بۇل حالىق انىنە پارا-پار ايگىلى تۋىندى. انىعىن ايتساق, ءماريام جاگورقىزىنىڭ عاشىقتىق جىرى. قازاقشاعا سۋداي, دومبىرانى دا جاقسى تارتاتىن ورىس قىزىنىڭ دۋدار (كەيبىر دەرەكتەردە دۇيسەن دەپ ايتىلادى) ەسىمدى قازاق جىگىتىن قۇلاي ءسۇيىپ, عاشىقتىق عالاماتىنان تۋعان ءان. عاجاپ ءبىر سەزىمنەن توگىلگەن جىر جارىققا شىققان بويدا-اق ەل اراسىنا تارالىپ كەتتى. كوبى اۆتورىن بىلمەگەن سوڭ, حالىق اندەرىنىڭ قاتارىنا قوسىپ تا جىبەرگەن. كەيىن مۋزىكا زەرتتەۋشىلەرى ا.زاتاەۆيچ پەن ب.ەرزاكوۆيچ تۋىندىنىڭ شىعۋ تاريحىن انىقتادى. ايدىك ءاندى العاشقىلاردىڭ ءبىرى بولىپ كومەيىنە بۇلبۇل ۇيا سالعان امىرە قاشاۋباەۆ ورىنداعان. كەيىن ونىڭ نەگىزىندە پوەما دا, وپەرا دا جازىلدى. ءيا, ءماريام جاگورقىزىنىڭ ەسىمى ءدۇيىم قازاققا وسىلاي تانىلدى.
ۇلتتىق مۋزەي قورىندا سول ءماريامنىڭ ايناسى ساقتاۋلى تۇر. اعاشپەن جيەكتەلگەن اينا قولدان جاسالعان. ەنى 29,7 سم, ۇزىندىعى 76,6 سم, شىنىسىنىڭ ەنى 22 سم, ۇزىندىعى 31,5 سم. اتالعان مۇراجايدىڭ ءباسپاسوز قىزمەتىنىڭ حابارلاۋىنشا, بۇل جادىگەردى 2017 جىلى 26 جەلتوقساندا ۇلتتىق مۋزەيگە ءماريام جاگورقىزىنىڭ نەمەرەسى قابيبا نۇربەكوۆا ارنايى تابىستاعان. قابيبا اپاي اجەسى اينانى كورشىسىنىڭ قىزىنا سىيعا بەرگەن دەيدى. ءبىراز جىلدار وتكەن سوڭ اينا م.جاگورقىزىنىڭ ۇرپاقتارىنا قايتارىلدى.
ال جادىگەردىڭ قازىرگى قالپى ەسكىرگەن, اعاشى كەۋىپ كەتكەن, كىرلەنگەن, شىنىسىندا داقتارى بار.
ءوزى دە, ءسوزى دە, ءانى دە, سەزىمى دە اڭىزعا اينالعان ءانشىنىڭ تارانعان ايناسىنا قاراپ تۇرىپ, ءوزىڭدى كورۋ دە ءبىر عاجاپ شىعار.
