قازاقستان زاڭناماسىنا سايكەس ەكستراديتسيالاۋ ءراسىمى ىزدەۋدەگى ادامدى ۇستاۋدى, وعان قاتىستى سوتتىڭ سانكتسياسىمەن 40 تاۋلىككە ۋاقىتشا كۇزەتپەن ۇستاۋدى, سودان كەيىن 12 اي مەرزىمگە ەكستراديتسيالىق قاماققا الۋدى قامتيدى. وسى ۋاقىت ىشىندە كۇزەتپەن ۇستاۋداعى ادامعا قاتىستى ەكستراديتسيالىق تەكسەرىس جۇرگىزىلەدى. بۇدان سوڭ, ونى شەت مەملەكەتكە بەرۋ مۇمكىندىگى تۋرالى شەشىم قابىلدانادى.
بۇل رەتتە باس پروكۋراتۋرانىڭ قۇزىرەتىنە ىزدەۋدەگى ادامداردى ەكستراديتسيالاۋ تۋرالى شەشىمدەر قابىلداۋ ماسەلەلەرى كىرەدى.
«اتاپ ايتقاندا, 2022 جىلى ءبىز شەت مەملەكەتتەردىڭ ۇستاپ بەرۋ تۋرالى 90-نان استام سۇراۋ سالۋىن قارادىق. ونىڭ 80-ءى قاناعاتتاندىرىلدى. قازاقستاننىڭ نەگىزگى ارىپتەستەرى رەسەي, وزبەكستان جانە قىرعىزستان. ولارمەن ەكستراديتسيالاۋ ماسەلەلەرى بويىنشا ءوزارا ءىس-قيمىلدىڭ ەڭ ۇلكەن كولەمى اتاپ وتىلەدى. اتالعان ءمان-جايلار مەملەكەتتەردىڭ قۇقىقتىق جۇيەلەرىنىڭ ۇقساستىعىنا, ولاردىڭ گەوگرافيالىق ورنالاسۋىنىڭ جاقىندىعىنا جانە كوشى-قون اعىندارىنىڭ قارقىندىلىعىنا بايلانىستى», دەلىنگەن باس پروكۋراتۋرا حابارلاماسىندا.
قىلمىس ساناتتارى بويىنشا ادامدار نەگىزىنەن الاياقتىق, ۇرلىق, ادام ءولتىرۋ, ەسىرتكىنىڭ زاڭسىز اينالىمى ءۇشىن بەرىلەدى. مىسالى, رەسەي باس پروكۋراتۋراسىنىڭ سۇراۋ سالۋى بويىنشا 2022 جىلى وسى ەلدىڭ ازاماتى ا.ج. ۋرزاگۋلوۆ مەملەكەتارالىق ىزدەۋدە بولعان جانە اقتوبە وبلىسىنىڭ اۋماعىندا ۇستالعان. رەسەيدىڭ قۇقىق قورعاۋ ورگاندارى ن.م. جۋماگازيەۆتى توپتىق قىلمىس جاسادى دەپ ايىپتادى. ورىنبور وبلىستىق سوتىنىڭ ۇكىمىمەن ا. ج. ۋرزاگۋلوۆ اتالعان قىلمىسى ءۇشىن 15 جىلعا باس بوستاندىعىنان ايىرىلدى. 75 000 اقش دوللارى سوماسىنا الاياقتىق جاساعانى ءۇشىن وزبەكستانعا بەرىلگەن گ.ت. نابيەۆ سامارقاند قالالىق قىلمىستىق سوتىنىڭ ۇكىمىمەن 9 جىلعا باس بوستاندىعىنان ايىرىلدى. سونداي-اق وتكەن جىلى رەسەيلىك قۇقىق قورعاۋ ورگاندارىنا داۆلاتوۆ س.ت., اۆدەەۆ س. ۆ., اليەۆ ر. ح. جانە تراندا ە. ۆ. ادام ولتىرگەنى ءۇشىن; ر. س.حاتوۆ, ا. ا.سوكولوۆ, ح. م. گاداماۋري ەسىرتكى ساتقانى ءۇشىن بەرىلدى. گرۋزيا باس پروكۋراتۋراسىنىڭ سۇراۋ سالۋى بويىنشا ر.م. چحيكۆادزە دەنساۋلىققا اۋىر زيان كەلتىرگەنى ءۇشىن, قىرعىز تاراپىنىڭ سۇراۋ سالۋى بويىنشا قاراقشىلىق جاساعانى ءۇشىن ن. ك. قۇرمانبەكوۆ بەرىلدى.
«ەكستراديتسيالاۋ تۋرالى شارتتارى جوق ەلدەرمەن ادامداردى ۇستاپ بەرۋ تۋرالى ماسەلەلەر حالىقارالىق قۇقىقتا قولدانىلاتىن ءوزارا ءىس-قيمىل قاعيداتى نەگىزىندە قارالادى. بۇل رەتتە ءبىز ارەكەتتى قىلمىس رەتىندە ءوزارا تانۋ تالابىن باسشىلىققا الامىز. اتاپ ايتقاندا, سوڭعى جىلدارى ءبىز اقش, تۇركيا, ليتۆا قۇزىرەتتى ورگاندارىنىڭ سۇرانىسى بويىنشا ىزدەۋدە جۇرگەن ادامداردى بەردىك. شەت مەملەكەتتەردىڭ قۇقىق قورعاۋ ورگاندارىنا ەكستراديتسيالاۋ ماسەلەلەرىندە ۋاقتىلى جانە ساپالى كورسەتىلەتىن قۇقىقتىق كومەك ءبىزدىڭ شەتەلدىك ارىپتەستەرىمىزدىڭ ادامداردى ۇستاپ بەرۋ تۋرالى قازاقستاندىق سۇراۋ سالۋلاردى وڭ قاراۋىنا كوپ جاعىنان ىقپال ەتەدى. جالپى وسى باعىتتا جۇرگىزىلىپ جاتقان جۇمىس جاسىرىن قىلمىسكەرلەردى اشكەرەلەۋگە مۇمكىندىك بەرەدى», دەپ جازىلعان حابارلامادا.
