«وتكەن جىلدىڭ قىركۇيەك ايىندا قابىلدانعان «الماتى قالاسىنىڭ 2025 جىلعا دەيىنگى دامىتۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالار» ستراتەگياسىن ىسكە اسىرۋ اياسىندا ءبىز ساپالى ءبىلىم بەرۋدى دامىتۋ بويىنشا جول كارتاسىن ازىرلەدىك. بۇگىن ءبىز قول قويعان جول كارتاسى ورتا ءبىلىم بەرۋ ماسەلەلەرىن شەشۋ, پەداگوگتەرىمىزدىڭ بىلىكتىلىگىن ارتتىرۋ جانە باسقا دا ماڭىزدى ماسەلەلەرمەن تولىقتىرىلعانىنا قۋانىشتىمىن», دەدى الماتى قالاسىنىڭ اكىمى ەربولات دوساەۆ.
الماتى قالاسى اكىمدىگى مەكتەپكە دەيىنگى ۇيىمداردا ورىن تاپشىلىعى ماسەلەسىن شەشۋ ءۇشىن 2029 جىلعا دەيىن بالاباقشالاردا مەملەكەتتىك تاپسىرىستى 35 مىڭ ورىنعا ۇلعايتۋدى جوسپارلاپ وتىر. مەكتەپتەردەگى ورىن تاپشىلىعى ماسەلەسى شەشىلۋدە. «جايلى مەكتەپ» جوباسى اياسىندا 2023 جىلدان باستاپ رەسپۋبليكالىق بيۋدجەت ەسەبىنەن 37 مىڭ وقۋشىعا ارنالعان 22 مەكتەپتىڭ قۇرىلىسىن باستاۋ جوسپارلاندى. ورتا ءبىلىم بەرۋ ۇيىمدارىنا تاعى 30 مەكتەپ پەن 9 قوسىمشا قۇرىلىس سالۋ 2025 جىلعا دەيىن ورىن تاپشىلىعىن 23 مىڭعا ازايتۋعا مۇمكىندىك بەرەدى. سونداي-اق 50 ءبىلىم بەرۋ نىسانىنا كۇردەلى جوندەۋ جۇمىستارى جۇرگىزىلەدى, 200-گە جۋىق مەكتەپكە زاماناۋي پاندىك كابينەتتەر مەن ينتەراكتيۆتى تاقتالار الىنادى.
جىل سايىن ەكى مىڭعا جۋىق پەداگوگ بىلىكتىلىگىن ارتتىرۋ كۋرستارىنان وتەدى. سونىمەن قاتار بيىل مەكتەپكە دەيىنگى تاربيە مەن وقىتۋدىڭ العاشقى ايماقتىق رەسۋرستىق ورتالىعى قۇرىلادى.
«الماتىنىڭ 18 مىڭعا جۋىق پەداگوگى بىلىكتىلىكتى ارتتىرۋ كۋرستارىنان وتەدى, مەكتەپتەردىڭ باسشىلىق قۇرامىنىڭ 450 وكىلى حالىقارالىق مەنەدجمەنت باعدارلامالارىن وقيدى, تاعى 9 مىڭ پەداگوگ فۋنكتسيونالدىق ساۋاتتىلىقتى, تسيفرلىق قۇزىرەتتىلىكتەر مەن داعدىلاردى قالىپتاستىرۋ باعدارلامالارى بويىنشا وقىتىلادى. مەملەكەت باسشىسىنىڭ تاپسىرماسىنا سايكەس تەگىن تەحنيكالىق جانە كاسىپتىك بىلىممەن 100% قامتاماسىز ەتۋ ءۇشىن كوللەدجدەردە مەملەكەتتىك تاپسىرىستى 20 مىڭنان استام ورىنعا كوبەيتۋ جوسپارلانۋدا», دەدى وقۋ-اعارتۋ ءمينيسترى عاني بەيسەمباەۆ.
تەحنيكالىق جانە كاسىپتىك ءبىلىم بەرۋ ۇيىمدارىنىڭ قولجەتىمدىلىگى مەن ساپاسىن ارتتىرۋ ارقاشان ماڭىزدى. وسىعان وراي 2025 جىلعا دەيىن 300 ورىندىق جاتاقحاناسى بار ەكى جاڭا كوللەدج قۇرىلىسىن باستاۋ جوسپارلانىپ وتىر. ەكى كوللەدجدە 600 ورىندىق ستۋدەنتتىك جاتاقحانا سالىنادى. 4 مىڭعا جۋىق تجكب وقىتۋشىلارى بىلىكتىلىكتى ارتتىرۋ كۋرستارىنان, ال 600 ارنايى ءپان مۇعالىمدەرى مەن وندىرىستىك وقىتۋ شەبەرلەرى حالىقارالىق تاعىلىمدامادان وتەدى. سونداي-اق 85 كوللەدجدىڭ باسشىلىق قۇرامى مەنەدجمەنت باعىتى بويىنشا بىلىكتىلىگىن ارتتىراتىن بولادى.
بىرقاتار ءىس-شارا ينكليۋزيۆتى ءبىلىم بەرۋدى دامىتۋعا باعىتتالعان. جوسپار بويىنشا, پمپك, پسيحولوگيالىق-پەداگوگيكالىق تۇزەتۋ كابينەتتەرىن كەڭەيتۋ, ەرەكشە قاجەتتىلىكتەرى بار بالالارعا ارنايى پسيحولوگيالىق-پەداگوگيكالىق كومەك كورسەتۋ ءۇشىن مەملەكەتتىك تاپسىرىس 1400 ورىنعا ارتتىپ, قالالىق ينكليۋزيۆتى رەسۋرستىق ورتالىق قۇرىلادى.
ءتورت يننوۆاتسيالىق شىعارماشىلىق ورتالىق, ەكى جازعى لاگەر سالۋ, قوسىمشا ءبىلىم بەرۋگە مەملەكەتتىك ءبىلىم بەرۋ تاپسىرىسىن ارتتىرۋ مەن مەكتەپ كىتاپحانالارىن جاڭعىرتۋ جوسپارلانعان.
سونىمەن قاتار جول كارتاسى بالالاردىڭ شىعارماشىلىق جانە زياتكەرلىك الەۋەتىن دامىتۋ, بالالاردىڭ قۇقىقتارىن قورعاۋ, ءبىلىم بەرۋ ۇيىمدارىندا سىبايلاس جەمقورلىققا قارسى ءىس-قيمىل جونىندەگى شارالاردى قامتيدى.
