ايبەك سمادياروۆتىڭ ايتۋىنشا, 2017 جىلدان باستاپ قازاقستان ەۋروپالىق وداقتىڭ بارلىق ەلدەرىنىڭ ازاماتتارى ءۇشىن ۆيزاسىز رەجيم ەنگىزدى. قازىرگى ۋاقىتتا ءسىم ۆيزالىق راسىمدەردى جەڭىلدەتۋ ءۇشىن جانە قازاقستان ازاماتتارى ءۇشىن ءوزارا قولايلى تەتىكتەردى ازىرلەۋ ماقساتىندا ەۋروپالىق ارىپتەستەرمەن كونسۋلتاتسيالاردى جالعاستىرىپ جاتىر.
«قازاقستاننىڭ قانداي دا ءبىر تىزىمگە ەنگىزىلگەنى تۋرالى ماسەلەگە كەلەتىن بولساق, ءبىز ەۋروپالىق تاراپتان رەسمي حابارلاما العان جوقپىز. الايدا, جۇمىس تارتىبىندە بىزگە كەلەسىنى حابارلادى - 1 ناۋرىزدان باستاپ قازاقستان شەنگەن ۆيزاسىن بەرۋ كەزىندە بۇدان بىلاي ازاماتتارى ءۇشىن قوسىمشا كونسۋلتاتسيالار تالاپ ەتىلەتىن ەلدەردىڭ تىزبەسىندە بولادى. سونىمەن قاتار شەنگەن كەلىسىمىندە «قارا» نەمەسە «قىزىل» ءتىزىم دەگەن ۇعىم جوق, بۇل ادەتتەگى جۇمىس پروتسەسى تۋرالى ايتىلعان», دەدى ءسىم وكىلى.
ونىڭ ايتۋىنشا, مۇنداي كونسۋلتاتسيالار جەتى كۇنگە سوزىلۋى مۇمكىن. بۇل رەتتە ۆيزالىق ساۋالنامالاردى جالپى قاراۋدىڭ ستاندارتتى مەرزىمى بۇرىنعىداي قالادى – 15 كۇنگە دەيىن.
«قايتالاپ ايتقىم كەلەدى - ءىس جۇزىندە ءبىزدىڭ ازاماتتار ءۇشىن ۆيزالاردى قاراۋ راسىمىندە قانداي دا ءبىر وزگەرىستەر بولمايدى. ازاماتتارىنا قاتىستى قوسىمشا كونسۋلتاتسيالار باستالۋى مۇمكىن 40 ەل كىرەتىن ءتىزىم «قارا ءتىزىم» دەپ اتالمايدى, ويتكەنى ولاردىڭ اراسىندا ەۋروپالىق وداقپەن تىعىز قارىم-قاتىناستارى بار جانە قاۋىپسىزدىك جاعىنان قولايلى ورتالىق ازيانىڭ بارلىق ەلدەرى, ازەربايجان, ارمەنيا, ماروككو, تۋنيس, يوردانيا, ۆەتنام سياقتى كوپتەگەن ەلدەر كىرەدى», دەپ ءتۇسىندىردى ايبەك سمادياروۆ.
