ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا, بيىل مۇگەدەكتىگى جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردى ء(ماج) تولەۋگە رەسپۋبليكالىق بيۋدجەتتەن 40 ملرد تەڭگە جۇمسالدى. بۇعان قوسىمشا مەملەكەتتىك الەۋمەتتىك ساقتاندىرۋ قورىنان ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ بويىنشا شامامەن 5 ملرد تەڭگە سوماسىنا الەۋمەتتىك تولەمدەر بەرىلدى.
1 اقپانداعى دەرەككە سۇيەنسەك, شامامەن 531,3 مىڭ ادام – مۇگەدەكتىگى بويىنشا, 190,8 مىڭ ادام – اسىراۋشىسىنان ايىرىلۋ جاعدايى بويىنشا ءماج الۋشىلار ساناتىندا.
مۇگەدەكتىگى بويىنشا ءماج كولەمى مۇگەدەكتىكتىڭ توبىنا جانە سەبەبىنە, سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەنگى كۇنكورىس دەڭگەيىنىڭ شاماسىنا بايلانىستى بولادى. ال اسىراۋشىسىنان ايىرىلۋ جاعدايى بويىنشا جاردەماقى كولەمى قايتىس بولعان اسىراۋشىنىڭ اسىراۋىنداعى ادامداردىڭ سانىنا, قايتىس بولۋ سەبەپتەرىنە جانە ەڭ تومەنگى كۇنكورىس دەڭگەيىنە بايلانىستى.
سونىمەن قاتار مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ كولەمى 2023 جىلعى 1 قاڭتاردان باستاپ ەڭ تومەنگى كۇنكورىس دەڭگەيىنىڭ ۇلعايۋىنا بايلانىستى 8,5%-عا ءوستى. مىسالى, 2023 جىلعى 1 قاڭتاردان باستاپ جالپى اۋرۋدان مۇگەدەكتىگى بويىنشا ءماج كولەمى 1-توپ ءۇشىن – 77 889 تەڭگەنى, 2-توپ ءۇشىن – 62 068 تەڭگەنى, 3-توپ ءۇشىن 42 190 تەڭگەنى قۇرايدى.
بۇعان قوسا مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا الەۋمەتتىك تاۋەكەلدەر تۋىنداعان جاعدايدا ماسق-دان الەۋمەتتىك تولەمدەر جۇزەگە اسىرىلادى. ماسەلەن, بيىل قاڭتار ايىندا 83,3 مىڭ ادام ەڭبەك ەتۋ قابىلەتىنەن ايىرىلۋ بويىنشا الەۋمەتتىك تولەم, ال 56 مىڭعا جۋىق وتباسى اسىراۋشىسىنان ايىرىلۋ بويىنشا الەۋمەتتىك تولەم الدى.
تولەمدەردىڭ كولەمىن بەلگىلەۋدە كەيىنگى ەكى جىلداعى ماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىس, ەڭبەككە قابىلەتتىلىگىنەن ايىرىلۋ كوەففيتسيەنتتەرى, اسىراۋىنداعى ادامدار سانى, مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى جانە تابىستى اۋىستىرۋ سياقتى دەرەكتەر قاپەرگە الىنادى. بۇل تولەمدەر رەسپۋبليكالىق بيۋدجەتتەن تولەنەتىن ۇقساس جاردەماقىلارعا قوسىمشا جۇزەگە اسىرىلادى.
بۇگىنگى تاڭدا ەڭبەككە قابىلەتتىلىگىنەن ايىرىلۋ بويىنشا الەۋمەتتىك تولەمدەردىڭ ورتاشا مولشەرى – 33 146 تەڭگەنى, اسىراۋشىسىنان ايىرىلۋ بويىنشا 34 349 تەڭگەنى قۇرايدى.
سونىمەن قاتار 67,1 مىڭ وتباسىنداعى 350,4 مىڭ ادامعا اتاۋلى الەۋمەتتىك كومەك (ااك) تاعايىندالدى. بيىل بۇل باعىتقا بيۋدجەتتەن 73,9 ملرد تەڭگە ءبولىندى.
ااك وتباسىنىڭ ءاربىر مۇشەسىنە جان باسىنا شاققانداعى ورتاشا تابىسى وڭىرلىك ەڭ تومەنگى كۇنكورىس دەڭگەيىنىڭ 70%-نان تومەن ازاماتتارعا تاعايىندالادى. بيىل 1 قاڭتاردان باستاپ از قامتىلعان وتباسىلاردان شىققان مەكتەپ جاسىنا دەيىنگى بالالارعا بەرىلەتىن كەپىلدەندىرىلگەن الەۋمەتتىك توپتاما كومەكتىڭ تابيعي نىسانىنان مونەتيزاتسيالاۋ فورماتىنا, قوسىمشا تولەم تۇرىنە 1 جاستان 6 جاسقا دەيىنگى بالالاردى قوسا العاندا 1,5 اەك مولشەرىنە (2023 جىل – 5 175 تەڭگە) اۋىستىرىلدى. 1 اقپانداعى دەرەكتى كەلتىرسەك, ااك الۋشىلار قاتارىنداعى 1 جاستان 6 جاسقا دەيىنگى بالالاردى قوسا العاندا 106,4 مىڭ بالاعا قوسىمشا تولەم تاعايىندالدى.
قازىرگى ۋاقىتتا ازاماتتار ااك تاعايىنداۋعا ءوتىنىشتى تۇرعىلىقتى جەرى بويىنشا جۇمىسپەن قامتۋ ورتالىعىندا, اۋىل وكرۋگىنىڭ اكىمدىگىندە, سونداي-اق egov.kz ەلەكتروندىق ۇكىمەت پورتالى ارقىلى بەرە الادى.
