قازىر ەلدەگى بارلىق ءوڭىر – كۆي تارالۋ جيىلىگى بويىنشا «جاسىل ايماقتا». ناۋقاستاردىڭ 99%-ى ساۋىعىپ شىققان. دەسەك تە كەيىنگى 2 اپتادا الدىڭعى 2 اپتامەن سالىستىرعاندا اۋرۋ جۇقتىرۋ 1,4 ەسە كوبەيىپ, 754-تەن 1 075 جاعدايعا دەيىن جەتكەن. بۇل تۋرالى سانيتاريالىق-ەپيدەميولوگيالىق باقىلاۋ كوميتەتىنىڭ جۇقپالى اۋرۋلاردى ەپيدەميولوگيالىق قاداعالاۋ باسقارماسىنىڭ باسشىسى روزا قوجاپوۆا تارقاتىپ ايتىپ بەرگەن ەدى.
«كۆي جۇقتىرعان پاتسيەنتتەرگە ستاتسيونارلىق كومەك كورسەتۋ ءۇشىن 2 056 توسەكتىك ورىن اشىلعان. ونىڭ ىشىندە ينفەكتسيالىق توسەكتىك ورىن – 1 747. قامتىلعانى – 104 (6%), بوس تۇرعانى – 1 643 (94%). رەانيماتسيالىق توسەكتىك ورىن – 309, قامتىلعانى – 8 (3%), بوس تۇرعانى – 301 (97%). ۆيرۋس شتامدارىن سايكەستەندىرۋ ناتيجەسى ىندەتتىڭ «وميكرون» نۇسقاسىنىڭ اينالىمدا جۇرگەنىن كورسەتىپ وتىر. رەسپۋبليكادا ءجىتى رەسپيراتورلى ۆيرۋستىق ينفەكتسيالارى جانە تۇماۋدىڭ ماۋسىمدىق ءوسىمى بايقالدى. ەپيدەميالىق ماۋسىم باستالعالى جرۆي-ءدىڭ 3,5 ملن جاعدايى تىركەلدى. ونىڭ ىشىندە 14 جاسقا دەيىنگى بالالار اراسىندا 2 ملن 300 مىڭ جاعداي انىقتالدى. وتكەن اپتامەن سالىستىرعاندا جرۆي-مەن اۋىرعاندار 1,5 ەسە تومەندەگەن. سونىمەن قاتار تۇماۋدىڭ 3 213 جاعدايى تىركەلسە, ونىڭ ىشىندە 14 جاسقا دەيىنگى بالالار اراسىندا 1 299 جاعداي انىقتالعان», دەدى ر.قوجاپوۆا.
رەسمي دەرەككە جۇگىنسەك, ەل اۋماعىندا قازان ايىنان باستاپ تۇماۋ ءورشي باستاعان. ەلدە ونىڭ H3N2, H1N1 جانە ۆ توبىنا جاتاتىن تۇرلەرى كەزدەسىپتى. وسىعان قوسا ۆيرۋستاردىڭ دا بار ەكەنىن قاپەردەن شىعارماعان ءلازىم. مىسالى, مۇنداي ۆيرۋستاردىڭ بوكاۆيرۋس, پاراگريپپ, رەسپيراتورلى-سينتيتسيالدى ۆيرۋس دەگەن تۇرلەرى قاتار جۇرەدى ەكەن.
«استانا مەديتسينا ۋنيۆەرسيتەتىنىڭ بالالار جۇقپالى اۋرۋلارى كافەدراسىنىڭ مەڭگەرۋشىسى ديناگۇل باەشەۆانىڭ ايتۋىنشا, جەلتوقسان-قاڭتار ايلارىندا تۇماۋمەن اۋىرعان بالالار كوپ.
«سالىستىرمالى تۇردە الىپ قاراساق, بىلتىر كوروناۆيرۋسپەن اۋىرعان بالالار سانى باسىم بولسا, بيىل تۇماۋمەن اۋىرعان بالالار كوپ. ال ونىڭ سالدارىنا توقتالساق, تۇماۋ بۇرىن كوروناۆيرۋسپەن اۋىرعان بالالاردا اۋىر ءوتتى. تۇماۋ بولسىن, مەيلى جرۆي بولسىن, كىشكەنتاي بالالار ءۇشىن وتە قاۋىپتى. اسىرەسە ەكى جاسقا تولماعاندارعا قيىن. سونداي-اق بۇل اۋرۋلار ەرەسەكتەرگە قاراعاندا بالالاردا ءجيى كەزدەسەدى. سىرقاتتانعان بالالاردىڭ ىشىندە جاعدايى اۋىرلاعاندار دا بار. سوندىقتان تۇماۋراتىپ جۇرگەن بالالاردى مەكتەپكە, بالاباقشاعا اپارماۋعا شاقىرامىز. ەگەر ناۋقاستىڭ دەنە قىزۋى تۇسپەسە نەمەسە قۇسۋ, لوقسۋ, تاماق, سۋ ىشپەۋ, ەنتىكپە سەكىلدى بەلگىلەر بايقالسا, مىندەتتى تۇردە دارىگەرگە بارۋ كەرەك. نەگىزى, بۇل اۋرۋ بالالاردىڭ 80%-ىندا جەڭىل تۇردە, 17%-دا ورتاشا دەڭگەيدە وتەدى. اۋىر جاعدايلار كوپ ەمەس», دەيدى ول.
مەديتسينا عىلىمدارىنىڭ دوكتورى, دەنساۋلىق ساقتاۋ مينيسترلىگىنىڭ شتاتتان تىس ينفەكتسيونيستى باقىت كوشەروۆا حالىقتى سكرينينگتەن, مەديتسينالىق تەكسەرۋدەن ۋاقتىلى وتۋگە, كوروناۆيرۋستان كەيىنگى سيندروم ناتيجەسىندە تۋىنداۋى مۇمكىن اسقىنۋلاردى بولدىرماۋ ءۇشىن پروفيلاكتيكا ءۇشىن ەكپە الۋعا شاقىردى.
«ينتوكسيكاتسيانىڭ ايقىن بەلگىلەرى – السىزدىك, كوپ تەرلەۋ, تەز شارشاۋ. كەيبىر ناۋقاستاردا پنەۆمونيا, ءىرىڭدى سينۋسيت, تونزيلليت, وتيت سىندى قايتالاما باكتەريالىق ينفەكتسيالار بولۋى مۇمكىن. سونىمەن قاتار سوزىلمالى ينفەكتسيالىق ەمەس اۋرۋلارى بار ناۋقاستاردا جەكە كورسەتكىشتەردىڭ جوعارىلاۋى بايقالادى. مىسالى, قانت ديابەتىمەن اۋىراتىن ناۋقاستاردا قانداعى گليۋكوزا دەڭگەيى كوتەرىلەدى», دەيدى ب.كوشەروۆا.
وسىلايشا, دارىگەرلەر تۇرعىنداردى تۇماۋ, كۆي جانە جرۆي-ءدىڭ الدىن الۋ ءۇشىن پروفيلاكتيكالىق شارالار قابىلداپ, دارىگەرلەرگە ۋاقتىلى قارالۋعا شاقىردى.
