. جۋىقتا كورپوراتسيا فرانتسيالىق ينۆەستورمەن العاشقى كەلىسسوز جۇرگىزگەن.
– جوبانى قارجىلاندىرۋعا نيەت تانىتقان شەتەلدىكتەر ءوز ينۆەستيتسياسىن قورعاۋدى جانە شيكىزاتپەن قامتاماسىز ەتۋدى تالاپ ەتەدى. كەيبىرى اۋىل شارۋاشىلىق ماقساتىنداعى جەر تەلىمدەرىن بەرۋدى سۇرايدى. شيكىزاتپەن قامتۋ تۇرعىسىندا ءبىز كومپانيالارعا وڭىردە قانشا سۋارمالى جەر بارىن, قانداي مۇمكىندىكتەر قاراستىرىلعانىن باياندادىق. قازىردىڭ وزىندە ءۇش-ءتورت ينۆەستورمەن كەلىسسوزدەر جۇرۋدە. ونىڭ ۇستىنە بولاشاق زاۋىتتىڭ جوبالىق-سمەتالىق قۇجاتتاماسى ءالى دە ازىرلەنۋ ۇستىندە. سوندىقتان قازىر ناقتى شەشىمىن ايتۋ قيىن, دەيدى س.باتىرعوجينوۆ.
پاۆلودار وبلىسى
